મધ્ય-પૂર્વમાં શાંતિની આશાઓ ફરી એકવાર ધૂંધળી બની ગઈ છે. ઈરાન, ઈઝરાયલ અને અમેરિકા વચ્ચે ચાલી રહેલા લાંબા સમયના સંઘર્ષમાં હવે એક નવો અને ખતરનાક વળાંક આવ્યો છે. ઈરાને ઈઝરાયલ પર એક શક્તિશાળી મિસાઈલ હુમલો કરીને પ્રદેશમાં તણાવને પરાકાષ્ઠાએ પહોંચાડી દીધો છે.
ઇઝરાયલે લેબનોન પર હુમલા શરૂ કર્યા
આ સમગ્ર વિવાદની શરૂઆત ત્યારે થઈ જ્યારે ઈઝરાયલે લેબનોનની રાજધાની બેરૂતના દક્ષિણ ઉપનગરોમાં હિઝબુલ્લાહના લક્ષ્યોને ટાંકીને હવાઈ હુમલા કર્યા. ઈઝરાયલનો દાવો છે કે હિઝબુલ્લાહ દ્વારા ઉત્તરી ઈઝરાયલ પર કરવામાં આવેલા હુમલાના જવાબમાં આ કાર્યવાહી કરવામાં આવી હતી. લેબનીઝ આરોગ્ય મંત્રાલયના અહેવાલ મુજબ, આ હુમલામાં બે લોકોના મોત થયા છે અને ૨૦ લોકો ઘાયલ થયા છે. આ ઘટના બાદ તેહરાને તરત જ બદલો લેવાની ચેતવણી આપી હતી.
ઈરાનનો મિસાઈલ મારો
ઈરાને પોતાની ચેતવણીને અમલમાં મૂકતા ગત મોડી રાત્રે ઈઝરાયલ પર મિસાઈલોનો વરસાદ કર્યો હતો. ઈઝરાયલના કબજા હેઠળના પશ્ચિમ કાંઠાના આકાશમાં મિસાઈલોનો મારો સ્પષ્ટપણે જોઈ શકાતો હતો. એપ્રિલની શરૂઆતમાં થયેલા નાજુક યુદ્ધવિરામ બાદ ઈરાન દ્વારા કરવામાં આવેલો આ પ્રથમ મોટો હુમલો છે, જેણે પ્રદેશની સ્થિતિને અત્યંત ગંભીર બનાવી દીધી છે. જોકે, અત્યાર સુધી કોઈ જાનહાનિના અહેવાલ નથી, પરંતુ આ ઘટનાએ સમગ્ર વિશ્વને ચિંતામાં મૂકી દીધું છે.
આંતરરાષ્ટ્રીય પ્રતિક્રિયા અને યુદ્ધવિરામ પર સંકટ
આ ઘટનાક્રમ પર યુએસ પ્રમુખ ડોનાલ્ડ ટ્રમ્પે આકરા શબ્દોમાં પ્રતિક્રિયા આપી છે. તેમણે ઈરાનને હુમલા બંધ કરવાની સ્પષ્ટ ચેતવણી આપતા જણાવ્યું છે કે, જો આ પ્રવૃત્તિઓ ચાલુ રહેશે, તો યુદ્ધવિરામ કરાર હંમેશ માટે અટકી શકે છે. ઈઝરાયલે પણ ઈરાનને ગંભીર પરિણામો ભોગવવાની અને બદલો લેવાની ધમકી આપી છે.
યુદ્ધવિરામ હિઝબુલ્લાહે સ્વીકારવાનો કર્યો ઇનકાર
તર્ક એવો છે કે અમેરિકા દ્વારા મધ્યસ્થી કરીને લેબનોન અને ઈઝરાયલ વચ્ચે યુદ્ધવિરામની વાટાઘાટો ચાલી રહી હતી, પરંતુ હિઝબુલ્લાહે આ કરારને સ્વીકારવાનો ઈનકાર કરી દીધો છે. પરિણામે, યુદ્ધ સમાપ્ત કરવાના તમામ રાજદ્વારી પ્રયાસો નિષ્ફળ જઈ રહ્યા હોય તેમ લાગી રહ્યું છે.
આ પણ વાંચોઃ Israel Lebanon Conflicts: ઇઝરાયલનો લેબેનાન પર મોટો હુમલો, બેરૂતમાં હિઝબુલ્લાહનું કમાન્ડ સેન્ટર ધ્વસ્ત
