ઓસ્ટ્રેલિયાની સૌથી મોટી એરલાઇન અને રાષ્ટ્રીય કેરિયર, ક્વાન્ટાસે ઓક્ટોબરના અંતમાં દિલ્હી અને મેલબોર્ન વચ્ચે નોન-સ્ટોપ ફ્લાઇટ્સ ફરી શરૂ કરવાની જાહેરાત કરી છે. એરલાઈને સોમવારે એક સત્તાવાર પ્રકાશનમાં આ જાહેરાત કરી છે. જાહેરાત મુજબ તે દર અઠવાડિયે 3 સેવાઓનું સંચાલન કરશે, જે 27 ઓક્ટોબર 2025થી શરૂ થશે અને 28 માર્ચ 2026 સુધી ચાલુ રહેશે. ફ્લાઈટ સેવા જૂન પછી ફરી શરૂ કરવામાં આવી છે.
ક્રિકેટ પ્રેમીઓને સીધી ફ્લાઈટ મળશે
ભારત અને ઓસ્ટ્રેલિયા વચ્ચે મુસાફરીની માગને ધ્યાનમાં રાખીને આ સમયપત્રક મુસાફરોને ઘણો ફાયદો કરશે. તે ભારતીય અને વિક્ટોરિયન રાજધાની વચ્ચે મુસાફરી કરતા ક્વાન્ટાસ ગ્રાહકો માટે નોન-સ્ટોપ વિકલ્પ પ્રદાન કરશે. મેલબોર્ન તેના સાંસ્કૃતિક આકર્ષણો, મનોહર દૃશ્યો અને રસ્તાના નજારા માટે પ્રખ્યાત છે. 31 ઓક્ટોબર, 2025ના રોજ મેલબોર્ન ક્રિકેટ ગ્રાઉન્ડ પર ઓસ્ટ્રેલિયા અને ભારત વચ્ચે આગામી T20 મેચને ધ્યાનમાં રાખીને નવી ફ્લાઈટ્સ ક્રિકેટ ફેન્સને પણ નોંધપાત્ર રાહત આપશે. એરલાઈને જણાવ્યું હતું કે પ્રથમ ફ્લાઈટ 28 ઓક્ટોબરે વિક્ટોરિયન રાજધાનીમાં ઉતરશે. એરલાઈન ભારતને તેના આંતરરાષ્ટ્રીય નેટવર્કમાં સૌથી ઝડપથી વિકસતા અને સૌથી મહત્વપૂર્ણ સ્થળોમાંના એક તરીકે ઓળખે છે. દિલ્હી-મેલબોર્ન સેવા ફરી શરૂ કરવા ઉપરાંત ક્વાન્ટાસે બેંગલુરુથી સિડની સુધીની નોન-સ્ટોપ ફ્લાઈટ્સ અને ઈન્ડિગો-ક્વાન્ટાસ ડોમેસ્ટિક નેટવર્કમાં વ્યાપક જોડાણોની પણ જાહેરાત કરી છે.
એરબસ A330-200 વિમાન ઉડાન ભરશે
ફ્લાઈટ્સ ક્વાન્ટાસના એરબસ A330-200 એરક્રાફ્ટ દ્વારા સંચાલિત કરવામાં આવશે, જેમાં 1-2-1 લેઆઉટમાં 26 લાઇ-ફ્લેટ બિઝનેસ ક્લાસ સ્યુટ્સ અને 2-4-2 કન્ફિગરેશનમાં 204 ઈકોનોમી સીટ્સ હશે. આ નવું કનેક્શન દિલ્હી અને મેલબોર્ન વચ્ચે દર અઠવાડિયે 1,300થી વધુ બેઠકો ઉમેરશે અને પીક ટ્રાવેલ સમય દરમિયાન 30,000થી વધુ બેઠકો ઉમેરશે. ક્વાન્ટાસ સાથે ઓસ્ટ્રેલિયાની ટિકિટ બુક કરાવતા ગ્રાહકો ક્વાન્ટાસ એક્સપ્લોરર સાથે 100થી વધુ રૂટ પર ડિસ્કાઉન્ટેડ ડોમેસ્ટિક એક્સ્ટ્રા ભાડાનો લાભ પણ લઈ શકે છે, જેનાથી તેઓ સિડની, ગોલ્ડ કોસ્ટ, કેર્ન્સ અથવા તાસ્માનિયા જેવા લોકપ્રિય સ્થળોએ વધુ મુસાફરી કરી શકશે. ક્વાન્ટાસના તમામ આંતરરાષ્ટ્રીય ભાડામાં ચેક્ડ બેગેજ, ફૂડ અને બેવરેજીસ અને ઇન-ફ્લાઇટ મનોરંજનનો સમાવેશ થાય છે.
ક્વાન્ટાસ ઈન્ટરનેશનલના સીઈઓએ શું કહ્યું?
ક્વાન્ટાસ ઈન્ટરનેશનલના સીઈઓ કેમ વોલેસે જણાવ્યું હતું કે "અમને વ્યસ્ત મુસાફરીની મોસમ માટે દિલ્હી અને મેલબોર્ન વચ્ચે અમારી નોન-સ્ટોપ સેવા સમયસર ફરી શરૂ કરવાનો આનંદ છે. સીધી ફ્લાઇટ્સ ઓસ્ટ્રેલિયાના મુસાફરીના સમયમાં નોંધપાત્ર ઘટાડો કરે છે અને આ નવી ફ્લાઈટ્સ મેલબોર્નમાં ક્રિકેટ ઈવેન્ટ્સમાં હાજરી આપતા ભારતીય ચાહકો માટે આદર્શ છે, જેમાં ઓક્ટોબરના અંતમાં T20 સિરિઝ, વર્ષના અંતમાં એશિઝ અને બિગ બેશ લીગનો સમાવેશ થાય છે." તેમણે વધુમાં ઉમેર્યું હતું કે, "ભારતમાં અમારી વધતી હાજરીને ટેકો આપવા માટે અમે અમારા ભારતીય ગ્રાહકોને સેવા આપવા અને સિડની અને મેલબોર્નની અમારી નોન-સ્ટોપ ફ્લાઇટ્સને પ્રોત્સાહન આપવા માટે દિલ્હી, મુંબઈ અને બેંગલુરુમાં નવી ઓફિસો ખોલી છે."
