પાકિસ્તાન સાથે સતત વણસી રહેલા સંબંધો વચ્ચે અફઘાનિસ્તાને ભારત સાથે પોતાના ઐતિહાસિક અને સાંસ્કૃતિક સંબંધોને વધુ મજબૂત કરવાના સ્પષ્ટ સંકેતો આપ્યા છે. પાકિસ્તાન સાથે સરહદી વિવાદ અને તણાવ ચરમસીમાએ છે, ત્યારે અફઘાનિસ્તાનના કૃષિ, સિંચાઈ અને પશુપાલન મંત્રી મૌલવી અતાઉલ્લાહ ઓમારી પ્રથમ વખત સત્તાવાર રીતે ભારતની મુલાકાતે પહોંચ્યા છે. નવી દિલ્હીમાં બંને દેશો વચ્ચેના સંબંધોની ખુલ્લેઆમ પ્રશંસા કરતા તેમણે એક એવું નિવેદન આપ્યું છે જે પાકિસ્તાનની ઊંઘ હરામ કરી દેશે.
મૌલવી અતાઉલ્લાહ ઓમારીએ ભારપૂર્વક જણાવ્યું કે, "ભારત અને અફઘાનિસ્તાનનું DNA એક જ છે. ભારતમાં પગ મૂકતાની સાથે જ મને એવું લાગ્યું કે જાણે હું મારા પોતાના જ દેશમાં અને મારા પોતાના લોકોની વચ્ચે છું."
ભારતની મહેમાનગતિએ જીત્યું દિલ
નવી દિલ્હીમાં વિદેશ મંત્રાલય (MEA) ના સહયોગથી આયોજિત 'ઈન્ડિયા-અફઘાનિસ્તાન ટ્રેડ ઓપોર્ચ્યુનિટીઝ ઈન્ડસ્ટ્રી ઈન્ટરેક્ટિવ સેશન'ને સંબોધિત કરતા અફઘાન મંત્રી ભાવુક દેખાયા હતા. તેમણે ઉમેર્યું કે, "ભારત આવ્યાના પહેલા દિવસથી જ ભારત સરકાર, વિદેશ મંત્રાલય અને અહીંના લોકો તરફથી જે ઉષ્માભર્યું સ્વાગત અને સન્માન મળ્યું છે, તેણે મારું દિલ જીતી લીધું છે. અમારો સંબંધ માત્ર કૂટનીતિ પૂરતો મર્યાદિત નથી, પરંતુ તે સદીઓ જૂના સહિયારા ઇતિહાસ, સંસ્કૃતિ અને સભ્યતા પર ટકેલો છે."
આધુનિક ટેકનોલોજી માટે ભારત તરફ આશાની કિરણ
અફઘાન મંત્રીએ જણાવ્યું કે ભારત તરફથી મળેલો આ આદર અફઘાનિસ્તાનના લોકો માટે વધુ સારા ભવિષ્યની નવી આશા લઈને આવ્યો છે. તેમણે કહ્યું, "અમારો અંદાજે 80 ટકા સમાજ કૃષિ, સિંચાઈ અને પશુપાલન પર નિર્ભર છે. હવે સમય આવી ગયો છે કે આ ક્ષેત્રોને આધુનિક ટેકનોલોજી સાથે જોડવામાં આવે અને ભારત આ દિશામાં અમારો સૌથી મહત્વપૂર્ણ ભાગીદાર બની શકે છે." ઓમારીએ ભારતીય ઉદ્યોગ જગતને અફઘાનિસ્તાનમાં કૃષિ તકનીક, ફૂડ પ્રોસેસિંગ, સિંચાઈ અને ક્ષમતા નિર્માણ (કેપેસિટી બિલ્ડિંગ) ના ક્ષેત્રોમાં રોકાણ અને સહયોગ કરવા માટે ખુલ્લું આમંત્રણ આપ્યું છે.
પ્રાદેશિક રાજકારણમાં મોટો ઉલટફેર
કાબુલ અને ઈસ્લામાબાદ વચ્ચે સરહદ વિવાદ, આતંકવાદ અને સુરક્ષા મુદ્દાઓને લઈને તણાવ ચરમસીમાએ છે તેવા સમયે અફઘાન મંત્રીનો આ ભારત પ્રવાસ રાજદ્વારી રીતે ઘણો મહત્વનો માનવામાં આવે છે. આ જ અઠવાડિયે નવી દિલ્હીમાં ભારત-અફઘાનિસ્તાન સંયુક્ત સમિતિ (Joint Committee) ની ચોથી બેઠક પણ યોજાઈ હતી. વિદેશ મંત્રાલયના જણાવ્યા અનુસાર, આ બેઠકમાં માનવતાવાદી સહાય, વિકાસ પરિયોજનાઓ, ખાદ્ય સુરક્ષા, આરોગ્ય સેવાઓ, શિક્ષણ, રમતગમત અને આર્થિક સહયોગને વધુ મજબૂત કરવા પર બંને દેશો સહમત થયા છે. અફઘાનિસ્તાનની ભારત તરફ વધતી નિકટતા દક્ષિણ એશિયાના રાજકારણમાં પાકિસ્તાનને એકલું પાડી દેશે તેમાં કોઈ શંકા નથી.
