રાષ્ટ્રપતિએ સંકેત આપ્યો કે જો સમર્થન પૂરું પાડવામાં નહીં આવે તો અમેરિકા NATOમાંથી દૂર થઇ શકે છે.
ટ્રમ્પની NATO સાથે નારાજગી
NATO સેક્રેટરી જનરલ માર્ક રુટ સાથે બંધ બારણે બેઠક બાદ ડોનાલ્ડ ટ્રમ્પે ફરીથી લશ્કરી જોડાણની ટીકા કરતા કહ્યું કે, જરૂરિયાતના સમયે NATO અમેરિકા સાથે નથી. બેઠક પહેલા ટ્રમ્પે સંકેત આપ્યો હતો કે જો ઈરાન યુદ્ધ દરમિયાન સમર્થન ન મળે તો અમેરિકા NATOમાંથી ખસી જવાનો વિચાર કરી શકે છે. બેઠક પછી, તેમણે સોશિયલ મીડિયા પર બોલ્ડ અક્ષરોમાં લખ્યું કે, જ્યારે અમને જરૂર હતી ત્યારે NATO અમારી સાથે ન હતું. અને જ્યારે અમને ફરીથી જરૂર પડશે ત્યારે તે અમારી સાથે રહેશે નહીં.
બંધ બારણે બેઠક બની ચર્ચાસ્પદ
પ્રેસ સેક્રેટરી કેરોલિન લેવિટે જણાવ્યું હતું કે ટ્રમ્પ NATOમાંથી ખસી જવાના મુદ્દા પર ચર્ચા કરી રહ્યા હતા. ટ્રમ્પ અને રુટ વચ્ચેની આ મુલાકાત એવા સમયે થઈ હતી જ્યારે અમેરિકા અને ઈરાન બે અઠવાડિયાના યુદ્ધવિરામ માટે સંમત થયા છે. જેનાથી હોર્મુઝ સ્ટ્રેટને ફરીથી ખોલવાનો માર્ગ મોકળો થયો છે. યુએસ કોંગ્રેસે 2023 માં એક કાયદો પસાર કર્યો હતો જે કોઈપણ રાષ્ટ્રપતિને કોંગ્રેસની મંજૂરી વિના નાટોમાંથી ખસી જવા પર પ્રતિબંધ મૂકે છે.
NATOની સ્થાપના ક્યારે થઇ ?
NATOની સ્થાપના 1949માં યુરોપના રક્ષણ માટે કરવામાં આવી હતી અને તેના 32 સભ્ય દેશો વચ્ચે સામૂહિક સંરક્ષણ કરાર છે. ઈરાન યુદ્ધ દરમિયાન, ટ્રમ્પે નાટો દેશો પર હોર્મુઝ સ્ટ્રેટને સુરક્ષિત કરવામાં અમેરિકાને ટેકો આપવામાં નિષ્ફળ જવાનો આરોપ મૂક્યો હતો. તેમણે કહ્યું હતું કે આ મહત્વપૂર્ણ માર્ગની સુરક્ષા તે દેશોની જવાબદારી હતી જે તેના દ્વારા તેલ પર નિર્ભર છે. અહેવાલો અનુસાર, સ્પેન અને ફ્રાન્સ જેવા કેટલાક નાટો સભ્ય દેશોએ ઈરાન યુદ્ધ દરમિયાન અમેરિકાને તેમના હવાઈ ક્ષેત્ર અથવા લશ્કરી થાણાઓના ઉપયોગ પર પ્રતિબંધો લાદ્યા હતા.
NATOના સમર્થનની હતી આશા
ટ્રમ્પે NATO સભ્ય ડેનમાર્કના સ્વાયત્ત પ્રદેશ ગ્રીનલેન્ડ પર પણ નારાજગી વ્યક્ત કરી હતી. તેમણે આ વર્ષની શરૂઆતમાં ગ્રીનલેન્ડ પર યુએસ નિયંત્રણની હાકલ કરી હતી, પરંતુ બાદમાં તેઓ પાછા હટી ગયા. દરમિયાન, રુટ્ટે સાથેની એક અલગ બેઠકમાં, યુએસ સેક્રેટરી ઓફ સ્ટેટ માર્કો રુબિયોએ ઈરાન યુદ્ધ, રશિયા-યુક્રેન સંઘર્ષ અને નાટો સહયોગ વધારવા અંગે ચર્ચા કરી. સેનેટના વરિષ્ઠ નેતા મિચ મેકકોનેલે NATOના સમર્થનમાં એક નિવેદન બહાર પાડ્યું, જેમાં નોંધ્યું કે 11 સપ્ટેમ્બર, 2001ના હુમલા પછી NATO સાથીઓએ અમેરિકા સાથે અફઘાનિસ્તાન અને ઇરાકમાં લડ્યા હતા. તેમણે ટ્રમ્પને સાથી દેશો સાથેના સંબંધો માટે સ્પષ્ટ અને સંતુલિત અભિગમ અપનાવવા વિનંતી કરી હતી.
આ પણ વાંચોઃ ભારતમાં વહેતી આ નદી લોકોને બનાવે છે ધનવાન, 'સુવર્ણરેખા' નામે છે પ્રખ્યાત