ચીને પાકિસ્તાનની બરબાદી માટે અમેરિકાના માથે ઠીકરું ફોડયું!

• અમેરિકાએ ખૂબ ઊંચા વ્યાજ દરે અબજો ડોલરની લોન આપી પાકિસ્તાનને
  
• કેટલાંક વિકસિત દેશોની નાણાકીય નીતિઓના લીધે પાકિસ્તાન પર આર્થિક સંકટ: ચીન
• તમામ પક્ષોએ પાકિસ્તાનના આર્થિક વિકાસ માટે નક્કર પગલાં ભરવા જોઇએ: ચીન

ખૂબ ઊંચા વ્યાજ દરે અબજો ડોલરની લોન આપીને પાકિસ્તાનને બરબાદ કરનાર ચીને હવે અમેરિકા સહિતના પશ્ચિમી દેશો પર દોષનો ટોપલો ઢોળ્યો છે. ચીને દાવો કર્યો છે કે તે હંમેશા તેના 'આયર્ન બ્રધર' પાકિસ્તાનને આર્થિક અને નાણાંકીય મદદ કરે છે. અમેરિકા તરફ ઈશારો કરતા ચીને કહ્યું કે કેટલાક વિકસિત દેશોની નાણાકીય નીતિઓને કારણે પાકિસ્તાન સહિત ઘણા વિકાસશીલ દેશોમાં આર્થિક સંકટ ચાલી રહ્યું છે. ચીને એવી પણ માગણી કરી હતી કે તમામ પક્ષોએ પાકિસ્તાનના આર્થિક અને સામાજિક વિકાસ માટે નક્કર પગલાં ભરવા જોઈએ.

ચીને આ દાવો એવા સમયે કર્યો છે જ્યારે IMFના રિપોર્ટ અનુસાર પાકિસ્તાન પર ચીનની 30 અબજ ડોલરથી વધુની લોન છે. ચીને CPEC અને લોનના નામે પાકિસ્તાનને અબજો ડોલર આપ્યા છે. આ લોન ખૂબ ઊંચા વ્યાજ દરે છે. સ્થિતિ એ છે કે પાકિસ્તાન પરની કુલ વિદેશી લોનમાં ચીનનો સૌથી મોટો હિસ્સો છે. હાલમાં જ ચીને 70 કરોડ ડોલરની લોન આપી છે જેથી પાકિસ્તાનને ડિફોલ્ટથી બચાવી શકાય. જો કે ત્યારબાદ પણ પાકિસ્તાનના ડિફોલ્ટનું જોખમ ઘણું વધારે છે.

ચીનના વિદેશ મંત્રાલયના પ્રવક્તા માઓ નિંગે કહ્યું, 'એ નોંધવું જોઈએ કે કેટલાક વિકસિત દેશોની નાણાકીય નીતિઓ પાકિસ્તાન સહિત ઘણા વિકાસશીલ દેશોની આર્થિક પરેશાનીઓ માટે મુખ્યત્વે જવાબદાર છે.' માઓ નિંગે કહ્યું કે પશ્ચિમી આગેવાની હેઠળના વ્યાપારી ધિરાણ દેશો અને બહુપક્ષીય નાણાકીય સંસ્થાઓ વિકાસશીલ દેશોને મુખ્ય ધિરાણકર્તા છે. તેમણે કહ્યું, 'ચીન અને પાકિસ્તાન સદાબહાર વ્યૂહાત્મક સાથી અને આયર્ન બ્રધર્સ છે. બંને પક્ષોએ એકબીજાને મદદ કરી છે.

માઓએ કહ્યું, 'ચીને હંમેશા પાકિસ્તાન સાથે આર્થિક અને નાણાકીય સહયોગ કર્યો છે અને ઇસ્લામાબાદને આર્થિક વિકાસમાં મદદ કરી છે, જીવનધોરણ ઊંચું કર્યું છે.' ચીનના પ્રવક્તા ભલે ગમે તેવો દાવો કરે, પરંતુ નિષ્ણાતો માને છે કે પાકિસ્તાનની આર્થિક બરબાદીમાં ચીનની મુખ્ય ભૂમિકા છે, જેણે તેના બેલ્ટ એન્ડ રોડ પ્રોજેક્ટના નામે પાકિસ્તાન પર દેવાનો બોજ નાખ્યો છે. તેમનું કહેવું છે કે જો પાકિસ્તાન આર્થિક સંકટમાંથી બહાર નહીં આવે તો તે ચીનનું ગુલામ બની જશે. અમેરિકાએ પાકિસ્તાનને ચેતવણી આપી છે કે તે ચીનને તેના દેવાનું પુનર્ગઠન કરવા કહે. અમેરિકાના આ નિવેદનથી ચીન નારાજ છે.