રશિયા-યુક્રેન અને મિડલ ઈસ્ટમાં ચાલી રહેલા સંઘર્ષની વચ્ચે હવે દુનિયા સામે વધુ એક નવું યુદ્ધ શરૂ થવાનું જોખમ તોળાઈ રહ્યું છે. વ્યુહાત્મક રીતે વિશ્વના સૌથી મહત્વપૂર્ણ દરિયાઈ માર્ગોમાંથી એક ગણાતા 'સ્ટ્રેટ ઓફ હોર્મુઝ' (Strait of Hormuz) માં ઈરાન અને ઓમાન વચ્ચેનો સરહદી અને સૈન્ય વિવાદ ઘણો વકરી ગયો છે. સંરક્ષણ નિષ્ણાતોના મતે, જો આ વિવાદ જલ્દી શાંત નહીં થાય, તો હોર્મુઝની સામુદ્રધુની આગામી સમયમાં ભયાનક યુદ્ધનું નવું કેન્દ્ર બની શકે છે, જેની સીધી અસર વૈશ્વિક અર્થતંત્ર અને ભારત પર પણ જોવા મળશે.
આંતરરાષ્ટ્રીય સ્તરે એલર્ટ જાહેર
મીડિયા રિપોર્ટ્સ અનુસાર, આ વિવાદનું મુખ્ય કારણ આ દરિયાઈ પટ્ટીમાં બંને દેશોની સરહદોની સૈન્ય હાજરી અને સુરક્ષા પ્રોટોકોલ છે. હોર્મુઝનો આ માર્ગ એટલો સાંકડો છે કે તેના પર નિયંત્રણ મેળવવા માટે ઈરાન અવારનવાર આક્રમક વલણ અપનાવતું આવ્યું છે, જેનો ઓમાન હવે સખત વિરોધ કરી રહ્યું છે. તાજેતરમાં બંને દેશોની નૌકાસેના (Navy) સામસામે આવી જવાની ઘટનાઓ પણ પ્રકાશમાં આવી છે, જેના કારણે આંતરરાષ્ટ્રીય સ્તરે એલર્ટ જાહેર કરવામાં આવ્યું છે.
તેલના ભાવ આસમાને પહોંચી જશે
હોર્મુઝની સામુદ્રધુની આખી દુનિયા માટે કેમ મહત્વની છે, તે સમજવું ખૂબ જરૂરી છે. વિશ્વભરમાં દરિયાઈ માર્ગે થતા કુલ ક્રૂડ ઓઈલ (Crude Oil) ના પરિવહનનો આશરે 20 થી 30 ટકા હિસ્સો માત્ર આ એક નાનકડા દરિયાઈ માર્ગ પરથી પસાર થાય છે. સાઉદી અરેબિયા, ઈરાક, યુએઈ, કુવૈત અને કતાર જેવા મોટા તેલ ઉત્પાદક દેશો આ જ રૂટ દ્વારા વિશ્વના અન્ય દેશો સુધી ઈંધણ પહોંચાડે છે. જો આ વિસ્તારમાં સહેજ પણ યુદ્ધ જેવી સ્થિતિ સર્જાય, તો આંતરરાષ્ટ્રીય બજારમાં તેલના ભાવ આસમાને પહોંચી જશે.
ભારત માટે આ તણાવ અત્યંત ચિંતાજનક છે. ભારત પોતાની જરૂરિયાતનું 80 ટકાથી વધુ ક્રૂડ ઓઈલ મિડલ ઈસ્ટના દેશોમાંથી આયાત કરે છે, જે આ જ હોર્મુઝ થઈને ભારત પહોંચે છે. સપ્લાય ચેઈન ખોરવાઈ જવાથી ભારતમાં પેટ્રોલ-ડીઝલ મોંઘા થવાનું જોખમ વધી જાય છે. હાલમાં વૈશ્વિક મહાસત્તાઓ અને સંયુક્ત રાષ્ટ્ર (UN) આ મામલે મધ્યસ્થતા કરવાનો પ્રયાસ કરી રહ્યા છે જેથી કરીને વધુ એક આર્થિક અને લશ્કરી સંકટથી વિશ્વને બચાવી શકાય.
આ પણ વાંચો:Japanની યુવતીઓ કઈ ઉંમરે કરે છે લગ્ન? કયા દેશના છોકરાઓ પર આવે છે તેમનું દિલ, જાણો રસપ્રદ વિગતો
