અમેરિકાના આધુનિક ઇતિહાસમાં ક્યારેય ન બન્યું હોય તેવી એક ચોંકાવનારી ઘટના સામે આવી છે. વર્ષ 2009 ના ફોર્ટ હૂડ લશ્કરી બેઝ ગોળીબાર કેસમાં 13 સૈનિકોની હત્યા કરવાના દોષિત આર્મી ઓફિસર મેજર નિદાલ હસનને દુનિયા સમક્ષ જાહેરમાં ફાયરિંગ સ્ક્વોડ દ્વારા ફાંસી આપવામાં આવશે. સૌથી મોટો વિવાદ એ વાતનો છે કે આ લશ્કરી ફાંસીની સજાનું લાઈવ ટેલિવિઝન પ્રસારણ કરવામાં આવશે. આવી પદ્ધતિઓ લગભગ એક સદી પહેલા અમેરિકામાં બંધ કરી દેવામાં આવી હતી, અને હાલમાં તે ઈરાન, ઉત્તર કોરિયા અથવા અફઘાનિસ્તાનમાં તાલિબાન જેવી શાસનવ્યવસ્થામાં જ જોવા મળે છે.

મૃત્યુદંડનું કરાશે લાઇવ સ્ટ્રીમિંગ

યુએસ સંરક્ષણ સચિવ પીટ હેગસેથે જાહેરાત કરી છે કે મેજર નિદાલ હસનને આગામી 3 ડિસેમ્બરે ફાયરિંગ સ્ક્વોડ દ્વારા મૃત્યુદંડ આપવામાં આવશે અને તેનું લાઈવ સ્ટ્રીમિંગ કરાશે. આ પ્રકારની સજાના જાહેરમાં પ્રસારણનું અગાઉ કોઈ ઉદાહરણ જોવા મળ્યું નથી, અને તે સામાન્ય રીતે ઇસ્લામિક સ્ટેટ જેવા ઉગ્રવાદી સંગઠનોની ક્રૂર પદ્ધતિઓ સાથે જોડાયેલું છે. આ નિર્ણય બાદ સવાલ ઉઠી રહ્યા છે કે શું ટ્રમ્પ વહીવટીતંત્ર હેઠળ અમેરિકાની કાનૂની અને ન્યાયિક પ્રણાલી તાનાશાહી શાસનો જેવી બની રહી છે?

13 લોકોની હત્યા કરનારને અપાશે સજા

ઘટનાની વિગતો મુજબ, મેજર નિદાલ મલિક હસને ટેક્સાસના ફોર્ટ હૂડ ખાતે પોતાની અંગત હેન્ડગનથી 13 લોકોની હત્યા કરી હતી અને 32 અન્ય લોકોને ગંભીર રીતે ઘાયલ કર્યા હતા. મૃતકોમાં બાર સૈનિકો સામેલ હતા. યુએસ લશ્કરી ઇતિહાસમાં આ સૌથી ઘાતક ગોળીબાર હતો, જેણે સમગ્ર દેશની સેનાને હચમચાવી દીધી હતી. અગાઉ ૯૦ વર્ષ પહેલાં અમેરિકામાં જાહેરમાં મૃત્યુદંડ આપવામાં આવતો હતો, પરંતુ માનવાધિકાર અને આધુનિક કાયદાકીય ધોરણોને કારણે આ પદ્ધતિ પર પ્રતિબંધ મૂકવામાં આવ્યો હતો.

ફાંસીની સજાનું ફિલ્માંકન કે પ્રસારણ સિદ્ધાંતો વિરુદ્ધ

આંતરરાષ્ટ્રીય માનવાધિકાર સંસ્થાઓ જેમ કે એમ્નેસ્ટી ઇન્ટરનેશનલે આ પગલાની આકરી ટીકા કરી છે. સંસ્થાઓના જણાવ્યા અનુસાર, ફાંસીની સજાનું ફિલ્માંકન અને પ્રસારણ કરવું એ ન્યાયિક સિદ્ધાંતોની વિરુદ્ધ છે અને તે કેદીઓના માનવાધિકારનું હનન કરે છે. આ નિર્ણયથી અમેરિકામાં ભારે રાજકીય અને સામાજિક વિવાદ સર્જાયો છે, જ્યાં વિવેચકો સવાલ કરી રહ્યા છે કે શું ન્યાયના નામે લોકશાહી દેશો પણ હવે અલોકશાહી માર્ગ અપનાવી રહ્યા છે?

આ પણ વાંચોઃ વાળને શાઇની અને ચમકદાર બનાવવા પીઓ આ જ્યુસ