ભારતની કેન્દ્રીય તપાસ એજન્સીઓની ચોક્કસ બાતમીના આધારે અમેરિકાની સુરક્ષા એજન્સીઓએ લાસ વેગાસમાં છુપાયેલા ભારતના વોન્ટેડ ગેંગસ્ટર હિમાંશુ ભાઉની ગુરુવારે સાંજે ધરપકડ કરી લીધી છે. તેની સાથે અન્ય ભાગેડુ આરોપી નીરજ ફરીદપુરિયાને પણ પકડી લેવાયો છે. ઇન્ટરપોલની રેડ નોટિસનો સામનો કરી રહેલા હિમાંશુને ભારત પરત લાવવા માટે હવે બંને દેશોની એજન્સીઓ વચ્ચે કાનૂની કાર્યવાહી તેજ બની.
વિશેષ ટીમ પણ ટૂંક સમયમાં અમેરિકા રવાના થઈ શકે
દિલ્હી પોલીસ અને હરિયાણા પોલીસની ટીમો લાંબા સમયથી અમેરિકામાં હિમાંશુ ભાઉનું લોકેશન ટ્રેસ કરવામાં લાગેલી હતી.ટેકનિકલ સર્વેલન્સ અને બાતમીદારો પાસેથી પ્રાપ્ત વિગતોના આધારે લાસ વેગાસમાં તેની હાજરીની સચોટ પુષ્ટિ થઈ હતી.ભારતીય એજન્સીઓએ આ સ્થળના સચોટ સંકલન યુએસ એજન્સીઓ સાથે શેર કર્યા બાદ ગુરુવારે સાંજે આ સફળ ઓપરેશન પાર પડાયું હતું.ઓગસ્ટ 2023માં ઇન્ટરપોલ દ્વારા તેની સામે રેડ નોટિસ જારી કરાઈ હતી.તેની સાથે ઝડપાયેલો અન્ય આરોપી નીરજ ફરીદપુરિયા આ વર્ષે કસ્ટડીમાંથી જામીન પર છૂટ્યા પછી પોતાના પગમાં લગાવેલું ટ્રેકિંગ ડિવાઇસ હટાવીને ફરાર થઈ ગયો હતો.હવે ભારતીય એજન્સીઓ અમેરિકી કાયદાકીય તંત્ર સાથે સંકલન સાધીને બંને ગુનેગારોને ભારત પરત લાવવાની ઔપચારિકતાઓ ઝડપથી પૂર્ણ કરી રહી છે.જેના માટે વરિષ્ઠ અધિકારીઓની એક વિશેષ ટીમ પણ ટૂંક સમયમાં અમેરિકા રવાના થઈ શકે છે.
બોબી અને નીરજ ફરીદપુરિયા તેને મદદ કરતા હતા
હરિયાણાના રોહતક જિલ્લાના રિટોલી ગામનો વતની 23 વર્ષીય હિમાંશુ ભાઉ ઉર્ફે કુનાલે રોહતકની શાકભાજી માર્કેટમાં વેપારીઓ પાસેથી બળજબરીથી ઉઘરાણી કરીને ગુનાખોરીમાં પ્રવેશ કર્યો હતો.તેના પર પોતાના જ ગામના સન્ની નામના યુવકની હત્યા કરવાનો ગંભીર આરોપ છે.વર્ષ 2020માં હિસાર સ્થિત બાળ સુધાર ગૃહમાંથી તે નાસી છૂટવામાં સફળ રહ્યો હતો.ત્યારબાદ તે જેલમાં બંધ કુખ્યાત ગેંગસ્ટર નીરજ બવાના સહિત અન્ય ગુનેગારોના સંપર્કમાં આવ્યો હતો અને વેપારીઓને ધમકાવીને મોટી રકમ પડાવવાનું શરૂ કર્યું હતું.હિમાંશુ સામે હત્યા અને હત્યાના પ્રયાસના 16 કેસ સહિત કુલ 30 થી વધુ ગુનાઓ નોંધાયેલા છે. લુકઆઉટ સર્ક્યુલર જારી થાય તે પહેલાં જ ઓગસ્ટ 2022 માં તેણે બરેલીમાંથી કુનાલ સિંહના નામે બનાવટી દસ્તાવેજોથી પાસપોર્ટ મેળવ્યો હતો અને ભારત છોડી દીધું હતું. તે યુએઈ થઈને ડંકી રૂટ મારફતે યુરોપ પહોંચ્યો હતો અને પોર્ટુગલથી પોતાનું ક્રિમિનલ નેટવર્ક ચલાવતો હતો, જેમાં તેનો 22 વર્ષીય સંબંધી સાહિલ, યોગેશ કાદિયાન ઉર્ફે બોબી અને નીરજ ફરીદપુરિયા તેને મદદ કરતા હતા.
લોકોના ઘર બહાર તેના શૂટરો ફાયરિંગ કરતા હતા
પરદેશમાં બેઠા હિમાંશુ ફોન પર ધમકીઓ આપતો હતો અને નાણાં ન આપનાર લોકોના ઘર બહાર તેના શૂટરો ફાયરિંગ કરતા હતા. ગેંગમાં ભરતી માટે સોશિયલ મીડિયા પર પોસ્ટ મૂકવામાં આવતી હતી અને કમેન્ટ કે ફોલો કરનારા યુવાનોનો સંપર્ક કરીને તેમને ગોળીબાર જેવા ગુના સોંપવામાં આવતા હતા. ભારતીય તપાસ એજન્સીઓને હિમાંશુની સાથે નીરજ ફરીદપુરિયાની કસ્ટડી મળવાની પણ આશા છે. ફરીદપુરિયા લોરેન્સ બિશ્નોઈ ગેંગની કટ્ટર હરીફ મનાતી પંજાબની કુખ્યાત બંબીહા ગેંગ સાથે કામ કરે છે. તે જેલમાં કૌશલ ચૌધરી અને અમિત ડાગરને મળ્યા બાદ દિનેશ ગાંધી મારફતે આ ગેંગમાં જોડાયો હતો. દરમિયાન, એનઆઈએની બેઠકમાં હરિયાણા પોલીસે રજૂઆત કરી હતી કે રાજ્યમાં આશરે 80 જેટલી ગુનાહિત ગેંગ સક્રિય છે.
આ પણ વાંચોઃ Gandhinagar News: પોલીસ હાઉસિંગમા મરામતનાં કામો માટે DGPએ જાહેર કરી નવી SOP
