કેનેડાના ટોરોન્ટો શહેરમાંથી એક હૃદયકંપાવનારી ઘટના સામે આવી છે. અહીં આયોજિત ટોરોન્ટોના સૌથી મોટા લૅટિન સ્ટ્રીટ ફેસ્ટિવલમાં અચાનક થયેલા અંધાધૂંધ ગોળીબારને કારણે ભારે અફરાતફરી મચી ગઈ હતી. આ હિંસક ઘટનામાં બે લોકોના ઘટનાસ્થળે જ કમકમાટીભર્યા મોત નીપજ્યા છે, જ્યારે અન્ય છ લોકો ગંભીર રીતે ઘાયલ થયા હોવાના અહેવાલ છે. ગોળીબારની આ ઘટના બાદ સમગ્ર વિસ્તારમાં દહેશતનો માહોલ ફેલાઈ ગયો છે અને હુમલાખોર હજુ પણ પોલીસ પકડથી દૂર છે.

સ્થાનિકોમાં ભારે ફફડાટ

મળતી માહિતી મુજબ, આ ઘટના મિડટાઉન ટોરોન્ટોમાં આયોજિત વાર્ષિક લૅટિન સાંસ્કૃતિક ઉત્સવ 'સાલ્સા ઓન સેન્ટ ક્લેયર' (Salsa on St. Clair) દરમિયાન બની હતી. પોલીસના જણાવ્યા અનુસાર, શનિવારે રાત્રે આશરે 8 વાગ્યા પછી સેન્ટ ક્લેયર એવેન્યુ વેસ્ટ અને અર્લિંગ્ટન એવેન્યુ નજીક અચાનક ગોળીઓ છૂટવા માંડી હતી. વીકેન્ડની સાંજ હોવાને કારણે તહેવારનો આનંદ માણવા માટે હજારોની સંખ્યામાં લોકો રસ્તા પર હાજર હતા. પ્રખ્યાત લૅટિન સંગીત, નૃત્ય અને સ્વાદિષ્ટ વાનગીઓની મજા માણી રહેલી ભીડ વચ્ચે અચાનક ગોળીઓનો અવાજ સંભળાતા જ લોકો પોતાની જાન બચાવવા માટે આમતેમ દોડવા લાગ્યા હતા અને ફેસ્ટિવલનું વાતાવરણ ચીચીયારીઓમાં ફેરવાઈ ગયું હતું.

ઘટનાની જાણ થતાં જ પોલીસ કાફલો અને ઈમરજન્સી મેડિકલ સેવાઓ તાત્કાલિક ઘટનાસ્થળે દોડી ગઈ હતી. ગોળીબારમાં ઘાયલ થયેલા તમામ છ લોકોને તાકીદે નજીકની હોસ્પિટલમાં સારવાર અર્થે ખસેડવામાં આવ્યા છે, જ્યાં તેમની સ્થિતિ અંગે હજુ સુધી કોઈ સત્તાવાર માહિતી જાહેર કરવામાં આવી નથી.

સુરક્ષા વ્યવસ્થા ચુસ્ત કરી દેવામાં આવી

પોલીસે સમગ્ર વિસ્તારને કોર્ડન કરી લીધો છે અને સુરક્ષા વ્યવસ્થા ચુસ્ત કરી દેવામાં આવી છે. આ ગોળીબાર પાછળનું ચોક્કસ કારણ હજુ સુધી જાણી શકાયું નથી. ટોરોન્ટો પોલીસ હાલમાં આસપાસના સીસીટીવી (CCTV) ફૂટેજ ખંખોળી રહી છે અને પ્રત્યક્ષદર્શીઓની પૂછપરછ કરીને હુમલાખોરની ઓળખ મેળવવાના પ્રયાસો કરી રહી છે. આ ફેસ્ટિવલની આ 22મી આવૃત્તિ હતી, જે દર વર્ષે કેનેડામાં લૅટિન સંસ્કૃતિની ઉજવણી માટે ખૂબ જ લોકપ્રિય છે. પરંતુ આ લોહિયાળ ઘટનાએ કેનેડામાં ફરી એકવાર જાહેર સુરક્ષા અને ગન કલ્ચર સામે મોટા સવાલો ઊભા કર્યા છે.

આ પણ વાંચો:Work Culture: અઠવાડિયામાં 40 કલાકથી વધુ કામ ન કરો, ભારતીય મહિલાએ જણાવ્યું ન્યૂઝીલેન્ડના ઓફિસનું કલ્ચર