- ગવર્નર જનરલ સિન્ડી કિરોએ તેમને શપથ લેવડાવ્યા હતા
- ક્રિસ હિપકિન્સ પહેલીવાર 2008માં સાંસદ તરીકે પસંદ થયા હતા
- કોરોનાકાળમાં ક્રિસ હિપકિન્સના કામના દુનિયાભરમાં વખાણ થયા હતા
ક્રિસ હિપકિન્સ ન્યુઝીલેન્ડના નવા વડાપ્રધાન બન્યા છે. રાજધાની વેલિંગ્ટનમાં આયોજિત એક સત્તાવાર સમારોહમાં ગવર્નર જનરલ સિન્ડી કિરોએ તેમને શપથ લેવડાવ્યા હતા. લેબર કોકસ દ્વારા ક્રિસને ઔપચારિક રીતે સમર્થન આપવામાં આવ્યું હતું. ત્યારબાદ વડાપ્રધાન બનવાની સાથે તેઓ લેબર પાર્ટીના નેતા પણ બની ગયા છે. નવા પીએમની રેસમાં તેઓ એકમાત્ર ઉમેદવાર હતા, ત્યારબાદ આ નિર્ણય લેવામાં આવ્યો.
આ દરમિયાન ક્રિસે કહ્યું- મારા માટે આ બહુ મોટી જવાબદારી છે. હું આગળ આવનારા પડકારો અને જવાબદારીઓને નિભાવવા તૈયાર છું.
ન્યુઝીલેન્ડમાં લેબર પાર્ટી 2017થી સત્તામાં છે, તેથી એન્ટી ઇન્કમ્બન્સી ઘણી વધારે છે. બીબીસીના જણાવ્યા અનુસાર ન્યુઝીલેન્ડ હાલમાં મોંઘવારી અને સામાજિક સમાનતા સાથે સંઘર્ષ કરી રહ્યું છે. જેના કારણે લેબર પાર્ટીની લોકપ્રિયતામાં નોંધપાત્ર ઘટાડો થયો છે. આ બધું ક્રિસ સામે મોટો પડકાર હશે.
કોરોનામાં સારું કામ કરીને ઓળખ બનાવી
44 વર્ષના ક્રિસ હિપકિન્સ પ્રથમ વખત 2008માં સાંસદ તરીકે ચૂંટાયા હતા. પીએમ બનતા પહેલા તેઓ પોલીસ, શિક્ષણ અને જાહેર સેવા મંત્રી હતા. જેસિંડા આર્ડર્નના રાજીનામા બાદ ક્રિસ પીએમ બન્યા છે. જો કે તેઓ આ પદ પર કેટલો સમય રહેશે તે જાણી શકાયું નથી. કારણ કે ન્યૂઝીલેન્ડમાં ઓક્ટોબર 2023માં સામાન્ય ચૂંટણીઓ થવાની છે.
મહામારીનો સામનો કરવા માટે ક્રિસ હિપકિન્સને વર્ષ 2020માં કોવિડ મંત્રી બનાવવામાં આવ્યા હતા. તે દરમિયાન ક્રિસના કામની વિશ્વભરમાં પ્રશંસા થઈ હતી. ન્યુઝીલેન્ડમાં કોરોના મહામારીના ત્રણ વર્ષમાં માત્ર 2,437 મૃત્યુ નોંધાયા છે.
વડાપ્રધાન તરીકે જેસિંડાનો છેલ્લો દિવસ
વડાપ્રધાન તરીકે જેસિન્ડા આર્ડર્નનો આજે છેલ્લો દિવસ હતો. આ દરમિયાન તેઓ ખૂબ જ ભાવુક દેખાઈ રહ્યા હતા. સંસદ ભવનમાં તમામ લો-મેકર્સને ગળે લગાવ્યા હતા. ત્યારબાદ તેઓ ગવર્નમેન્ટ હાઉસ પહોંચ્યા, જ્યાં તેમણે ઔપચારિક રીતે કિંગ ચાર્લ્સને પોતાનું રાજીનામું સુપરત કર્યું. 19 જાન્યુઆરીએ રાજીનામાની જાહેરાત કરતી વખતે, જેસિંડાએ કહ્યું હતું - હવે સમય આવી ગયો છે. મારામાં બીજા 4 વર્ષ સુધી નેતૃત્વ કરવાની હિંમત નથી.
રાજા ચાર્લ્સના નામે રાજીનામું કેમ?
કિંગ ચાર્લ્સ 14 કોમનવેલ્થ દેશોના રાજા છે. આમાંથી એક દેશ ન્યુઝીલેન્ડ પણ છે. આ દેશોમાં રાજાની સત્તા મોટે ભાગે પ્રતીકાત્મક હોય છે. મોટાભાગના દેશોમાં રાજકીય નિર્ણયો ચૂંટાયેલી સંસદ દ્વારા લેવામાં આવે છે અને વડાપ્રધાન દ્વારા અમલમાં મૂકવામાં આવે છે. એટલે કે રાજા દેશના વડા છે, પરંતુ સરકારના વડા નથી.
રાજાની કેટલીક બંધારણીય ફરજો હોય છે, જેમાંથી સૌથી મહત્વપૂર્ણ નવી સરકારોની મંજૂરી છે. આ ફરજો દરેક દેશમાં બદલાય છે. જેમ કે કાયદાની ઔપચારિક મંજૂરી આપવી, કેટલાક અધિકારીઓની નિમણૂક કરવી અને રાષ્ટ્રીય સન્માન આપવું.
