મધ્ય પૂર્વમાં ભૌગોલિક રાજકીય તણાવ ફરી એકવાર ચરમસીમાએ પહોંચ્યો છે. અમેરિકા અને ઈરાન વચ્ચેના સંબંધોમાં આવેલો કડવાશ ભરેલો વળાંક હવે ખુલ્લા સંઘર્ષમાં ફેરવાઈ ગયો છે. આ ઘટનાક્રમની શરૂઆત ત્યારે થઈ જ્યારે અમેરિકાએ દાવો કર્યો કે ઈરાને તેમનું અપાચે હેલિકોપ્ટર તોડી પાડ્યું છે. આ હુમલાનો જવાબ આપતા, અમેરિકી સૈન્યએ 'સ્વ-બચાવ'ના નામે હોર્મુઝ સ્ટ્રેટ નજીક આવેલા ઈરાની શહેરો - જસ્ક, સિરિક અને કેશ્મ - પર મોટો હવાઈ હુમલો કર્યો. યુએસ સેન્ટ્રલ કમાન્ડ (સેન્ટકોમ) ના જણાવ્યા મુજબ, આ કાર્યવાહીમાં ઈરાની હવાઈ સંરક્ષણ પ્રણાલીઓ, રડાર સ્ટેશનો અને જમીની કંટ્રોલ પોઈન્ટ્સને નિશાન બનાવવામાં આવ્યા હતા.
અમેરિકા સામે ઇરાનનો વળતો પ્રહાર
અમેરિકી સૈન્યએ જ્યારે પોતાનું ઓપરેશન પૂરું થયાની જાહેરાત કરી, ત્યારે તેને લાગ્યું કે આ પ્રકરણ અહીં સમાપ્ત થઈ ગયું છે. પરંતુ, ઈરાનનો વળતો પ્રહાર ખૂબ જ ઝડપી અને આક્રમક રહ્યો. ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) એ આ હુમલાને ઉશ્કેરણીજનક ગણાવીને તુરંત જ બદલો લેવાની જાહેરાત કરી.
યુએસ નેવીના પાંચમા ફ્લીટ પર ડ્રોનથી હુમલો
IRGC એ દાવો કર્યો છે કે તેમણે મંગળવારે વહેલી સવારે 2:30 વાગ્યે બહેરીનમાં સ્થિત યુએસ નેવીના પાંચમા ફ્લીટ પર ડ્રોનથી હુમલો કર્યો છે. આ ઉપરાંત, જોર્ડનમાં આવેલા અમેરિકી સૈન્ય મથકોને પણ મિસાઈલ દ્વારા નિશાન બનાવવામાં આવ્યા હોવાના અહેવાલો છે. ઈરાની મીડિયાના જણાવ્યા અનુસાર, અમેરિકી હુમલામાં સિરિકમાં ટેલિકોમ્યુનિકેશન માસ્ટ અને પાણીની ટાંકીઓને નુકસાન થયું હતું, જેના જવાબમાં આ કાર્યવાહી કરવામાં આવી છે.
ઇરાનની અમેરિકાને ચેતવણી
આ ઘટનાક્રમ પછી બહેરીનમાં હાઈ એલર્ટ જાહેર કરવામાં આવ્યું છે અને નાગરિકોને સુરક્ષાના ભાગરૂપે ઘરમાં રહેવાની સૂચના આપવામાં આવી છે. ઈરાને સ્પષ્ટ ચીમકી આપી છે કે જો અમેરિકા દ્વારા હુમલા ચાલુ રહેશે, તો તેનાથી પણ વધુ ભયાનક પરિણામો ભોગવવા પડશે.
શાંતિની તમામ આશાઓ પર પાણી ફેરવાયું
આ ઘટનાએ સમગ્ર મધ્ય પૂર્વમાં અનિશ્ચિતતાનું વાતાવરણ ઊભું કર્યું છે. બંને દેશો વચ્ચેની 'બદલાની આ નીતિ'એ શાંતિની તમામ આશાઓ પર પાણી ફેરવી દીધું છે. સૈન્ય નિષ્ણાતો માને છે કે જો આ પરિસ્થિતિને વહેલી તકે કાબૂમાં લેવામાં નહીં આવે, તો આ સંઘર્ષ સમગ્ર પ્રદેશમાં એક મોટા યુદ્ધમાં પરિણમી શકે છે. હાલમાં, આંતરરાષ્ટ્રીય સમુદાય આ સ્થિતિ પર નજર રાખી રહ્યો છે, કારણ કે દરેક પસાર થતી મિનિટ સાથે આ ક્ષેત્રમાં તણાવ વધુ ઘેરો બની રહ્યો છે.
આ પણ વાંચોઃ Volacanic Eruption: કેમ અમુક સ્થળે જ હોય છે જ્વાળામુખી, પૃથ્વીના પેટાળમાં રહેલા લાવાનું શું છે રહસ્ય?, જાણો
