અધિકારીઓએ શું કહ્યું?
વિમાનમાં વિસ્ફોટક હોવાની માહિતી મળ્યા બાદ અધિકારીઓએ તપાસ શરૂ કરી હતી. જોકે, એરબસ A330 વિમાનની તપાસ કરવામાં આવતાં બોમ્બની ધમકી ખોટી હોવાનું સામે આવ્યું હતું.
ઇઝરાયેલ એરપોર્ટ્સ ઓથોરિટીના પ્રવક્તાએ Ynetને જણાવ્યું હતું કે, “તપાસ દરમિયાન કોઈ શંકાસ્પદ વસ્તુ મળી નથી અને ઘટના પૂર્ણ થઈ ગઈ છે. એરપોર્ટની કામગીરી ફરી સામાન્ય થઈ ગઈ છે.
આ ઘટના એવા સમયે બની છે, જ્યારે થોડા દિવસ પહેલાં જ દુબઈથી ઇઝરાયેલ જઈ રહેલા વિમાનમાં ઓમાની પાઇલટે પોતાના સહ-પાઇલટ પર હુમલો કર્યો હતો. 30 સપ્ટેમ્બરે દુબઈથી ઇઝરાયેલના તેલ અવીવ જઈ રહેલી ફ્લાયદુબઈની ફ્લાઇટ FZ1073માં આ ઘટના બની હતી.
ફ્લાયદુબઈની ફ્લાઇટમાં સહ-પાઇલટ પર હુમલો
વિમાનમાં હાજર ઓમાની સહ-પાઇલટે કોકપિટમાં ભારતીય પાઇલટ સ્મિત મચ્છર પર હુમલો કર્યો હતો. ઓમાની પાઇલટે ઇમરજન્સી કુહાડીથી તેમના પર વાર કર્યો હતો અને વિમાનનો કાબૂ મેળવવાનો પ્રયાસ કર્યો હતો. આ દરમિયાન વિમાન ઝડપથી નીચે તરફ જવા લાગ્યું હતું.
ગંભીર રીતે ઘાયલ હોવા છતાં સ્મિત મચ્છરે કોકપિટનો દરવાજો ખોલી દીધો હતો. ત્યારબાદ વિમાનમાં હાજર મુસાફરો અને અન્ય ક્રૂ સભ્યોએ અંદર આવીને હુમલાખોરને કાબૂમાં લીધો હતો.
વિમાનમાં હાજર એક એવા પાઇલટ, જે તે સમયે ફરજ પર નહોતા, તેમણે ફ્લાઇટને સાઉદી અરેબિયાના તબુક એરપોર્ટ પર સુરક્ષિત રીતે ઉતારી હતી. આ મામલે તપાસ હજુ ચાલી રહી છે. આ ઘટના બાદ ભારતીય પાઇલટ સ્મિત મચ્છરની બહાદુરીની દુનિયાભરમાં પ્રશંસા થઈ હતી.
