મધ્ય આફ્રિકન દેશ ડેમોક્રેટિક રિપબ્લિક ઓફ કોંગોમાં ઇબોલા વાયરસે અત્યંત ભયાનક સ્વરૂપ ધારણ કર્યું છે, જેના કારણે સમગ્ર વિશ્વના સ્વાસ્થ્ય તંત્રમાં ચિંતાની લહેર દોડી ગઈ છે. ઇબોલા વાયરસને કારણે માત્ર ત્રણ મહિનામાં જ આ જીવલેણ વાયરસના કારણે 2,000 કરતા વધુ લોકોના કરુણ મોત નીપજ્યા છે. ખાસ કરીને છેલ્લા 20 દિવસમાં જ સ્થિતિ એટલી હદે વણસી છે કે 1,000 થી વધુ લોકોએ પોતાના પ્રાણ ગુમાવ્યા છે, જે આ વાયરસના અત્યંત ઝડપી અને ઘાતક ફેલાવા તરફ ઈશારો કરે છે.
ઇબોલાના કુલ 4381 શંકાસ્પદ કેસની પુષ્ટિ
સરકારી આંકડાઓ અને મીડિયા અહેવાલ મુજબ, મંગળવાર સુધીમાં કોંગોના પાંચ અલગ-અલગ પ્રાંતોમાં ઇબોલાના કુલ 4381 શંકાસ્પદ કેસની પુષ્ટિ થઈ ચૂકી છે, જેમાંથી 2011 દર્દીઓ જીવ ગુમાવી ચૂક્યા છે. ઇતિહાસ પર નજર કરીએ તો, 2014 થી 2016 દરમિયાન પશ્ચિમ આફ્રિકામાં ફેલાયેલા મહામારી બાદ વિશ્વનો આ બીજો સૌથી મોટો ઇબોલા પ્રકોપ માનવામાં આવી રહ્યો છે. આ ગંભીર પરિસ્થિતિને ધ્યાનમાં રાખીને આંતરરાષ્ટ્રીય અધિકારીઓ અને આરોગ્ય સંસ્થાઓ દ્વારા તાત્કાલિક અને નક્કર પગલાં લેવાની અપીલ કરવામાં આવી રહી છે.