- ઈઝરાયેલના વડાપ્રધાને રવિવારે હમાસના આતંકવાદીઓને ચેતવણી આપી
- હું ગાઝાના રહેવાસીઓને કહેવા માંગુ છું કે તે જગ્યાઓ છોડી દે:નેતન્યાહુ
- ગાઝા શહેરમાં તેમના છુપાયેલા સ્થળો કાટમાળમાં ફેરવાઈ જશે
ઈઝરાયેલ અને પેલેસ્ટાઈન વચ્ચે શનિવારથી શરૂ થયેલા યુદ્ધ બાદ ઈઝરાયેલના વડાપ્રધાન બેન્જામિન નેતન્યાહુએ રવિવારે હમાસના આતંકવાદીઓને ચેતવણી આપી હતી કે અમે તેમના તમામ ઠેકાણાઓને કાટમાળમાં ફેરવી દઈશું.
તમને જણાવી દઈએ કે શનિવારે સવારે હમાસના આતંકવાદીઓ અલગ-અલગ રીતે ઈઝરાયેલમાં ઘૂસ્યા હતા અને રહેણાંક વિસ્તારોમાં હુમલો કર્યો હતો. આ દરમિયાન 20 મિનિટમાં ગાઝા પટ્ટીથી ઈઝરાયેલ પર 5000 રોકેટ છોડવામાં આવ્યા હતા. ત્યાર બાદ ઈઝરાયેલ સરકારે હમાસ વિરુદ્ધ યુદ્ધની જાહેરાત કરી હતી.
ગાઝા કાટમાળમાં ફેરવાશે
વડા પ્રધાન નેતન્યાહુએ હમાસના આતંકવાદીઓને ઇઝરાયેલી સૈન્યની કાર્યવાહી સામે ચેતવણી આપતા રવિવારે કહ્યું હતું કે ગાઝા શહેરમાં તેમના છુપાયેલા સ્થળો કાટમાળમાં ફેરવાઈ જશે. તેમણે ગાઝાના રહેવાસીઓને ઈઝરાયલી દળોની કાર્યવાહી અંગે ચેતવણી આપી અને સલામત સ્થળે ખસી જવા કહ્યું હતું.
નેતન્યાહુએ પોતાના ટ્વિટમાં કહ્યું હતું કે, અમે તે તમામ જગ્યાઓને કાટમાળમાં ફેરવી દઈશું જ્યાં હમાસ તૈનાત છે અને છુપાયેલ છે. 'હું ગાઝાના રહેવાસીઓને કહેવા માંગુ છું કે તે જગ્યાઓ છોડી દે કારણ કે અમે દરેક જગ્યાએ બળપૂર્વક કાર્યવાહી કરીશું.' નેતન્યાહુની ચેતવણી ઇઝરાયેલમાં યુદ્ધની સ્થિતિ જાહેર કર્યાના એક દિવસ પછી આવી હતી.
શનિવારે ઈઝરાયેલ પર થયેલા હુમલા બાદ પણ વડાપ્રધાન નેતન્યાહુએ આગળ આવીને નિવેદન આપ્યું હતું. તેમણે કહ્યું હતું કે, 'અમે યુદ્ધમાં છીએ, ઓપરેશનમાં નથી. હમાસે ઈઝરાયેલ રાજ્ય અને તેના નાગરિકો સામે ઘાતક હુમલો કર્યો છે. મેં પહેલા ઘૂસણખોરી કરનારા આતંકવાદીઓની વસાહતોને સાફ કરવાનો અને મોટા પાયે હથિયારો એકત્ર કરવાનો આદેશ આપ્યો હતો.' દુશ્મનને એવી કિંમત ચૂકવવી પડશે જેના વિશે તેઓએ ક્યારેય વિચાર્યું પણ નહીં હોય.'
અત્યાર સુધીમાં 500થી વધુ લોકોના મોત થયા
તમને જણાવી દઈએ કે, ગાઝા પટ્ટીમાંથી હમાસના આતંકવાદીઓના અચાનક હુમલાને કારણે ઈઝરાયેલમાં ઓછામાં ઓછા 300 લોકો માર્યા ગયા છે અને 3000થી વધુ લોકો ઘાયલ થયા છે. ઇઝરાયલી મીડિયાએ અહેવાલ આપ્યો છે કે દક્ષિણ ઇઝરાયેલના ઘણા ભાગોમાં રોકેટ સાયરન સતત વાગતા હતા. ગાઝા પટ્ટીની નજીકના વિસ્તારો જેમ કે સેડેરોટ, કિબુટ્ઝ નીર એમ, યાડ મોર્ડેચાઈ અને નેટીવ હસારાના લોકોએ હવાઈ હુમલાની ચેતવણીઓ સાંભળી હતી.
હમાસની પ્રતિક્રિયા પણ સામે આવી
તે જ સમયે, વડા પ્રધાન નેતન્યાહૂના નિવેદન પર હમાસ તરફથી પણ પ્રતિક્રિયા આવી છે. હમાસની સશસ્ત્ર પાંખના પ્રવક્તાએ રવિવારની મધ્યરાત્રિ પછી એક નિવેદન બહાર પાડ્યું હતું કે શનિવારના ઇઝરાયેલી નગરો પરના હુમલામાં હમાસ દ્વારા કબજે કરવામાં આવેલા ઇઝરાયેલીઓની કુલ સંખ્યા ડઝનેક કરતાં ઘણી ગણી વધારે હતી. પ્રવક્તાએ કહ્યું હતું કે બંધક બનાવવામાં આવેલા લોકો ગાઝા પટ્ટીના તમામ વિસ્તારોમાં ફેલાયેલા છે.
