- ભારત અને ચીન વચ્ચે ત્રણ વર્ષથી પૂર્વી લદ્દાખમાં ચાલી રહી છે મડાગાંઠ
- ચીન વિવાદિત વિસ્તારમાં કોઈપણ પ્રકારની G-20 બેઠક યોજવાનો સખત વિરોધ કર્યો
- પાકિસ્તાન અને ચીને ભૂતકાળમાં પણ કેન્દ્રશાસિત પ્રદેશ જમ્મુ અને કાશ્મીર વિશે ખોટી ટિપ્પણીઓ કરી
ચીને શુક્રવારે કહ્યું હતું કે તે જમ્મુ અને કાશ્મીરમાં આગામી સપ્તાહે યોજાનારી G-20 પર્યટન કાર્યકારી જૂથની બેઠકમાં ભાગ લેશે નહીં અને તે વિવાદિત ક્ષેત્રમાં આવી બેઠક યોજવાનો "દ્રઢપણે" વિરોધ કરે છે.
ચીન પાકિસ્તાનનું નજીકનું સાથી છે. ભારત જમ્મુ અને કાશ્મીરની રાજધાની શ્રીનગરમાં 22 મેથી 24 મે સુધી ત્રીજી જી-20 ટુરિઝમ વર્કિંગ ગ્રૂપની બેઠકનું આયોજન કરશે. કેન્દ્રીય મંત્રી જિતેન્દ્ર સિંહે બુધવારે કહ્યું હતું કે શ્રીનગરમાં G-20 મીટિંગ જમ્મુ અને કાશ્મીર માટે તેની સાચી ક્ષમતા બતાવવાની એક શ્રેષ્ઠ તક છે. સિંહે કહ્યું હતું કે શ્રીનગરમાં આ પ્રકારની આંતરરાષ્ટ્રીય ઘટના દેશ અને દુનિયાને સકારાત્મક સંદેશ આપશે.
ચીનના વિદેશ મંત્રાલયે એક નિવેદન આપ્યું
ચીનના વિદેશ મંત્રાલયના પ્રવક્તા વાંગ વેનબિને અહીં એક પ્રેસ કોન્ફરન્સમાં કહ્યું હતું કે ચીન વિવાદિત વિસ્તારમાં કોઈપણ પ્રકારની G-20 બેઠક યોજવાનો સખત વિરોધ કરે છે. તેમણે કહ્યું હતું કે અમે આવી બેઠકોમાં હાજરી આપીશું નહીં. પાકિસ્તાન અને ચીને ભૂતકાળમાં પણ કેન્દ્રશાસિત પ્રદેશ જમ્મુ અને કાશ્મીર વિશે ખોટી ટિપ્પણીઓ કરી છે. જમ્મુ-કાશ્મીર પર ચીન અને પાકિસ્તાનના નિવેદનોને ભારત પહેલા જ નકારી ચૂક્યું છે.
અગાઉ પાકિસ્તાને પણ વિરોધ વ્યક્ત કર્યો
ભારત અને ચીન વચ્ચે ત્રણ વર્ષથી પૂર્વી લદ્દાખમાં મડાગાંઠ ચાલી રહી છે. જૂન 2020માં પૂર્વી લદ્દાખની ગલવાન ખીણમાં ભીષણ અથડામણને પગલે દ્વિપક્ષીય સંબંધો ગંભીર તણાવમાં આવ્યા હતા. ભારતે કહ્યું છે કે જ્યાં સુધી સરહદી વિસ્તારમાં શાંતિ નહીં આવે ત્યાં સુધી દ્વિપક્ષીય સંબંધો સામાન્ય નહીં થઈ શકે. અગાઉ પાકિસ્તાન પણ શરૂઆતથી જ જી-20 બેઠકનો વિરોધ કરતું આવ્યું છે.
તેનું કારણ એ છે કે ભારતે વર્ષ 2019માં જમ્મુ અને કાશ્મીરમાંથી કલમ 370 અને 35A હટાવી દીધી હતી. ત્યારબાદ પાકિસ્તાનના શાસકોએ આંતરરાષ્ટ્રીય મંચ પર જમ્મુ-કાશ્મીરનો મુદ્દો અનેકવાર ઉઠાવ્યો છે. તેના પર ભારતે સીધો જવાબ આપ્યો છે કે કાશ્મીર ભારતનો આંતરિક મુદ્દો છે, તે આના પર કોઈની વાત સાંભળશે નહીં.
