- કેનેડાની સંસદમાં શરમજનક ઘટનાને લઈને 'યુદ્ધ' શરૂ
- કેનેડામાં વિપક્ષી નેતાએ ભૂતપૂર્વ નાઝી સૈનિકનું સન્માન કરવા બદલ ટ્રુડોની નિંદા કરી
- ટ્રુડો અને તેમના ઓફિસ સ્ટાફને આ ઘટના માટે સંપૂર્ણપણે જવાબદાર ગણાવ્યા
ખાલિસ્તાની આતંકવાદી નિજ્જરની હત્યામાં ભારત પર આરોપો લગાવ્યા બાદ જસ્ટિન ટ્રુડો હવે પોતાના જ દેશમાં ઘેરાયેલા જોવા મળી રહ્યા છે. સાથે જ તેમના મિત્ર દેશો ભારતને ઘેરવાના પ્રયાસમાં ટ્રુડોને ખુલ્લેઆમ સમર્થન આપી રહ્યા નથી. આવી સ્થિતિમાં હવે ટ્રુડોની વધુ એક ભૂલ તેમને ભારે પડી રહી છે.
ટ્રુડોની સખત નિંદા થઈ
કેનેડામાં વિપક્ષી નેતા પિયર પોઈલીવરે કેનેડાની સંસદમાં ભૂતપૂર્વ નાઝી સૈનિકનું સન્માન કરવા બદલ જસ્ટિન ટ્રુડોની સખત નિંદા કરી છે. તેમણે ટ્રુડોને જાહેરમાં માફી માંગવા પણ કહ્યું છે. પિયરે આ મુદ્દો ઉઠાવ્યા બાદ કેનેડિયન સંસદના સ્પીકરે યહૂદીઓની માફી માંગવી પડી હતી.
સંસદમાં સ્ટેન્ડિંગ ઓવેશન આપ્યું
હકીકતમાં હાલમાં યુક્રેનના રાષ્ટ્રપતિ વોલોડીમીર ઝેલેન્સકી કેનેડાની મુલાકાતે ગયા હતા. તેમની સાથે 14મા વેફેન ગ્રેનેડિયર ડિવિઝનના ભૂતપૂર્વ નાઝી સૈનિક પણ હતા જેઓ બીજા વિશ્વ યુદ્ધ દરમિયાન લડ્યા હતા. જ્યારે ભૂતપૂર્વ સૈનિક ઝેલેન્સકી સાથે કેનેડિયન સંસદમાં પહોંચ્યા ત્યારે તેમને ઉભા થઈને સન્માન આપવામાં આવ્યું હતું. પિયરે આ મુદ્દે જ ટ્રુડોને ઘેરવાનું શરૂ કરી દીધું છે.
મુલાકાત માટે લિબરલ પાર્ટી જવાબદાર
પિયર પોઈલીવરે કહ્યું હતું કે, 'યુક્રેનના રાષ્ટ્રપતિ ઝેલેન્સકીની કેનેડાની મુલાકાત દરમિયાન સંસદમાં ભૂતપૂર્વ નાઝી સૈનિકનું સન્માન કરવામાં આવ્યું હતું. આ કાર્યક્રમનું આયોજન લિબરલ પાર્ટી (ટ્રુડોની પાર્ટી) દ્વારા કરવામાં આવ્યું હતું. આ જસ્ટિન ટ્રુડોની મોટી ભૂલ છે અને ટ્રુડો અને તેમના ઓફિસ સ્ટાફ આ માટે સંપૂર્ણપણે જવાબદાર છે.
ટ્રુડોએ દોષ આપવાનું ટાળવું જોઈએ
'જસ્ટિન ટ્રુડો વ્યક્તિગત રીતે ભૂતપૂર્વ નાઝી સૈનિકને મળ્યા હતા. ત્યાર બાદ તેમની પાર્ટીએ તેમની મુલાકાત દરમિયાન સંસદના નીચલા ગૃહમાં ઝેલેન્સકીનું સન્માન પણ કર્યું હતું. સંસદમાં ભૂતપૂર્વ સૈનિકનું સન્માન કરવામાં આવ્યું તે પહેલાં ટ્રુડો સિવાય કોઈ સાંસદ તેમના ઇતિહાસથી વાકેફ ન હતા. તેથી કેનેડાના પીએમએ વ્યક્તિગત રીતે દરેકની માફી માંગવી જોઈએ. તેણે બીજાઓને દોષ આપવાનું ટાળવું જોઈએ તઓ વારંવાર આવી ભૂલો કરતા રહે છે.
માનવ અધિકાર જૂથે આ મુદ્દો ઉઠાવ્યો
તમને જણાવી દઈએ કે પિયરે કેનેડિયન માનવાધિકાર જૂથ ફ્રેન્ડ્સ ઓફ સિમોન વિસેન્થલ સેન્ટર (FSWC)ની પોસ્ટ શેર કરતા આ વાત કહી હતી. જૂથે તેની પોસ્ટમાં અપીલ કરી હતી કે કેનેડાની સંસદમાં સન્માનિત ભૂતપૂર્વ સૈનિક નાઝી સૈન્ય સાથે સંબંધ ધરાવે છે જેણે બીજા વિશ્વ યુદ્ધ દરમિયાન મોટી સંખ્યામાં યહૂદીઓની હત્યા કરી હતી.
કોઈ સાંસદ પાસે કોઈ માહિતી નહોતી
આ મુદ્દે થયેલા હોબાળા બાદ કેનેડાની સંસદના સ્પીકર એન્થોની રોટાએ કેનેડા અને વિશ્વભરના યહૂદી સમુદાયની માફી માંગી હતી. તેમણે કહ્યું હતું કે, '22 સપ્ટેમ્બરે યુક્રેનના રાષ્ટ્રપતિ ઝેલેન્સકી સંસદ પહોંચ્યા હતા. તેમના સંબોધન દરમિયાન સંસદમાં એક વ્યક્તિ પણ હાજર હતો. મને પાછળથી જાણવા મળ્યું હતું કે તે વ્યક્તિ ભૂતપૂર્વ નાઝી સૈનિક હતો. ત્યાર બાદ મને અહીં આવવાનો અફસોસ થયો હતો. હું સ્પષ્ટ કરવા માંગુ છું કે યુક્રેનિયન પ્રતિનિધિમંડળ અને સાંસદોમાંથી કોઈને પણ આ અંગે કોઈ જાણકારી નહોતી.
