ઇઝરાયેલના હવાઈ હુમલામાં હમાસની રોકેટ લોન્ચિંગ પોઝિશન્સ તહસનહસ

• ઈઝરાયેલ દ્વારા હમાસ પર હુમલાઓમાં થઈ રહ્યો છે વધારો
  
  
• એર સ્ટ્રાઈકથી આતંકીઓનાં હેડક્વાર્ટર કરાઈ રહ્યા છે નષ્ટ
• શનિવારે જ આતંકી અલી કાચીને કરવામાં આવ્યો હતો ઠાર

ઈઝરાયેલનાં સંરક્ષણ દળોએ ગાઝા પટ્ટીમાં હમાસ સાથે સંકળાયેલા ડઝન જેટલા ઓપરેશનલ હેડક્વાર્ટર અને મોર્ટાર બોમ્બ લોન્ચિંગ પોઝિશન્સ હવાઈ હુમલામાં નષ્ટ કરી દીધાં છે.

સંખ્યાબંધ આતંકવાદીઓનો ખાત્મો

આ એર સ્ટ્રાઈકમાં આતંકવાદીઓનાં અનેક ઠેકાણાઓનો નાશ કરવામાં આવ્યો. ઈઝરાયેલી સંરક્ષણ દળોએ આતંકવાદીઓનાં હેડક્વાર્ટર અને મોર્ટાર બોમ્બ લોન્ચિંગ પોઝિશન્સને નિશાના પર લીધાં છે. હમાસનાં આતંકીઓની કમર તોડવા તેમના હથિયારો અને ખાસ ઠેકાણાઓ ટાર્ગેટ કરવામાં આવી રહ્યાં છે.

નજાબા ફોર્સનું લશ્કરી મુખ્યાલય સામેલ

સંરક્ષણ દળો દ્વારા નષ્ટ કરવામાં આવેલા સ્થળોમાં આતંકવાદી સંગઠનના નજાબા ફોર્સના કમાન્ડર અલી કાચીનું લશ્કરી મુખ્યાલય પણ સામેલ હતું. આ લશ્કરી મુખ્યાલયનાં કમ્પાઉન્ડની અંદર રહેલા સંખ્યાબંધ આતંકવાદીઓ પણ માર્યા ગયા હતા. નજાબા ફોર્સનો કમાન્ડર અલી કાચી શનિવારે એક એર સ્ટ્રાઈકમાં માર્યો ગયો હતો.