કેનેડા જઈને અભ્યાસ કરવાનું સપનું જોનારા અને ત્યાં સ્થાયી થયેલા હજારો ભારતીય વિદ્યાર્થીઓ માટે ચિંતાજનક સમાચાર સામે આવ્યા છે. કેનેડિયન ઇમિગ્રેશન વિભાગે (IRCC) અચાનક આંતરરાષ્ટ્રીય વિદ્યાર્થીઓ માટે સ્ક્રીનીંગ પ્રક્રિયા અત્યંત કડક બનાવી દીધી છે. સરકાર દ્વારા સેંકડો વિદ્યાર્થીઓને નોટિસ પાઠવવામાં આવી છે, જેમાં તેમને તેમની શૈક્ષણિક વિગતો અને સ્ટડી પરમિટની યોગ્યતા સાબિત કરવા માટે માત્ર 21 દિવસની સમયમર્યાદા આપવામાં આવી છે. જો વિદ્યાર્થીઓ આ સમયગાળામાં જરૂરી દસ્તાવેજો રજૂ કરવામાં નિષ્ફળ જશે, તો તેમનો ટેમ્પરરી રેસિડેન્ટ સ્ટેટસ (કામચલાઉ નિવાસી દરજ્જો) રદ થઈ શકે છે અને તેમને દેશ છોડવો પડી શકે છે.
શા માટે લેવાયો આ નિર્ણય?
આ આદેશ પાછળનું મુખ્ય કારણ કેનેડાના ઓડિટર જનરલ કરેન હોગનનો તાજેતરનો અહેવાલ છે. આ અહેવાલમાં 'ઇન્ટરનેશનલ સ્ટુડન્ટ પ્રોગ્રામ' માં ચાલી રહેલી વ્યાપક ગેરરીતિઓ અને દસ્તાવેજોમાં થતી છેતરપિંડી અંગે ગંભીર સવાલો ઉઠાવવામાં આવ્યા હતા. કેનેડાની સંસદમાં પણ આ મુદ્દે ચર્ચા થઈ હતી કે ઘણા વિદ્યાર્થીઓ નકલી દસ્તાવેજો અથવા ખોટી માહિતીના આધારે સ્ટડી પરમિટ મેળવી રહ્યા છે. આ કાર્યક્રમની વિશ્વસનીયતા જાળવી રાખવા માટે સરકારે હવે આકરાં પગલાં ભરવાનું શરૂ કર્યું છે.