સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઈઝેશન (CDSCO) એ તાજેતરમાં પાકિસ્તાનથી આવતા બિન-અધિકૃત કોસ્મેટિક પ્રોડક્ટના વેચાણ અંગે જાહેર આરોગ્ય ચેતવણી જારી કરી છે. CDSCO ની સૂચનામાં જે બે ઉત્પાદનોનો ઉલ્લેખ કરવામાં આવ્યો છે તે 'ચાંદની વ્હાઇટનિંગ ક્રીમ' (Chandni Whitening Cream) અને 'ગોરી બ્યુટી ક્રીમ' (Gori Beauty Cream) છે; આ બંને પ્રોડક્ટ પાકિસ્તાનમાં બનાવવામાં આવ્યા હોવાનું જાણવા મળ્યું છે.
ખૂબ વધારે મેટલ અને ટોક્સિક ઈફેક્ટ્સ
'ચાંદની વ્હાઇટનિંગ ક્રીમ' અને 'ગોરી બ્યુટી ક્રીમ'ના વેચાણ પર પ્રતિબંધ મૂકતી વખતે, ડ્રગ નિયમનકારે જણાવ્યું હતું કે આ ક્રીમમાં "અત્યધિક હેવી મેટલ્સ" (ભારે ધાતુઓ) એટલે કે નિર્ધારિત મર્યાદા કરતાં વધુ પ્રમાણ જોવા મળ્યું હતું. CDSCO એ વધુમાં જણાવ્યું હતું કે આ ક્રીમના ઉપયોગથી ઝેરી અસરો થઈ શકે છે અને સ્વાસ્થ્ય માટે ગંભીર જોખમો ઊભા થઈ શકે છે.
સરકારી સૂચનામાં જણાવાયું છે કે, "બિન-અધિકૃત કોસ્મેટિક ઉત્પાદનોના ઉપયોગ અંગે જાહેર આરોગ્ય ચેતવણી ગ્રાહકોના ઉપયોગ માટેના કોસ્મેટિક ઉત્પાદનો સામાન્ય જનતા માટે સુરક્ષિત હોવા જોઈએ. તેમના ઉત્પાદન અને આયાતનું નિયમન 'ડ્રગ્સ એન્ડ કોસ્મેટિક્સ એક્ટ, 1940' અને 'કોસ્મેટિક્સ રૂલ્સ, 2020' હેઠળ કરવામાં આવે છે. કોસ્મેટિક ઉત્પાદનો માટેના ધોરણો 'બ્યુરો ઓફ ઈન્ડિયન સ્ટાન્ડર્ડ્સ' (BIS) દ્વારા જારી કરવામાં આવે છે. વેચાણ અને વિતરણ માટે કોસ્મેટિક્સના ઉત્પાદન માટે રાજ્ય લાયસન્સિંગ ઓથોરિટી પાસેથી લાયસન્સ મેળવવું ફરજિયાત છે. કોસ્મેટિક્સની આયાત માટે ઉત્પાદનોની નોંધણી નિર્ધારિત નિયમો અનુસાર 'સેન્ટ્રલ લાયસન્સિંગ ઓથોરિટી' પાસે કરાવવી જરૂરી છે."
લોકોને આપી સલાહ
આ સૂચનામાં ગ્રાહકોને પાકિસ્તાનમાં ઉત્પાદિત 'ગોરી બ્યુટી ક્રીમ' અને 'ચાંદની વ્હાઇટનિંગ ક્રીમ' ન ખરીદવાની સલાહ આપવામાં આવી છે. ગ્રાહકોને એવી પણ સલાહ આપવામાં આવે છે કે જો તેઓએ આ ઉત્પાદનો અથવા સમાન નામ ધરાવતા કોસ્મેટિક ઉત્પાદનો પહેલેથી જ ખરીદી લીધા હોય, તો તેનો ઉપયોગ ન કરવો. વધુમાં, લોકોને સલાહ આપવામાં આવે છે કે તેઓ ફક્ત એવા જ કોસ્મેટિક ઉત્પાદનો ખરીદે અને વાપરે કે જેના પર ઉત્પાદન લાયસન્સ નંબર, ઉત્પાદકની માહિતી, બેચ નંબર, ઉત્પાદન અને સમાપ્તિ (એક્સપાયરી) તારીખો અને નોંધણી નંબર (આયાતી કોસ્મેટિક્સના કિસ્સામાં) જેવી વિગતો દર્શાવેલી હોય.
આ પણ વાંચો: Viral Video: લો બોલો... જર્મન મહિલાએ ભારતીય બાથરૂમની કરી વાહવાહી, યુરોપને આપી દીધી મસમોટી સલાહ
