ભારત અને પાકિસ્તાન વચ્ચે 1960માં થયેલી ઐતિહાસિક સિંધુ જળ સંધિ (Indus Waters Treaty)ને લઈને પાકિસ્તાનની અંદર મચેલો ફફડાટ હવે વૈશ્વિક મંચ પર ખુલ્લેઆમ દેખાઈ રહ્યો છે. જમ્મુ-કાશ્મીરના પહલગામમાં થયેલા ભીષણ આતંકવાદી હુમલા બાદ, વડાપ્રધાન નરેન્દ્ર મોદીની સરકારે આ સંધિને સ્થગિત (In Abeyance) કરવાનો કડક નિર્ણય લીધો હતો. ભારતના આ એક જ આકરા પ્રહારથી પાકિસ્તાનની કૃષિ આધારિત અર્થવ્યવસ્થા અને વીજળી ઉત્પાદન સંકટમાં મુકાઈ ગયા છે. હવે પાણી વિના ટળવળતા પાકિસ્તાનના મંત્રીઓથી લઈને સાંસદો સુધીના તમામ નેતાઓ દુનિયા સામે આ સંધિ બચાવવા માટે કરગરી રહ્યા છે.

ઇસ્લામાબાદમાં આંતરરાષ્ટ્રીય સંમેલનનો સહારો

ભારતના એકતરફી નિર્ણય સામે વૈશ્વિક સમર્થન મેળવવા માટે પાકિસ્તાને ઇસ્લામાબાદમાં સિંધુ જળ સંધિ પર એક પ્રથમ આંતરરાષ્ટ્રીય પરિષદનું આયોજન કર્યું છે. આ કોન્ફરન્સમાં પાકિસ્તાનના મંત્રીઓ અને સંસદો,વિદેશ મંત્રી ઇશાક ડાર, પીપીપી ચીફ બિલાવલ ભુટ્ટો ઝરદારી સહિતના દિગ્ગજ નેતાઓ અને આંતરરાષ્ટ્રીય કાયદાના નિષ્ણાતો ઉપસ્થિત રહ્યા હતા. આ મંચ પરથી પાકિસ્તાને ફરી એકવાર ગીદડભભકી આપવાનો પ્રયાસ કર્યો છે. પાકિસ્તાની વિદેશ મંત્રી ઇશાક ડારે ચેતવણી આપતા જણાવ્યું કે, "વહેંચાયેલા જળ સંસાધનોને ક્યારેય હથિયાર ન બનાવવું જોઈએ. જો પાકિસ્તાનના જળ અધિકારો સાથે સમાધાન થશે, તો તેની ગંભીર અસર સમગ્ર દક્ષિણ એશિયાની શાંતિ અને આ પ્રદેશના 2 અબજ લોકો પર પડશે."

પાકિસ્તાની મંત્રીઓની બોખલાહટ: 'હાથ કાપી નાખીશું'

કોન્ફરન્સ પહેલા જ પાકિસ્તાનના જળવાયુ પરિવર્તન મંત્રી મુસાદિક મલિકે અત્યંત ઉશ્કેરણીજનક નિવેદન આપતા કહ્યું હતું કે, "જો કોઈ પાકિસ્તાનના હિસ્સાનું પાણી છીનવવાનો પ્રયાસ કરશે, તો ઇસ્લામાબાદ તેના હાથ કાપી નાખશે." જોકે, સંરક્ષણ મંત્રી ખ્વાજા આસિફે અગાઉ યુદ્ધની ધમકી પણ આપી હતી, પરંતુ નિષ્ણાતોનું માનવું છે કે પાકિસ્તાનની આ ધમકીઓ માત્ર પોકળ સાબિત થશે. પાકિસ્તાન હજી પણ અગાઉના લશ્કરી સંઘર્ષ 'ઓપરેશન સિંદૂર'ના આઘાત અને આર્થિક પાયમાલીમાંથી બહાર આવી શક્યું નથી.

ભારતનું કડક વલણ: લોહી અને પાણી સાથે નહીં વહે

બીજી તરફ ભારતે સંયુક્ત રાષ્ટ્ર (UN)ના મંચ પરથી પણ સ્પષ્ટ કરી દીધું છે કે જ્યાં સુધી પાકિસ્તાન સરહદ પારથી થતા આતંકવાદ અને ટેરર ફંડિંગને સંપૂર્ણપણે નાબૂદ નહીં કરે, ત્યાં સુધી આ સંધિ સ્થગિત જ રહેશે. ભારતે સ્પષ્ટ શબ્દોમાં કહી દીધું છે કે, "લોહી અને પાણી બંને એકસાથે વહી શકે નહીં." ભારત દ્વારા નદીઓના ડેટા શેરિંગ બંધ કરાતા પાકિસ્તાનને હવે નદીઓમાં પાણીના પ્રવાહની ચોક્કસ માહિતી પણ મળતી નથી, જેના લીધે તેમના ખેડૂતો ભારે મુશ્કેલીમાં મુકાયા છે.