કિંમ બાદ ચીનના ચાણક્ય પહોંચ્યા રશિયા,પુતિન સાથે સુરક્ષા અંગે થશે ચર્ચા

• ચીનના ટોચના રાજદ્વારી અને વિદેશ મંત્રી વાંગ યી રશિયાના પ્રવાસે પહોંચ્યા
  
• ચીનના વિદેશ મંત્રી વાંગ યી 4 દિવસની મુલાકાતે રશિયા ગયા
•  રશિયાના રાષ્ટ્રપતિ વ્લાદિમીર પુતિન આવતા મહિને ચીનની મુલાકાત લઈ શકે

રશિયા અને ચીન વચ્ચેની નિકટતા દુનિયાથી છુપી નથી. બંને દેશો પોતાના સંબંધોને વધુ સુધારવામાં વ્યસ્ત છે. આવી સ્થિતિમાં ચીનના ટોચના રાજદ્વારી અને વિદેશ મંત્રી વાંગ યી રશિયાના પ્રવાસે પહોંચ્યા છે. સાઉથ ચાઈના મોર્નિંગ પોસ્ટના અહેવાલ મુજબ વાંગ યી 4 દિવસની મુલાકાતે રશિયા ગયા છે. તેમની મુલાકાત એટલા માટે પણ ખાસ બની જાય છે કારણ કે રશિયાના રાષ્ટ્રપતિ વ્લાદિમીર પુતિન આવતા મહિને ચીનની મુલાકાત લઈ શકે છે.

અહેવાલ મુજબ, ચીનના વિદેશ મંત્રાલયે સોમવારે જાહેરાત કરી હતી કે ચીનના વિદેશ પ્રધાન વાંગ યી વાર્ષિક વ્યૂહાત્મક સુરક્ષા પરામર્શ બેઠકો માટે ગુરુવાર સુધી રશિયામાં રહેશે. વિદેશ મંત્રાલયના પ્રવક્તા માઓ નિંગે કહ્યું હતું કે રશિયાના વિદેશ મંત્રી સર્ગેઈ લવરોવને મળશે. જે બાદ બંને પક્ષો વચ્ચે કેટલાક મહત્વના મુદ્દાઓ પર ઉંડાણપૂર્વક ચર્ચા થશે. માઓએ કહ્યું હતું કે આ સમયગાળા દરમિયાન યુક્રેન યુદ્ધ વાટાઘાટોનો મુખ્ય મુદ્દો હશે. આ સિવાય તેઓ એશિયા-પેસિફિક ક્ષેત્રમાં નાટો દળોના વિસ્તરણ અને ઈન્ફ્રાસ્ટ્રક્ચર પર ચર્ચા કરશે.

વ્યૂહાત્મક સુરક્ષા પરામર્શ અંગે ચર્ચા કરવામાં આવશે

ચીનના મંત્રાલયના જણાવ્યા અનુસાર, આ મુલાકાત રશિયાની સુરક્ષા પરિષદના વડા નિકોલાઈ પાત્રુશેવના નિમંત્રણ પર થઈ રહી છે, જેઓ દ્વિપક્ષીય વ્યૂહાત્મક સુરક્ષા પરામર્શ મિકેનિઝમના સહ-અધ્યક્ષ છે.તમને જણાવી દઈએ કે, રશિયાના રાષ્ટ્રપતિ વ્લાદિમીર પુતિન ચીનની રાજધાનીમાં આવશે. ત્રીજી બેલ્ટ એન્ડ રોડ પહેલ માટે આવતા મહિને ચીનના રાષ્ટ્રપતિ શી જિનપિંગ સાથે રોડ સમિટમાં ભાગ લેશે. યુક્રેનના આક્રમણ બાદ પુતિનની આ પ્રથમ ચીન મુલાકાત હશે.

કિમ જોંગ ઉન પણ રશિયા પહોંચ્યા હતા

ઉલ્લેખનીય છે કે હાલમાં ઉત્તર કોરિયાના તાનાશાહ કિમ જોંગ ઉન રશિયાના પ્રવાસ પરથી પરત ફર્યા છે. આવી સ્થિતિમાં રશિયાના વિદેશ મંત્રી પરત ફરતા જ ચીન પહોંચી જાય તે પશ્ચિમી દેશોને પચાવી શકાય તેમ નથી. હકીકતમાં હાલમાં રશિયા પહોંચેલા ઉત્તર કોરિયાના નેતા કિમ જોંગ ઉને રશિયન રાષ્ટ્રપતિ વ્લાદિમીર પુતિન સાથે મુલાકાત કરી હતી. યુદ્ધના કારણે રશિયા હથિયારોની અછતનો સામનો કરી રહ્યું છે. આવી સ્થિતિમાં હવે અનુમાન લગાવવામાં આવી રહ્યું છે કે રશિયાને ઉત્તર કોરિયાની મદદ મળી શકે છે. કિમ અને પુતિન વચ્ચેની બેઠક દરમિયાન હથિયારોની સપ્લાય સંબંધિત ડીલ થઈ હોવાના પણ અહેવાલ છે. જોકે, આ વાતની સત્તાવાર પુષ્ટિ થઈ નથી.