દુનિયાની અગ્રણી ટેક કંપની Nvidiaના CEO જેન્સન હુઆંગ પોતાના અંગત જીવનને લઈને ચર્ચામાં છે. તેમણે પત્ની લોરી હુઆંગ સાથે વિશ્વાસઘાત કર્યો હોવાની વાત સ્વીકારી છે. હવે લોકો જાણવા માગે છે કે લોરી હુઆંગ કોણ છે, તેમની કારકિર્દી શું છે અને Nvidiaના આ મોટા વ્યાવસાયિક પરિવારનું જીવન કેવું છે.
તેમણે કંપનીના કર્મચારીઓને મોકલેલા એક સંદેશમાં પોતાની ભૂલ સ્વીકારી હતી અને પરિવારની માફી માગી હતી. આ સમાચાર સામે આવ્યા બાદ લોકો જાણવા માગે છે કે આખરે લોરી હુઆંગ કોણ છે અને તેઓ શું કરે છે? શું તેમની ઓળખ માત્ર Nvidiaના CEOની પત્ની પૂરતી જ છે કે પછી તેમની પોતાની પણ એક અલગ ઓળખ છે? ચાલો જાણીએ.
કોલેજમાં થઈ હતી પ્રથમ મુલાકાત
લોરી હુઆંગનું પહેલાંનું નામ લોરી મિલ્સ હતું. તેમની મુલાકાત જેન્સન હુઆંગ સાથે અમેરિકાની ઓરેગોન સ્ટેટ યુનિવર્સિટીમાં થઈ હતી. તે સમયે બંને કોલેજમાં અભ્યાસ કરતા હતા. જેન્સનની ઉંમર 17 વર્ષ હતી, જ્યારે લોરી 19 વર્ષની હતી.
જેન્સને એક વખત જણાવ્યું હતું કે લોરી સાથે મિત્રતા કરવા માટે તેમણે તેમને સાથે અભ્યાસ કરવાની ઓફર આપી હતી. ત્યાર બાદ બંનેની મુલાકાતો વધવા લાગી અને ધીમે-ધીમે તેઓ એકબીજાની નજીક આવ્યાં. લગભગ 5 વર્ષ સુધી એકબીજાને ઓળખ્યા બાદ બંનેએ 1985માં લગ્ન કરી લીધાં.
લોરી હુઆંગ શું કરે છે?
લોરી હુઆંગ માત્ર Nvidiaના CEOનાં પત્ની બનીને નથી રહ્યાં. ટેકનોલોજીના ક્ષેત્રમાં તેમની પોતાની પણ કારકિર્દી રહી છે. તેમણે વિશ્વની જાણીતી ટેક કંપની હેવલેટ-પેકાર્ડ એટલે કે HPમાં કામ કર્યું હતું. અહીં તેઓ માઇક્રોચિપ ડિઝાઇનર તરીકે કાર્યરત હતાં.
આ ઉપરાંત લોરી એક ચેરિટી ફાઉન્ડેશન પણ સંભાળે છે. આ ફાઉન્ડેશન દ્વારા બાળકોના શિક્ષણ, સારવાર અને સંશોધન સંબંધિત કાર્યોમાં મદદ કરવામાં આવે છે. અહેવાલો મુજબ, આ ફાઉન્ડેશનની સંપત્તિ આશરે 9 અબજ ડોલર છે. જોકે, લોરી Nvidiaમાં કોઈ સત્તાવાર હોદ્દો ધરાવતાં નથી.
Nvidia સાથે જોડાયેલાં છે બંને સંતાનો
જેન્સન અને લોરીને બે સંતાનો છે. તેમની દીકરીનું નામ મેડિસન અને દીકરાનું નામ સ્પેન્સર છે. ખાસ વાત એ છે કે બંને Nvidiaમાં કામ કરે છે. મેડિસન કંપનીમાં સિનિયર ડિરેક્ટર છે, જ્યારે સ્પેન્સર રોબોટિક્સ અને સિમ્યુલેશન સંબંધિત કામ સંભાળે છે.
હાલમાં જેન્સન હુઆંગના અંગત જીવનની ચર્ચા થઈ રહી છે. એક તરફ તેમની પત્ની લોરીની કારકિર્દી વિશે જાણવાની લોકોમાં ઉત્સુકતા છે, તો બીજી તરફ 40 વર્ષ જૂના લગ્નજીવનમાં વિશ્વાસઘાતની કબૂલાતે પણ લોકોનું ધ્યાન ખેંચ્યું છે.
