Mexico: મેક્સિકોના સ્ટીલ પ્લાન્ટમાં ભયાનક વિસ્ફોટ બાદ આગમાં 12 લોકોનાં મોત

મેક્સિકોમાં આવેલા એક સ્ટીલ પ્લાન્ટમાં પ્રચંડ વિસ્ફોટ થયા બાદ તેમાં આગ લાગી હોવાનું સામે આવ્યું છે. આ સ્ટીલ પ્લાન્ટમાં થયેલા વિસ્ફોટમાં 12 લોકોએ જીવ ગુમાવ્યા હતા. આ દુર્ઘટનામાં એક વ્યકિત ઈજાગ્રસ્ત થઈ હતી. મેક્સિકો શહેરથી આશરે 140 કિલોમીટર પૂર્વમાં એક્લોઝટોકમાં સવારે આગ લાગવાની સૂચના મળી હતી. જે બાદ રૅસ્ક્યૂ ટીમ અને ફાયરની ટીમ ઘટનાસ્થળે પહોંચ્યા હતા. 

સ્ટીલ પ્લાન્ટમાં વિસ્ફોટ બાદ આગ ભભૂકી ઉઠી

મળતી માહિતી મુજબ સ્ટીલ પ્લાન્ટમાં વિસ્ફોટના કારણે અન્ય એક વ્યક્તિ પણ ઈજાગ્રસ્ત થયો છે પરંતુ તેની હાલત વિશે માહિતી મળી નથી. એજન્સીએ એક નિવેદનમાં જણાવ્યું હતું કે કામદારો પાસેથી મળેલી પ્રાથમિક માહિતી સૂચવે છે કે વિસ્ફોટ અને આગ પીગળેલા સ્ટીલના પાણીના સંપર્કમાં આવવાને કારણે થઈ હતી. હાલ આગ પર કાબૂ મેળવી લેવામાં આવ્યો છે અને તપાસ ચાલુ છે. મેક્સિકોના ગવર્નર લોરેના કુએલરે પીડિતોના પરિવારો પ્રત્યે સંવેદના વ્યક્ત કરી હતી.

બંધ રહેશે સ્ટીલ પ્લાન્ટ

સ્ટીલ પ્લાન્ટમાં આગ લાગ્યા પછી બચાવ અને ઈમરજન્સી કર્મચારીઓએ જીવતા બચેલા લોકોની શોધખોળ કરવા અને ઘટનાસ્થળે સ્થિતિ જાળવવા ભારે જહેમત હાથ ધરી હતી. સ્ટીલ પ્લાન્ટમાં તપાસ ચાલુ રહેશે ત્યાં સુધી બંધ રાખવાનો તંત્રએ નિર્ણય લીધો હતો.