ફેશન દિગ્ગજ જ્યોર્જિયો અરમાનીનું નિધન થયું છે. અરમાનીની ફેશન બ્રાન્ડ આખી દુનિયામાં પ્રખ્યાત છે. મિલાનના રેડી-ટુ-વેર દિગ્ગજ અરમાની ફેશન ઉદ્યોગમાં ક્રાંતિ લાવવા માટે જાણીતા છે. તેમણે 91 વર્ષની વયે અંતિમ શ્વાસ લીધા છે. મળતી માહિતી મુજબ તેમનું ઘરે અવસાન થયું છે. તેઓ લાંબા સમયથી બીમારીથી પીડાતા હતા. ઈટાલિયન શૈલીના આ દિગ્ગજ ડિઝાઈનરે તેમને સમગ્ર વિશ્વમાં ખ્યાતિ અપાવી છે. તેમની કંપનીનું વાર્ષિક ટર્નઓવર 23,000 કરોડ રૂપિયા છે. અરમાની ગ્રુપે તેમના મૃત્યુ પર શોક વ્યક્ત કર્યો છે.
1934માં મિલાનમાં થયો હતો જન્મ
એવું કહેવામાં આવી રહ્યું છે કે તેઓ છેલ્લા કેટલાક સમયથી ખૂબ બીમાર હતા. આ કારણે તેઓ જૂનમાં યોજાયેલા મિલાન મેન્સ ફેશન વીકમાં ભાગ લઈ શક્યા ન હતા. ખાસ વાત એ છે કે તેમના કરિયરમાં આ પહેલી વાર હતું જ્યારે તેમણે તેમના કોઈપણ કેટવોક કાર્યક્રમમાં ભાગ લીધો ન હતો. તેઓ 'રે જ્યોર્જિયો' અને કિંગ જ્યોર્જિયોના નામથી પ્રખ્યાત હતા. અરમાની તેમના કલેક્શન અને ફેશન શોના દરેક પાસામાં, જાહેરાતોથી લઈને મોડેલોના વાળ સેટ કરવા સુધીની નાની નાની વાત પર પણ ધ્યાન આપવા માટે જાણીતા હતા. ઈટાલિયન ફેશન ડિઝાઇનર અને અબજોપતિ વિશ્વના સૌથી ધનિક LGBT વ્યક્તિ તરીકે જાણીતા હતા. 11 જુલાઈ, 1934ના રોજ જન્મેલા, અરમાનીએ 1975માં પોતાની કંપની બનાવી. આ પહેલા તેઓ જાણીતી ફેશન કંપની સેરુટી માટે કામ કરતા હતા. ફેશનની સાથે આ કંપની સંગીત, રમતગમત અને લક્ઝરી હોટલ માટે પણ જાણીતી છે. તેમને રેડ કાર્પેટ ફેશનના દિગ્ગજ પણ માનવામાં આવે છે.
