યમનમાં સાઉદી અરેબિયાના સમર્થનવાળી સરકારી સેના અને હૂતી બળવાખોરો વચ્ચેનો સંઘર્ષ વધુ ઉગ્ર બન્યો છે. યમનની રાજધાની સનામાં તેલ સુવિધાઓને નિશાન બનાવી હવાઈ હુમલા કરવામાં આવ્યા હોવાના અહેવાલો વચ્ચે હૂતી બળવાખોરોએ સાઉદી અરેબિયાની રાજધાની રિયાધ પર કડક અને પીડાદાયક જવાબી કાર્યવાહી કરવાની ચેતવણી આપી છે. બીજી તરફ, યમનના તાઇઝ શહેરમાં હૂતી હુમલામાં 5 લોકોનાં મોત થયાં હોવાના અહેવાલ છે, જેમાં 5 વર્ષના બાળકનો પણ સમાવેશ થાય છે.
સનામાં તેલ સુવિધા ખાલી કરાવવાની ચેતવણી બાદ હુમલા
સાઉદીની આગેવાની હેઠળના ગઠબંધને સનાના પશ્ચિમ ભાગમાં આવેલી યમન ઓઇલ કંપનીની સુવિધા અને આસપાસના સ્ટોરેજ વિસ્તારને ખાલી કરવા નાગરિકોને ચેતવણી આપી હતી. ગઠબંધનના પ્રવક્તા તુર્કી અલ-માલિકીના જણાવ્યા મુજબ, આ પગલું એક વિશેષ સૈન્ય કાર્યવાહી પહેલાં નાગરિકોની સુરક્ષા માટે લેવામાં આવ્યું હતું. ત્યારબાદ હૂતી સમર્થક મીડિયા દ્વારા સનાની પશ્ચિમમાં તેલ સુવિધા પર હવાઈ હુમલાની જાણકારી આપવામાં આવી હતી.
હૂતી બળવાખોરોની રિયાધને ધમકી
સનામાં સંભવિત સૈન્ય કાર્યવાહી અંગે હૂતી સૈન્ય પ્રવક્તા યાહ્યા સરીએ ચેતવણી આપી છે કે જો સાઉદી ગઠબંધન રાજધાની પર હુમલો કરશે તો રિયાધમાં કડક જવાબ આપવામાં આવશે. હૂતી બળવાખોરોએ સાઉદી અરેબિયાની સરકારી તેલ કંપની અરામકોની સુવિધાઓને પણ નિશાન બનાવવાની ધમકી આપી છે. આ દરમિયાન સાઉદી ગઠબંધને રિયાધની ઉત્તરે 3 ડ્રોનને હવામાં અટકાવ્યાનો દાવો કર્યો છે. આ ઘટનામાં નુકસાન થયાની તાત્કાલિક જાણકારી સામે આવી નહોતી.
તાઇઝમાં 5નાં મોત, બાળકનો પણ સમાવેશ
યમનના તાઇઝ શહેરમાં હૂતી બળવાખોરો દ્વારા કરવામાં આવેલા હુમલામાં 5 લોકોનાં મોત થયાં હોવાના અહેવાલ છે. મૃતકોમાં 5 વર્ષનું બાળક પણ સામેલ છે, જ્યારે અનેક લોકો ઘાયલ થયા છે. યમનના એક માનવાધિકાર સંગઠને રહેણાક વિસ્તારો પર તોપમારો કરાયો હોવાનો આરોપ મૂક્યો છે.
યમનની સરકારી સેનાનો 950 હૂતીને માર્યાનો દાવો
યમનની સરકારી સેનાએ ‘ઓપરેશન ડૉન ઑફ યમન’ દરમિયાન 950 હૂતી લડવૈયાઓ માર્યા ગયા હોવાનો દાવો કર્યો છે. સેનાના જણાવ્યા મુજબ, આ અભિયાનમાં 1,879 કાર્યવાહી કરવામાં આવી અને 380 સૈન્ય વાહનો નષ્ટ અથવા નિષ્ક્રિય કરાયાં હતાં. 5 ઑક્ટોબરે શરૂ થયેલા આ અભિયાનનો હેતુ હૂતી બળવાખોરોના કબજામાં રહેલા વિસ્તારો પાછા મેળવવાનો અને રાજધાની સના પર તેમનું નિયંત્રણ સમાપ્ત કરવાનો હોવાનું યમનની સરકારનું કહેવું છે.
આ પણ વાંચો: Battle of Pelusium: માણસો નહીં, પણ બિલાડીઓની મદદથી લડાયું હતું આ અનોખું યુદ્ધ! જાણો કોની થઈ હતી જીત અને કોની હાર?
