અમેરિકાના પૂર્વ પ્રમુખ ડોનાલ્ડ ટ્રમ્પે કુખ્યાત જેફરી એપસ્ટીન સાથેના તેમના સંબંધો અંગે ચાલી રહેલી અટકળો પર પૂર્ણવિરામ મૂકતા એક અત્યંત ચોંકાવનારો દાવો કર્યો છે. ટ્રમ્પે જણાવ્યું હતું કે, એપસ્ટીન તેમની તરફેણમાં નહીં, પરંતુ તેમની વિરુદ્ધમાં કામ કરી રહ્યો હતો અને તે ક્યારેય ઈચ્છતો નહોતો કે ટ્રમ્પ રાષ્ટ્રપતિ બને.
એપસ્ટીન મારી જીતનો વિરોધ કરી રહ્યો હતોઃ ટ્રમ્પ
એર ફોર્સ વન પર પત્રકારો સાથેની અનૌપચારિક વાતચીત દરમિયાન ટ્રમ્પે ખુલાસો કર્યો કે જેફરી એપસ્ટીન તેમની રાજકીય કારકિર્દીને નુકસાન પહોંચાડવાનો પ્રયાસ કરી રહ્યો હતો. ટ્રમ્પે કહ્યું, "સત્ય એ છે કે જેફરી એપસ્ટીન એક લેખક સાથે મળીને મને ચૂંટણી જીતતા અટકાવવા માટે સક્રિય હતો. તે મારી જીતની વિરુદ્ધમાં લડી રહ્યો હતો." આ નિવેદન દ્વારા ટ્રમ્પે એવો સંકેત આપ્યો છે કે તેમની અને એપસ્ટીન વચ્ચે કોઈ મિત્રતા નહોતી, ઉલટાનું એપસ્ટીન તેમના વિરોધી તરીકે કાર્યરત હતો.
આરોપો પર ટ્રમ્પની પ્રતિક્રિયા: "હું સંપૂર્ણપણે સ્વચ્છ છું"
એપસ્ટીન કેસમાં વિરોધ પક્ષો દ્વારા વારંવાર ટ્રમ્પનું નામ ઉછાળવામાં આવતું રહ્યું છે. આ અંગે ટ્રમ્પે સ્પષ્ટતા કરતા કહ્યું કે, "મારી પાસે છુપાવવા માટે કંઈ જ નથી. આ મામલે તપાસમાં મને પહેલેથી જ નિર્દોષ જાહેર કરવામાં આવ્યો છે." તેમણે ભારપૂર્વક જણાવ્યું કે તેમના પર લાગેલા તમામ આરોપો પાયાવિહોણા છે અને જેફરી એપસ્ટીન સાથે તેમને કોઈ લેવાદેવા નથી.
કોણ હતો જેફરી એપસ્ટીન?
જેફરી એપ્સટાઈન એક શક્તિશાળી અમેરિકન ફાઇનાન્સર હતો, જેના પર સગીર વયની બાળકીઓના જાતીય શોષણ અને માનવ તસ્કરીના ગંભીર આરોપો હતા. વર્ષ 2019 માં જ્યારે તે જેલમાં સજા કાપી રહ્યો હતો, ત્યારે રહસ્યમય સંજોગોમાં તેનું અવસાન થયું હતું. એપસ્ટીનની સંબંધો વિશ્વના અનેક દિગ્ગજ રાજકારણીઓ અને ઉદ્યોગપતિઓ સાથે હોવાનું બહાર આવ્યું છે, જેના કારણે અમેરિકન રાજકારણમાં સમયાંતરે વિવાદો સર્જાતા રહે છે.
દસ્તાવેજોનો પટારો ખુલ્યો
તાજેતરમાં યુએસ ડિપાર્ટમેન્ટ ઓફ જસ્ટિસે 'એપસ્ટીન ફાઇલ્સ ટ્રાન્સપરન્સી એક્ટ' હેઠળ અંદાજે 30 લાખથી વધુ પાનાના દસ્તાવેજો જાહેર કર્યા છે. આ કાયદો મહિનાઓના રાજકીય દબાણ બાદ પસાર કરવામાં આવ્યો હતો, જેનો હેતુ એપસ્ટીનના નેટવર્ક અને તેમાં સામેલ પ્રભાવશાળી લોકોની વિગતો જનતા સમક્ષ લાવવાનો છે. ટ્રમ્પે આ દસ્તાવેજોના સંદર્ભમાં પણ પોતાનો પક્ષ રજૂ કરીને પોતાની છબી સ્પષ્ટ કરવાનો પ્રયાસ કર્યો છે.
આ પણ વાંચોઃ Bangladesh BNP government : ભારત સાથે સંવાદ જ રસ્તો, નવી BNP સરકારનો સ્પષ્ટ સંદેશ
