અમેરિકા અને ઇઝરાયલ દ્વારા કરવામાં આવેલા સૈન્ય હુમલાઓ પછી ઈરાનમાં સ્થિતિ સતત બગડી રહી છે. ઈરાનની રેડ ક્રેસેન્ટ સોસાયટીના જણાવ્યા અનુસાર, છેલ્લા કેટલાક દિવસોમાં દેશભરના 153 શહેરો અને 500થી વધુ સ્થળોએ 1000થી વધુ હુમલાઓ થયા છે. આ હુમલાઓમાં કુલ 787 લોકોના મોત થયા હોવાનો દાવો કરવામાં આવ્યો છે.

ઇસ્ફહાન શહેરોમાં ભારે વિસ્ફોટોના અહેવાલ

તેહરાનના પશ્ચિમમાં આવેલા કારાજ અને મધ્ય ઈરાનના ઇસ્ફહાન શહેરોમાં ભારે વિસ્ફોટોના અહેવાલ મળ્યા છે. બચાવ ટીમો સતત કાર્યરત છે અને અનેક સ્થળોએ ઈમારતોને નુકસાન થયું છે. ઈરાન સરકારે આ હુમલાઓને આંતરરાષ્ટ્રીય કાયદાનો ભંગ ગણાવ્યો છે.

ઈરાન દ્વારા મિસાઈલ હુમલાઓ

બીજી તરફ, ઇઝરાયલ પર પણ ઈરાન દ્વારા મિસાઈલ હુમલાઓ કરવામાં આવ્યા છે. ઇઝરાયલમાં 11 લોકોના મોત થયા હોવાના અહેવાલ છે. ઈરાન સમર્થિત હિઝબુલ્લાહે પણ ઇઝરાયલ પર હુમલા કર્યા છે, જેના જવાબમાં ઇઝરાયલે લેબનોનમાં હવાઈ હુમલા કર્યા. લેબનોનમાં ૫૨ લોકોના મોત થયા છે. અમેરિકી સેનાએ 6 અમેરિકન સૈનિકોના મોતની પુષ્ટિ કરી છે. સાથે જ સંયુક્ત આરબ અમીરાતમાં ત્રણ લોકો, જ્યારે કુવૈત અને બહેરીનમાં એક-એક વ્યક્તિના મોતના અહેવાલ મળ્યા છે. સંઘર્ષ હવે સમગ્ર મધ્ય પૂર્વમાં ફેલાતો દેખાઈ રહ્યો છે.

પરમાણુ સુવિધાઓ પર હુમલો

સંઘર્ષ દરમિયાન ઈરાનની પરમાણુ સુવિધાઓને પણ નિશાન બનાવવામાં આવી છે. આંતરરાષ્ટ્રીય પરમાણુ ઊર્જા એજન્સી International Atomic Energy Agency (IAEA) એ જણાવ્યું છે કે Natanz Nuclear Facilityને થોડું નુકસાન થયું છે, પરંતુ હાલમાં કોઈ કિરણોત્સર્ગી જોખમ નથી. ઇઝરાયલના વડાપ્રધાન Benjamin Netanyahuએ દાવો કર્યો છે કે ઈરાન ગુપ્ત રીતે નવી ભૂગર્ભ પરમાણુ સુવિધાઓ બનાવી રહ્યું છે. જોકે આ દાવા અંગે કોઈ સત્તાવાર પુરાવા રજૂ કરવામાં આવ્યા નથી.

અમેરિકાનો કડક સંદેશ

અમેરિકાના રાષ્ટ્રપતિ Donald Trumpએ જણાવ્યું છે કે ઈરાન સામેની કાર્યવાહી ચારથી પાંચ અઠવાડિયા સુધી ચાલી શકે છે અને જરૂર પડશે તો વધુ સમય સુધી પણ ચાલુ રહેશે. તેમણે દાવો કર્યો કે અમેરિકા પાસે અમર્યાદિત શસ્ત્રો છે. ઈરાને પણ બદલો લેતા સંયુક્ત આરબ અમીરાત અને બહેરીનમાં સ્થિત એમેઝોન ડેટા સેન્ટરોને નિશાન બનાવ્યા હોવાના અહેવાલ છે. કતાર અને સાઉદી અરેબિયામાં ઊર્જા સુવિધાઓ પર પણ હુમલાઓ થયા છે.

હોર્મુઝ સ્ટ્રેટમાં તણાવ

Strait of Hormuzમાં જહાજો પર થતા હુમલાઓને કારણે વૈશ્વિક બજારમાં તેલ અને ગેસના ભાવમાં વધારો થયો છે. ઈરાની અધિકારીઓએ ચેતવણી આપી છે કે સ્ટ્રેટ બંધ કરી શકાય છે, જે વૈશ્વિક વેપાર માટે મોટી અસરકારક સાબિત થઈ શકે છે. ઇઝરાયલે દક્ષિણ લેબનોનમાં વધારાના સૈનિકો મોકલ્યા છે અને બેરૂતમાં હવાઈ હુમલાઓ કર્યા છે. લેબનીઝ સેનાએ કેટલીક સરહદી ચોકીઓ ખાલી કરાવી છે. હિઝબુલ્લાહે જણાવ્યું છે કે તેઓ પાસે લડવા સિવાય કોઈ વિકલ્પ નથી.

આ પણ વાંચો : Iran Israel war : સમય આવી ગયો છે! ઈરાન હુમલા બાદ પાકિસ્તાનમાં સરકાર સામે ઉગ્ર વિરોધ