પાકિસ્તાનને ગરીબીમાંથી બહાર કાઢવા 'મનમોહન સિંહ'ની જરૂર, નિષ્ણાતે આવું કેમ કહ્યું?

• પાકિસ્તાનની શાહબાઝ શરીફ સરકાર કોઈ રસ્તો કાઢવામાં અસમર્થ
• આર્થિક સંકટને દૂર કરવા માટે ભારત પાસેથી સૂચનો માંગવામાં આવે: પાકિસ્તાનના અર્થશાસ્ત્રી
• પાક.ને મનમોહન સિંહ જેવા આદરણીય વ્યક્તિની જરૂર છે

પાકિસ્તાન છેલ્લા કેટલાક સપ્તાહોથી ભારે આર્થિક સંકટનો સામનો કરી રહ્યું છે. લોટ, કઠોળ, તેલ અને ગેસના ભાવ આસમાને છે. પેટ્રોલ 350 રૂપિયા પ્રતિ લિટર અને ચોખા 200 રૂપિયા પ્રતિ કિલોના ભાવે વેચાઈ રહ્યું છે. આવી સ્થિતિમાં હવે લાચાર પાકિસ્તાન સરકાર IMF તેમજ તેના ઘણા મિત્ર દેશો પાસે મદદની વિનંતી કરી રહી છે. આવી સ્થિતિમાં પાકિસ્તાનની શાહબાઝ શરીફ સરકાર કોઈ રસ્તો કાઢવામાં અસમર્થ છે. વિપક્ષ સંપૂર્ણપણે આક્રમક બની ગયો છે.

પાક.નિષ્ણાતે ભારતે લીધેલા નિર્ણયોની પ્રશંસા કરી

અહેવાલ મુજબ, પાકિસ્તાનના અર્થશાસ્ત્રીઓ સરકારને સલાહ આપી રહ્યા છે કે, આર્થિક સંકટને દૂર કરવા માટે ભારત પાસેથી સૂચનો માંગવામાં આવે. પાકિસ્તાની-અમેરિકન આર્થિક બાબતોના નિષ્ણાતે ઈસ્લામાબાદને સલાહ આપી છે કે તેણે આર્થિક મામલાઓને ઉકેલવા માટે ભારત જેવા લાયક લોકોની નિમણૂક કરવી જોઈએ. નિષ્ણાતે આર્થિક સંકટ દરમિયાન દાયકાઓ પહેલા ભારતે લીધેલા નિર્ણયોની પ્રશંસા કરી હતી.

પ્રિન્સટન યુનિવર્સિટીના અર્થશાસ્ત્રના પ્રોફેસર આતિફ મિયાંએ બ્રુકિંગ્સ ઈન્સ્ટિટ્યૂશનમાં પેનલ ચર્ચામાં પાકિસ્તાન સરકારને સૂચન કર્યું હતું. આતિફ મિયાંએ કહ્યું હતું કે, 'રાજકીય નેતૃત્વનું સૌથી મહત્વપૂર્ણ કામ મહત્વપૂર્ણ મુદ્દાઓને ઉકેલવા માટે યોગ્ય લોકો અને ટીમની નિમણૂક કરવાનું છે.' તમને જણાવી દઈએ કે આ દિવસોમાં પાકિસ્તાનના નાણામંત્રી ઈશાક દારની આકરી ટીકા થઈ રહી છે.

પાક.ને ડૂબતું બચાવવા મનમોહન સિંહની જરૂર

આતિફ મિયાંએ ચર્ચા દરમિયાન ભારતની જોરદાર પ્રશંસા કરીને કહ્યું હતું કે, 1990ના દાયકામાં ભારત સરકાર સમજી ગઈ હતી કે, તેમને દેશને કાયાકલ્પ કરવા માટે સક્ષમ લોકોની જરૂર છે. તેઓ મનમોહન સિંહને લઈને આવ્યા જેઓ ખૂબ જ કુશળ છે અને આદરણીય વ્યક્તિ છે. આતિફ મિયાંએ કહ્યું હતું કે, 'જો આવા નિર્ણયો લેતી વખતે તમે મેરિટ કરતાં પરિવારને વધુ પ્રાધાન્ય આપશો. જો તમે તમારા ભાઈ, તમારા સાળા, તમારી પુત્રી અને ભત્રીજાને તમામ મહત્વપૂર્ણ પદો પર નિયુક્ત કરો છો તો તમે 22 કરોડ લોકોનો દેશ નહીં ચલાવી શકો.