અમેરિકન પ્રમુખ ડોનાલ્ડ ટ્રમ્પના વહીવટીતંત્રને એક મોટો કાનૂની આંચકો લાગ્યો છે. એક ફેડરલ કોર્ટે H-1B વિઝા પર $100,000 (આશરે ₹8.6 મિલિયન) ની અતિશય ફી લાદવાના ટ્રમ્પ સરકારના વિવાદાસ્પદ નિર્ણયને ગેરકાયદેસર ઠેરવીને રદ કરી દીધો છે. આ ચુકાદો ખાસ કરીને અમેરિકામાં નોકરીનું સ્વપ્ન જોતા લાખો ભારતીય IT વ્યાવસાયિકો અને વિદ્યાર્થીઓ માટે રાહતરૂપ સાબિત થયો છે.
કોંગ્રેસની મંજૂરી વગર ન લાદી શકે આટલો મોટો કર
બોસ્ટનના ન્યાયાધીશ લીઓ સોરોકિને આ મહત્વપૂર્ણ ચુકાદો આપતા સ્પષ્ટ કર્યું હતું કે, રાષ્ટ્રપતિ પાસે કોંગ્રેસની મંજૂરી વગર આટલી મોટી રકમનો 'કર' (Tax) લાદવાનો કોઈ કાનૂની અધિકાર નથી. કોર્ટે જણાવ્યું હતું કે ફીનું આ સ્વરૂપ વાસ્તવમાં કર છે, અને તેને લાગુ કરવા માટે ધારાસભા (કોંગ્રેસ)ની પૂર્વ મંજૂરી ફરજિયાત છે, જે અહીં લેવામાં આવી ન હતી.
ટ્રમ્પનો તર્ક કે લોકો આનો દુરૂપયોગ થઇ રહ્યો છે
ટ્રમ્પ વહીવટીતંત્રનો મુખ્ય તર્ક એવો હતો કે H-1B વિઝા કાર્યક્રમનો દુરુપયોગ થઈ રહ્યો છે. સરકારે દલીલ કરી હતી કે અમેરિકન કંપનીઓ સ્થાનિક કર્મચારીઓને બદલે ઓછા પગાર પર વિદેશી કામદારોને નોકરી પર રાખી રહી છે, જે અમેરિકન મજૂર બજાર માટે હાનિકારક છે. આ દૂષણને રોકવા અને વિદેશી ભરતી ઘટાડવાના ઉદ્દેશ્યથી ફીમાં આટલો મોટો વધારો કરવાનો પ્રયાસ કરવામાં આવ્યો હતો.
ભારતીય IT પ્રોફેશનલ્સ પર નકારાત્મક અસર
જોકે, આ નિર્ણયની સૌથી નકારાત્મક અસર ભારતીય IT પ્રોફેશનલ્સ પર પડી હતી. અમેરિકન કંપનીઓ દ્વારા ફીના ડરથી વિદેશી કામદારોને રાખવાનું ટાળવામાં આવતા, ટેકનિકલ નિષ્ણાતોની ભરતીમાં નોંધપાત્ર ઘટાડો જોવા મળ્યો હતો. ઘણા ભારતીય વ્યાવસાયિકોએ પોતાની નોકરી ગુમાવવી પડી હતી અને અનેક લોકોએ ભારત પાછા ફરવું પડ્યું હતું. USCIS ના ડેટા પણ આ વાતની પુષ્ટિ કરતા હતા કે વિઝા અરજીઓમાં આ ફી વધારાને કારણે મોટો ઘટાડો આવ્યો હતો.
જૂની ફી યથાવત રહેશે
કોર્ટના આ તાજા નિર્ણય બાદ હવે વિઝા ફી તેના જૂના અને સામાન્ય સ્તરે યથાવત રહેશે. આ રાહતથી ભારતીય IT કંપનીઓ અને અમેરિકામાં કાર્યરત એન્જિનિયરોને મોટી રાહત મળી છે. જોકે, ટ્રમ્પ વહીવટીતંત્ર આ ચુકાદાને ઉપલી કોર્ટમાં પડકારી શકે છે, પરંતુ હાલ પૂરતું આ નિર્ણયે ભારતીય ટેક પ્રતિભાઓ માટે અમેરિકાના દરવાજા ફરી ખોલી દીધા છે. નિષ્ણાતો માને છે કે આ ચુકાદો અમેરિકન ટેક સેક્ટરને ફરીથી ગતિશીલ બનાવશે અને ભારતીય પ્રતિભાઓ માટે માર્ગ સરળ કરશે.
આ પણ વાંચોઃ PoKમાં પાકિસ્તાની રેન્જર્સનો અત્યાચાર,પ્રદર્શન કરી રહેલા લોકો પર અંધાધુંધ ફાયરીંગ, 27નાં મોત
