- ઈઝરાયેલ ગાઝાનાં નાગરિકો પર દક્ષિણ તરફ જવા કરી રહ્યું છે દબાણ
- સરકાર દ્વારા જાહેર કરાયેલા ફતવાનાં કારણે નાગરિકોની દયનીય સ્થિતિ
- સંરક્ષણ મંત્રાલયની કચેરી સામે પીએમ નેતન્યાહુ સામે વિરોધ પ્રદર્શન
ઈઝરાયેલ ગાઝા પટ્ટીના ઉત્તરીય વિસ્તારને ખાલી કરવાની ચેતવણીનું વારંવાર પુનરાવર્તન કરી રહ્યું છે. હવે એરોપ્લેનની મદદથી ઇઝરાયેલી સેના ગાઝામાં પત્રિકાઓ છોડવામાં આવી રહી છે. જેમાં તેમને ઘર ખાલી કરવાની ચેતવણી આપવામાં આવી છે. જો તેઓ આમ ન કરે તો તેઓને "આતંકવાદી" ગણવામાં આવશે. આવી જ ચેતવણી ઓડિયો માધ્યમ દ્વારા પણ આપવામાં આવી છે.
દક્ષિણ તરફ જવાની ચેતવણી
ઈઝરાયેલે અગાઉ ગાઝામાં નાગરિકોને સ્ટ્રીપનો ઉત્તરીય વિસ્તાર ખાલી કરીને દક્ષિણ તરફ જવાની ચેતવણી આપી હતી. હવે આ ચેતવણીઓ ઇઝરાયલી લશ્કરી વિમાનોમાંથી છોડવામાં આવેલી પત્રિકાઓ અને રહેવાસીઓને મોકલવામાં આવેલા મોબાઇલ ફોન ઓડિયો સંદેશાઓ દ્વારા પુનરાવર્તિત કરવામાં આવી છે. પત્રિકાઓ અને સંદેશાઓમાં કહેવામાં આવ્યું છે કે ઉત્તરમાં રહેવાથી તેમના જીવન જોખમમાં આવી શકે છે અને જો તેઓ આગળ નહીં વધે તો તેઓને "આતંકવાદી સંગઠન"ના સમર્થકો તરીકે ઓળખવામાં આવશે.
દક્ષિણનાં વિસ્તારો પણ નથી સુરક્ષિત
ગાઝામાં સંભવિત જમીની હુમલા પહેલા આ ચેતવણી જાહેર કરવામાં આવી હતી. ઈઝરાયેલની સેના ગાઝાના ઉત્તરમાં રહેતા નાગરિકોને તેમના ઘર ખાલી કરવા માટે સતત ચેતવણી આપી રહી છે. જો કે પેલેસ્ટાઈનનાં લોકોએ જણાવ્યું હતું કે તેઓને અગાઉથી કહેવામાં આવ્યું ન હતું કે જો તેઓ પાછા નહીં હટે તો તેમને "આતંકવાદી" સમર્થક ગણી શકાય. ઈઝરાયેલની ચેતવણીઓ હોવા છતાં ઘણા પેલેસ્ટિનિયનો હજુ પણ ચાલુ હવાઈ હુમલાઓને કારણે દક્ષિણ તરફ જવાનું વધુ જોખમી માને છે અને અહેવાલ આપ્યો છે કે ગાઝા પટ્ટીના દક્ષિણના વિસ્તારો પણ પ્રભાવિત થયા છે જ્યાં ઇઝરાયેલ બોમ્બમારો ચાલુ રાખે છે. હવે તે પશ્ચિમ કાંઠાને પણ નિશાન બનાવી રહ્યું છે.
200 થી વધુ લોકો હમાસ દ્વારા બંધક બનાવાયા
ગત રાત્રિએ ઈઝરાયેલના હવાઈ હુમલા દરમિયાન ગાઝા વિસ્તારમાં 50 થી વધુ પેલેસ્ટાઈનના મોત થયા હતા. હમાસ દ્વારા બંધક બનાવીને 200 થી વધુ ઇઝરાયેલ અને વિદેશી નાગરિકો ફસાયેલા છે. ઈઝરાયેલી સેનાએ ગાઝાના ઉત્તરમાં એક સપ્તાહથી ઘેરો ઘાલ્યો છે અને કથિત રીતે તે સેનાને ગાઝામાં પ્રવેશવાનો આદેશ આપી રહી નથી કારણ કે વિસ્તાર ખાલી કરવામાં આવ્યો નથી. એવું માનવામાં આવે છે કે અમેરિકાનો પહેલો પ્રયાસ બંધકોને મુક્ત કરવાનો છે જ્યાં ઘણા અમેરિકનો પણ ફસાયેલા છે.
હમાસે બે બંધકોને મુક્ત કર્યા
તાજેતરમાં બે અમેરિકન કેદીઓની મુક્તિ બાદ ઈઝરાયેલમાં વધુ કેદીઓને મુક્ત કરવાની અટકળો ચાલી રહી છે. એવું કહેવામાં આવી રહ્યું છે કે પડદા પાછળ ઘણું દબાણ છે, જેમાં પશ્ચિમી સરકારોના રાજદ્વારી પ્રયાસો પણ સામેલ છે. ઈઝરાયલને સ્પષ્ટ શબ્દોમાં કહેવામાં આવ્યું છે કે પહેલા તે નાગરિકોના પરત આવવાની ખાતરી કરો અને પછી જમીન પર હુમલો કરવા આગળ વધો. પશ્ચિમી દેશોનું પણ દબાણ છે કારણ કે બેવડી નાગરિકતા ધરાવતા અમેરિકા સહિત અન્ય કેટલાક દેશોના નાગરિકો પણ હમાસના બંધક છે.
નેતન્યાહુના રાજીનામાની માંગ
ગાઝામાં કેદીઓના પરિવારજનોમાં ઈઝરાયેલ સરકાર પ્રત્યે ગુસ્સો વધી રહ્યો છે. આનું ઉદાહરણ શનિવારે સાંજે તેલ અવીવમાં સંરક્ષણ મંત્રાલયની કચેરી સામે યોજાયેલું વિરોધ પ્રદર્શન છે જ્યાં તેમણે પીએમ બેન્જામિન નેતન્યાહુના રાજીનામાની પણ માંગ કરી હતી. વિરોધીઓએ માંગ કરી હતી કે ઇઝરાયેલી સરકાર જ્યાં સુધી ગાઝામાં રાખવામાં આવેલા આ કેદીઓને મુક્ત કરવાની ખાતરી ન આપે ત્યાં સુધી ગ્રાઉન્ડ આક્રમણ આગળ ન વધે. પરિણામે ઇઝરાયેલના કેટલાક વર્ગો સરકાર પર દબાણ લાવી રહ્યા છે.
