Nepal ના બૈતાડી જિલ્લામાં ગમખ્વાર અકસ્માત, યાત્રીઓ સવાર બસ ઊંડી ખીણમાં ખાબકતા 13નાં મોત

ભારતના ઉત્તરાખંડ રાજ્યના પિથોરાગઢ જિલ્લાને અડીને આવેલા નેપાળના બૈતડી જિલ્લામાં ગુરુવારે રાત્રે એક હૃદયદ્રાવક માર્ગ અકસ્માત સર્જાયો હતો. મુસાફરોથી ખીચોખીચ ભરેલી એક બસ પહાડી માર્ગ પરથી પસાર થઈ રહી હતી ત્યારે અચાનક ડ્રાઈવરે વાહન પરથી કાબૂ ગુમાવ્યો હતો, જેના પરિણામે બસ અંદાજે 200 મીટર ઊંડી ખીણમાં ખાબકી હતી.

અકસ્માતમાં 13 લોકોના મોત

આ ભયાનક દુર્ઘટનામાં અત્યાર સુધીમાં 13 લોકોના મોત થયા હોવાની પુષ્ટિ કરવામાં આવી છે. અંધારું હોવાને કારણે બચાવ કામગીરીમાં શરૂઆતમાં ઘણી મુશ્કેલીઓ નડી હતી, છતાં સ્થાનિક પોલીસ અને રાહત ટુકડીઓએ તાત્કાલિક ઘટનાસ્થળે પહોંચી ખીણમાંથી લોકોને બહાર કાઢ્યા હતા. આ અકસ્માતમાં અન્ય 34 મુસાફરો ગંભીર રીતે ઘાયલ થયા છે.

ઘાયલોને હોસ્પિટલ ખસેડવામાં આવ્યા

ઘાયલોને તાત્કાલિક ધોરણે નજીકની હોસ્પિટલોમાં ખસેડવામાં આવ્યા છે. વહીવટીતંત્રના જણાવ્યા અનુસાર, ઇજાગ્રસ્તોને બૈતડી અને ડડેલધુરા જિલ્લાની હોસ્પિટલોમાં દાખલ કરવામાં આવ્યા છે, જ્યાં કેટલાકની હાલત અત્યંત નાજુક હોવાનું જણાવાઈ રહ્યું છે. મૃતકોની સંખ્યામાં હજુ વધારો થવાની આશંકા સેવાઈ રહી છે.

તંત્રની કાર્યવાહી

પ્રાથમિક તપાસ મુજબ, નેપાળના સુદૂર પશ્ચિમના આ પહાડી વિસ્તારમાં રસ્તાઓ સાંકડા અને વળાંકવાળા હોવાને કારણે અવારનવાર અકસ્માતો સર્જાતા હોય છે. આ કિસ્સામાં પણ ડ્રાઈવરનું નિયંત્રણ ગુમાવવું અકસ્માતનું મુખ્ય કારણ માનવામાં આવે છે. બૈતડી જિલ્લો ઉત્તરાખંડની સરહદે આવેલો હોવાથી સ્થાનિક ભારતીય સરહદી વિસ્તારોમાં પણ આ ઘટનાને લઈને શોકની લાગણી ફેલાઈ છે.

આ પણ વાંચોઃ DA Hike: કેન્દ્રીય કર્મચારી અને પેંશનર્સ માટે ખુશખબરી! DA માં 2% ના વધારાની શક્યતા, જાણો પગારમાં કેટલો ઉછાળો આવશે