- હમાસનાં ખાત્મા પછી સુરક્ષા શાસન પ્રણાલીની સ્થાપના
- શાસનની સ્થાપના બાદ ઇઝરાયેલની જવાબદારી કરાશે દૂર
- અમેરિકા જેવી ભૂલ ન થાય તેનું સરકાર પર દબાણ
ઈઝરાયેલ-હમાસ વચ્ચે ચાલી રહેલા સંઘર્ષમાં બંને દેશોનાં નાગરિકોને પારવાર મુશ્કેલીઓનો સામનો કરવો પડી રહ્યો છે. ઈઝરાયેલ દ્વારા હમાસનાં ગાઝા સ્થિત અનેક ઠેકાણાઓ પર હુમલાઓ કરવામાં આવી રહ્યા છે. આ હુમલાઓ વચ્ચે ઈઝરાયેલ ગાઝા પટ્ટી પર કબજો લેશે એવી અટકળો થઈ રહી છે. જેનો ખુલાસો કરતાં ઇઝરાયેલના સંરક્ષણ પ્રધાન યોવ ગેલન્ટે જણાવ્યું હતું કે ગાઝા પટ્ટી પર અપેક્ષિત આક્રમણનો મુખ્ય ઉદ્દેશ્ય હમાસ સરકાર અને આતંકવાદી જૂથનો વિનાશ હશે.
શું કહ્યું ઈઝરાયેલનાં સંરક્ષણ પ્રધાને?
શુક્રવારે તેલ અવીવમાં નેસેટ ફોરેન અફેર્સ એન્ડ ડિફેન્સ કમિટીની બેઠક પહેલાં બોલતી વખતે ગેલન્ટે જણાવ્યું હતું કે ''હમાસને નાબૂદ કર્યા પછી ગાઝા પટ્ટીમાં એક નવી સુરક્ષા વ્યવસ્થા વાસ્તવિકતામાં પરિણમશે.'' ગેલન્ટે યુદ્ધના ઉદ્દેશ્યોની પણ રૂપરેખા આપી હતી જેમાં હમાસની લશ્કરી અને સરકારી કામગીરી બંનેનો નાશ કરવાનો સમાવેશ થાય છે. ગેલન્ટે એમ પણ કહ્યું હતું કે સ્ટ્રીપમાં નવી "સુરક્ષા શાસન" બનાવીને ગાઝા પર ઇઝરાયેલની કોઈપણ સરકારી જવાબદારીને દૂર કરવા ઇઝરાયેલ ઝડપથી આગળ વધશે.
ગેલેન્ટે આપી ત્રણ તબક્કાઓની રુપરેખા
ફોરેન અફેર્સ એન્ડ ડિફેન્સ કમિટીના સભ્યો સાથે વાત કરતા ગેલન્ટે યુદ્ધ દરમિયાન થનારા ત્રણ તબક્કાઓની રૂપરેખા આપી હતી. ગેલેન્ટે પ્રથમ તબક્કાની રૂપરેખા પ્રગટ કરતાં કહ્યું હતું કે હમાસને હરાવવા અને નાશ કરવા માટે ઓપરેટિવ્સને નષ્ટ કરવા અને માળખાકીય સુવિધાઓને નુકસાન પહોંચાડવાના હેતુ સાથે એરસ્ટ્રાઇક અને પછી ગ્રાઉન્ડ દાવપેચ સાથે લશ્કરી ઝુંબેશ ચાલી રહી છે.'' બીજા તબક્કામાં "પ્રતિરોધના ખિસ્સા" નાબૂદ કરવામાં આવશે. જેમાં આતંકીઓને મળતી આર્થિક સહાય પર ડામ દેવામાં આવશે. ગેલન્ટ અનુસાર બીજા તબક્કા દરમિયાન લડાઈની તીવ્રતા ઓછી હશે.
નવી સુરક્ષા શાસન પ્રણાલીની રચના
ગેલેન્ટે ત્રીજા તબક્કા વિશે જણાવતા કહ્યું હતું કે ''ત્રીજું પગલું ગાઝા પટ્ટીમાં નવી સુરક્ષા શાસન પ્રણાલીની રચના, ગાઝા પટ્ટીમાં રોજિંદા જીવન માટે ઇઝરાયેલની જવાબદારીને દૂર કરવી અને ઇઝરાયેલના નાગરિકો સાથે ગાઝાની આસપાસના વિસ્તારનાં રહેવાસીઓ માટે નવી સુરક્ષા વાસ્તવિકતાની રચના હશે."
સરકાર પર દબાણ
ગાઝા પટ્ટીમાં અવિરત લડાઈમાં સૈન્ય ફસાઈ ન જાય તેની ખાતરી કરવા માટે ઈઝરાયેલી સરકાર પર દબાણ છે. તેના જવાબમાં સરકારે ગાઝામાં હમાસની હાજરીના અંતની બાંયધરી આપતી વખતે કોઈ લાંબી લડાઈ ન થાય તેની ખાતરી કરવા માટે તેના યુદ્ધના ઉદ્દેશો નક્કી કર્યા છે.
