કેનેડાના આલ્બર્ટા પ્રાંતમાં આવેલા એક મહત્વપૂર્ણ લશ્કરી મથક પર ભીષણ આગ ફાટી નીકળવાની અત્યંત કરુણ અને હૃદયદ્રાવક ઘટના બની છે. કેનેડિયન સંરક્ષણ પ્રધાન ડેવિડ મેકગિન્ટીએ પુષ્ટિ કરી છે કે આ ભયાનક અકસ્માતમાં અનેક લોકોએ પોતાના પ્રાણ ગુમાવ્યા છે અને અનેક લોકો ગંભીર રીતે ઘાયલ થયા છે, જોકે તંત્ર દ્વારા હજુ સુધી સત્તાવાર મૃત્યુઆંક જાહેર કરવામાં આવ્યો નથી. આગના ચોક્કસ કારણો હજુ અકબંધ છે અને રોયલ કેનેડિયન માઉન્ટેડ પોલીસ (RCMP) દ્વારા આ મામલે સઘન તપાસ શરૂ કરવામાં આવી છે.
આલ્બર્ટા લશ્કરી મથકમાં ભીષણ આગ
મળતી માહિતી મુજબ, એડમોન્ટનથી આશરે 180 કિલોમીટર દૂર આવેલું વેઇનરાઇટ લશ્કરી બેઝ કેનેડાના સૌથી વ્યસ્ત અને મુખ્ય સૈન્ય તાલીમ કેન્દ્રોમાં ગણાય છે. અહીં સૈનિકોને લડાઈ અને યુદ્ધ જેવી કપરી પરિસ્થિતિઓ માટે તૈયાર કરવામાં આવે છે. આ બેઝ પર આવેલ કેનેડિયન મેન્યુવર તાલીમ કેન્દ્ર અને ત્રીજી કેનેડિયન ડિવિઝન તાલીમ કેન્દ્ર સૈન્ય માટે ખૂબ જ મહત્વપૂર્ણ છે. શનિવારે અચાનક ફાટી નીકળેલી આ આગે વિકરાળ સ્વરૂપ ધારણ કરી લીધું હતું અને ભારે પવન ફૂંકાવાને કારણે તે ઝડપથી લશ્કરી મથકની સીમા દીવાલ વટાવીને બહાર પણ ફેલાઈ ગઈ હતી.
અગ્નિશામક દળોને તૈનાત કરાયા
પરિસ્થિતિની ગંભીરતાને જોતાં આસપાસના વિસ્તારોમાંથી અગ્નિશામક દળોને તૈનાત કરવામાં આવ્યા છે અને નજીકની વેઇનરાઇટ હોસ્પિટલોને એલર્ટ પર રાખવામાં આવી છે. વહીવટીતંત્રે હાલમાં સ્થાનિક રહેવાસીઓને સ્થળાંતર કરવાનો કોઈ આદેશ આપ્યો નથી, પરંતુ કટોકટીની સૂચનાઓનું ચુસ્તપણે પાલન કરવા અને રાહત વાહનો માટે રસ્તાઓ ખુલ્લા રાખવા અપીલ કરવામાં આવી છે.
અસરગ્રસ્તોને સહાય પહોંચાડવાની ખાતરી
આ રાષ્ટ્રીય હોનારત પર ઊંડો શોક વ્યક્ત કરતા કેનેડાના વડા પ્રધાન માર્ક કાર્ની અને આલ્બર્ટાના મુખ્ય પ્રધાન ડેનિયલ સ્મિથે પ્રભાવિત પરિવારો પ્રત્યે સંવેદના વ્યક્ત કરી છે. વડા પ્રધાને જણાવ્યું હતું કે ફેડરલ સરકાર પ્રાંતીય વહીવટીતંત્ર અને સૈન્ય સાથે સતત સંપર્કમાં છે અને દરેક સંભવિત મદદ પૂરી પાડવામાં આવી રહી છે. વિપક્ષી નેતા પિયર પોઇલીવરે પણ અસરગ્રસ્તોને સહાય પહોંચાડવાની ખાતરી આપી છે.
તંત્ર દ્વારા વધુ વિગતો જાહેર કરાશે
ઉલ્લેખનીય છે કે આ દુર્ઘટના એવા સમયે ઘટી છે જ્યારે આલ્બર્ટાના કેનેડાથી અલગ થવાની પ્રક્રિયા સંબંધી પ્રસ્તાવ પર મતદાનના દિવસો નજીક છે, જોકે સત્તાવાળાઓ દ્વારા આ આગના રાજકીય કનેક્શન વિશે હજુ સુધી કોઈ પુષ્ટિ કરવામાં આવી નથી. આગ ઓલવ્યા બાદ અને તપાસ પૂર્ણ થયા પછી તંત્ર દ્વારા વધુ વિગતો જાહેર કરવામાં આવશે.
આ પણ વાંચોઃ Petrol Diesel Price Today: ક્રુડ ઓઇલનો ભાવ 110 ને પાર છતા પેટ્રોલ ડીઝલના ભાવમાં રાહત મળી કે નહીં? જાણો તમારાં શહેરનો લેટેસ્ટ રેટ
