- બેલ્ટ એન્ડ રોડ ફોરમમાં ભાગ લેવા ગયા હતાં નેપાળનાં નાયબ વડાપ્રધાન
- મેડીકલ રિપોર્ટમાં તીવ્ર મ્યોકાર્ડિયલ ઇન્ફાર્ક્શન હોવાનું થયું નિદાન
- નારાયણ કાજી શ્રેષ્ઠા સોમવારે ચીન જવા માટે રવાના થયા હતા
નેપાળના નાયબ વડા પ્રધાન નારાયણ કાજી શ્રેષ્ઠાને ગુરુવારે ચીનની મુલાકાત દરમિયાન હાર્ટ એટેક આવતા તેમને હોસ્પિટલમાં દાખલ કરવામાં આવ્યા છે. શ્રેષ્ઠા હાલમાં પેકિંગ યુનિયન મેડિકલ કોલેજ હોસ્પિટલના ઇન્ટેન્સિવ કેર યુનિટમાં દાખલ છે. હોસ્પિટલ તંત્રે જાહેરાત કરતાં જણાવ્યું હતું કે શ્રેષ્ઠા સ્થિર સ્થિતિમાં છે.
હોસ્પિટલ તંત્રનું નિવેદન
એક નિવેદન જાહેર કરીને હોસ્પિટલે જણાવ્યું હતું કે "19મી ઓક્ટોબરની વહેલી સવારે નારાયણ કાજી શ્રેષ્ઠે 2 કલાક સુધી છાતીમાં અસ્વસ્થતાની ફરિયાદ સાથે પેકિંગ યુનિયન મેડિકલ કોલેજ હોસ્પિટલના ઇન્ટરનેશનલ મેડિકલ સર્વિસીસના ઇમરજન્સી રૂમમાં રજૂઆત કરી હતી."
અક્યુટ મ્યોકાર્ડિયલ ઇન્ફાર્ક્શન હોવાનું નિદાન
હોસ્પિટલ તંત્રે જણાવ્યું હતું કે તેમને તીવ્ર મ્યોકાર્ડિયલ ઇન્ફાર્ક્શન હોવાનું નિદાન થયું હતું અને તરત જ કેથ લેબમાં લઈ જવામાં આવ્યાં હતાં. ઇમરજન્સી કોરોનરી એન્જીયોગ્રાફીમાં ઓબ્ટ્યુસ માર્જિનલ બ્રાન્ચમાં અવરોધ અને લેફ્ટ એન્ટેરીયર ડીસેન્ડીંગ આર્ટરીમાં નોંધપાત્ર સ્ટેનોસિસ દર્શાવવામાં આવ્યું હતું.
ત્રીજા બેલ્ટ એન્ડ રોડ ફોરમમાં ભાગ લેવા ગયા હતાં
નાયબ વડાપ્રધાન ત્રીજા બેલ્ટ એન્ડ રોડ ફોરમમાં ભાગ લઈ રહ્યા હતા ત્યારે તેમણે છાતીમાં દુખાવાની ફરિયાદ કરી હતી. હોસ્પિટલના જણાવ્યા મુજબ એક સ્ટેન્ટ મૂકવામાં આવ્યો છે અને તેમની સ્થિતિ સ્થિર છે. "એક સ્ટેન્ટને તાત્કાલિક ઓબ્ટ્યુઝ માર્જિનલ બ્રાન્ચમાં મૂકવામાં આવ્યું હતું. જેનાથી તેમની છાતીમાં દુખાવો ઓછો થયો હતો. શ્રેષ્ઠા હાલમાં ચાલુ દેખરેખ અને સારવાર માટે મેડિકલ ICU માં છે.
ચીની અધિકારીઓ સાથેની બેઠક રદ
નેપાળનાં નાયબ વડા પ્રધાન ગુરુવારે ચીની અધિકારીઓ સાથે બેઠકના રાઉન્ડ યોજવાના હતા જે હવે રદ કરવામાં આવ્યા છે. આ અઠવાડિયે સોમવારે શ્રેષ્ઠા ચીન જવા રવાના થયા હતા.
