Donald trumpએ ટેરિફ પર લીધો યુ-ટર્ન, હવે સ્માર્ટફોનથી લઈને તમામ વસ્તુઓમાં રાહત

અમેરિકાના રાષ્ટ્રપતિ ડોનાલ્ડ ટ્રમ્પે ટેરિફને લઈને યુ-ટર્ન લીધો છે. રેસિપ્રોકલ ટેરિફને 90 દિવસ માટે રોકવાના નિર્ણય બાદ ડોનાલ્ડ ટ્રમ્પે સ્માર્ટફોન, કમ્પ્યુટર, ચિપ્સ વગેરે ઈલેક્ટ્રોનિક્સને રેસિપ્રોકલ ટેરિફમાંથી છૂટ આપી છે. આ નિર્ણયથી અમેરિકાના લોકોને રાહત મળશે, કારણ કે આ વસ્તુઓની કિંમતો હવે નહીં વધે. આ ઉપરાંત આ નિર્ણયથી એપલ અને સેમસંગ જેવી મોટી ઈલેક્ટ્રોનિક્સ કંપનીઓે ફાયદો થઈ શકે છે.

અમેરિકાના કસ્ટમ્સ અને બોર્ડર પ્રોટેક્શને શુક્રવારે મોડી રાત્રે કેટલીક વસ્તુઓને ટેરિફમાંથી છૂટ આપવા અંગે એક નોટિસ જાહેર કરી છે. તે મુજબ, ડોનાલ્ડ ટ્રમ્પે મોબાઈલ ફોન, કમ્પ્યુટર જેવા ઇલેક્ટ્રોનિક સામાનને ટેરિફમાંથી છૂટ આપી દીધી છે. આનો અર્થ એ થયો કે ટ્રમ્પ દ્વારા ચીન પર લગાવવામાં આવેલા 125 ટકાના ટેરિફ અને અન્ય દેશો પર લગાવવામાં આવેલા 10 ટકાના ટેરિફમાંથી હવે કેટલાક ઇલેક્ટ્રોનિક સામાનને છૂટ મળશે.

જે વસ્તુઓ પર છૂટછાટ અપાઈ છે, તેમાં સ્માર્ટફોન, લેપટોપ, હાર્ડ ડ્રાઈવ, કમ્પ્યુટર પ્રોસેસર અને મેમરી ચિપ્સનો સમાવેશ થાય છે. આ તમામ વસ્તુઓ સામાન્ય રીતે અમેરિકામાં બનતી નથી. જો તેને અમેરિકામાં બનાવવાનું શરૂ પણ કરવામાં આવે, તો તેમાં ઘણાં વર્ષો લાગી શકે છે. આ ઉપરાંત ટ્રમ્પના નવા ટેરિફથી સેમિકન્ડક્ટર બનાવવાની મશીનોને પણ છૂટ આપવામાં આવી છે. આ નિર્ણયથી તાઈવાન સેમિકન્ડક્ટર મેન્યુફેક્ચરિંગ કંપની (TSMC) જેવી કંપનીઓને ફાયદો થશે, જે અમેરિકામાં મોટું રોકાણ કરી રહી છે. આનાથી અન્ય ચિપ બનાવતી કંપનીઓને પણ રાહત મળશે.

રેસિપ્રોકલ ટેરિફ પર ટ્રમ્પ પ્રશાસનનો આ પહેલો યુ-ટર્ન નથી. આ પહેલાં ટ્રમ્પે 9 એપ્રિલે મોટી જાહેરાત કરતાં 90 દિવસ માટે ભારત સહિત વિશ્વના મોટા ભાગના દેશો પર લગાવવામાં આવેલા ટેરિફને રોકવાની ઘોષણા કરી હતી. આ 90 દિવસ દરમિયાન તે દેશો પર 10 ટકાનો રેસિપ્રોકલ ટેરિફ લાગશે.