- પાકિસ્તાન ઈતિહાસના સૌથી મોટા આર્થિક સંકટ ફસાયું
- પાકિસ્તાની લોકોએ તેમની અડધી સંપત્તિ ગુમાવી દીધી
- મોંઘવારી વચ્ચે લોકો ઈદની ખુશી મનાવવા માટે ઉમટી પડ્યા
પાકિસ્તાનમાં મીટથી લઈને ચા સુધીના ભાવ રેકોર્ડ સ્તરે પહોંચી ગયા છે. નિષ્ણાતોના મતે પાકિસ્તાન હાલમાં ઈતિહાસના સૌથી મોટા આર્થિક સંકટનો સામનો કરી રહ્યું છે. પાકિસ્તાનમાં ફજરની નમાજ બાદ ઈદની શરૂઆત થઈ હતી. શહેર હોય કે ગ્રામ્ય વિસ્તાર, દરેક જગ્યાએ લોકો ઈદની ખુશી મનાવવા માટે ઉમટી પડ્યા હતા. પાકિસ્તાનની મસ્જિદોમાં ભારે ભીડ જોવા મળી હતી.
ઈદના વેચાણમાં 20%નો ઘટાડો
ઈદની ઉજવણી દરમિયાન લોકો એકબીજાને ગળે લગાવે છે અને પ્રેમ દર્શાવે છે. આ દરમિયાન લોકો તેમના મનપસંદ કપડામાં દેખાયા હતા. ઈદની આ ઉજવણી પર રેકોર્ડ મોંઘવારીની અસર સ્પષ્ટપણે જોવા મળી હતી. ઈદ એ પાકિસ્તાનમાં ભારે ખરીદીનો અવસર છે પરંતુ આ વર્ષે દ્રશ્ય ઘણું અલગ હતું. વેપારીઓનું કહેવું છે કે આ વર્ષે લગભગ તમામ વેચાણમાં 20 ટકાનો ઘટાડો થયો છે.
પાકિસ્તાનમાં માર્ચ મહિનામાં મોંઘવારી 35 ટકા પર પહોંચી ગઈ હતી. તેનું કારણ પાકિસ્તાની રૂપિયો હતો જે સતત તૂટતો રહ્યો હતો. પાકિસ્તાન સરકારે IMF પાસેથી લોન મેળવવા માટે ઘણી જરૂરી વસ્તુઓની કિંમતોમાં વધારો કર્યો છે. પાકિસ્તાનમાં અનાજની મોંઘવારી 47 ટકાથી વધુ વધી છે.
પાકિસ્તાની લોકોએ તેમની અડધી સંપત્તિ ગુમાવી દીધી
પાકિસ્તાનમાં આ વર્ષે ઈદ પર મોંઘવારીની સ્થિતિ એવી હતી કે અમીરો પણ આ વર્ષે ખરીદીમાં ઘટાડો કરતા જોવા મળ્યા હતા. એક બિઝનેસમેને કહ્યું હતું કે છેલ્લા બે વર્ષમાં અવમૂલ્યનને કારણે પાકિસ્તાની લોકોએ તેમની અડધી મિલકત ગુમાવી દીધી છે. તે જ સમયે, મોંઘવારી 100 ટકા સુધી વધી છે. આ કારણે ઈદ પર ખૂબ જ ઓછું વેચાણ જોવા મળ્યું છે.
શહેબાઝ શરીફ, આર્મી વિરુદ્ધ ઈમરાન ખાન
પાકિસ્તાનની આર્થિક સ્થિતિ વચ્ચે નેતાઓ વાદ-વિવાદમાં સામ-સામે છે. લોકોને ખાવાના ફાંફાં, મોંઘવારી આસમાને, લોટ માટે પડાપડી આવી સ્થિતિ સર્જાઈ છે. ત્યારે પાકિસ્તાનની શાહબાઝ સરકાર હવે ચૂંટણી કરાવવા માંગતી નથી. આમાં પાકિસ્તાન આર્મી પણ શાહબાઝ સરકાર સાથે ઉભી જોવા મળી રહી છે. સાથે જ ઈમરાન ખાન વહેલી તકે ચૂંટણી કરાવવાની માંગ પર અડગ છે. તેઓ દરરોજ વિરોધ કરવાની ધમકી આપી રહ્યા છે. સુપ્રીમ કોર્ટ પણ ઈમરાનની સાથે છે પરંતુ સરકાર તૈયાર નથી.
