રશિયા અને અમેરિકા વચ્ચેનો વિવાદ ખત્મ થવાનું નામ નથી લઇ રહ્યો. યુક્રેન સાથે રશિયાના કરારથી શરૂ થયેલો આ મુદ્દો હવે આગળ વધી ગયો છે. જ્યારે અમેરિકા રશિયા નજીક પોતાની પરમાણુ સબમરીન તૈનાત કરી રહ્યું છે. ત્યારે રશિયા અને ચીન સંયુક્ત લશ્કરી કવાયત કરી રહ્યા છે. દરમિયાન, ચીને અમેરિકાને સ્પષ્ટ જવાબ આપ્યો છે કે તે તેના ટેરિફ ધમકીથી ડરશે નહીં.

ટેરિફ યુદ્ધમાં કોઈ વિજેતા નથીઃ ચીન

ચીને અમેરિકાના દબાણને સંપૂર્ણપણે નકારી કાઢ્યું છે અને કહ્યું છે કે તે તેના સાર્વભૌમત્વ, સુરક્ષા અને વિકાસ હિતોનું રક્ષણ કરશે. સ્ટોકહોમમાં બે દિવસની વેપાર મંત્રણા પછી, ચીનના વિદેશ મંત્રાલયે ઈ-મેલ પર સ્પષ્ટ સંદેશ આપ્યો છે કે, ચીન હંમેશા તેનો ઉર્જા પુરવઠો સુનિશ્ચિત કરશે, એવી રીતે કે જે આપણા રાષ્ટ્રીય હિતોને પ્રાથમિકતા આપે' ચીને ભાર મૂક્યો છે કે બળજબરી, દબાણ અથવા બ્લેકમેલ કોઈપણ સમસ્યાનું નિરાકરણ લાવી શકતું નથી. તેણે એમ પણ કહ્યું છે કે ટેરિફ યુદ્ધમાં કોઈ વિજેતા નથી અને તે તેના સાર્વભૌમત્વ, સુરક્ષા અને વિકાસ હિતોનું રક્ષણ કરશે.

લલચાવતા સોદાને નકાર્યા

અગાઉ, યુએસ નાણામંત્રી સ્કોટ બેસન્ટે પણ કહ્યું હતું કે જ્યારે રશિયા પાસેથી તેલ ખરીદવાની વાત આવે છે, ત્યારે ચીન તેની સાર્વભૌમત્વને ખૂબ ગંભીરતાથી લે છે. અમેરિકાએ રશિયા પાસેથી તેલ ખરીદવાના કિસ્સામાં 100% ટેરિફ લગાવવાની ધમકી આપી હતી. પરંતુ એમ પણ કહ્યું હતું કે તે આશા રાખે છે કે ચીન સાથે સોદો થઈ શકે છે. જો તે રશિયા અને ઈરાન સાથે વેપાર બંધ કરે તો તેઓ ચીનને વ્યવસાયિક સોદા માટે પણ લલચાવી રહ્યા છે. વાસ્તવમાં, ઈરાન અને રશિયાના અર્થતંત્રનો એક મુખ્ય સ્ત્રોત તેલ વેપાર છે, જેને અમેરિકા રોકવા માંગે છે જેથી રશિયા-યુક્રેન અને ઈઝરાયલ-ઈરાન વચ્ચેની લડાઈ બંધ થાય. ઘણા દેશો અમેરિકાના ટેરિફ યુદ્ધના દાયરામાં આવી ગયા છે.