મહાકંગાળ પાકિસ્તાનમાં લોકોને ખાવાના ફાંફા, દૂધ ભાવમાં રૂ. 210 પ્રતિ લીટર થયા

• પાકિસ્તાન સતત આર્થિક સંકટમાંથી પસાર થયું
  
• કરાચીમાં દૂધના ભાવમાં પાકિસ્તાની રૂ. 190 પ્રતિ લિટરથી વધારીને રૂ. 210 પ્રતિ લિટરનો વધારો કર્યો
• ચિકન મીટ હવે 700-780 રૂપિયા પ્રતિ કિલોના ભાવે વેચાયું

પાકિસ્તાન સતત આર્થિક સંકટમાંથી પસાર થઈ રહ્યું છે જેના કારણે લોકો સતત વધી રહેલી મોંઘવારીથી પરેશાન છે. દેશમાં અનિશ્ચિત આર્થિક પરિસ્થિતિ વચ્ચે રાજ્યના દુકાનદારોએ કરાચીમાં દૂધના ભાવમાં પાકિસ્તાની રૂ. 190 પ્રતિ લિટરથી વધારીને રૂ. 210 પ્રતિ લિટરનો વધારો કર્યો છે.

દૂધના ભાવ આસમાને

અહેવાલો અનુસાર, કેટલાક દુકાનદારોએ છૂટક દૂધની કિંમત પાકિસ્તાની રૂ. 190 પ્રતિ લિટરથી વધારીને રૂ. 210 કરી દીધી છે અને જીવંત બ્રોઈલર ચિકન છેલ્લા બે દિવસમાં 30-40 રૂપિયા પ્રતિ કિલોનો વધારો જોવા મળ્યો છે. ત્યાર બાદ બ્રોઈલર ચિકનની કિંમત 480-500 રૂપિયા પ્રતિ કિલો થઈ ગઈ છે. તે જ સમયે, ચિકન મીટ હવે 700-780 રૂપિયા પ્રતિ કિલોના ભાવે વેચાઈ રહ્યું છે જે થોડા દિવસો પહેલા 620-650 રૂપિયા પ્રતિ કિલો હતું.

પાકિસ્તાનમાં જનતાને મોંઘવારીનો માર પડ્યો

પાકિસ્તાનમાં લોકો મોંઘવારીનો માર સહન કરી રહ્યા છે. હાલમાં સ્થિતિ ખુબ જ કફોડી બની છે અને પાકિસ્તાનનો વિદેશી હૂંડિયામણનો ભંડાર ત્રણ અબજ ડોલરથી ઓછો રહ્યો છે. કરાચી મિલ્ક રિટેલર્સ એસોસિએશનના મીડિયા ઈન્ચાર્જ વહીદ ગદ્દીએ કહ્યું હતું કે, કેટલાક દુકાનદારો મોંઘી કિંમતે દૂધ વેચી રહ્યા છે. આ દુકાનો જથ્થાબંધ વેપારીઓ અને ડેરી ખેડૂતોની છે. જો ડેરી ખેડૂતો અને જથ્થાબંધ વેપારીઓ આ વધેલા ભાવે દૂધ વેચવાનું ચાલુ રાખે છે તો છૂટક વેપારીઓએ ખરીદ કિંમતમાં પ્રતિ લિટર રૂ. 27 વધુ ચૂકવવા પડશે. તેઓ ગ્રાહકો પાસેથી એક લિટર દૂધ માટે 210ને બદલે 220 પાકિસ્તાની રૂપિયા લેવા માટે મજબૂર થશે.

પાકિસ્તાનમાં અનાજ મોંઘું થયું

પાકિસ્તાનમાં મરઘીઓને આપવામાં આવતું અનાજ પણ ઘણું મોંઘું થઈ ગયું છે. 50 કિલો અનાજની બોરી માટે 7,200 રૂપિયા ચૂકવવા પડે છે. જેના કારણે પાકિસ્તાનમાં ચિકન પણ મોંઘુ થઈ રહ્યું છે.