મધ્ય પૂર્વમાં ચાલી રહેલું યુદ્ધ છઠ્ઠા દિવસે અત્યંત ભયાનક સ્તર પર પહોંચી ગયું છે. ઇઝરાયલી વાયુસેનાએ રાતોરાત ઈરાન પર અત્યાર સુધીનો સૌથી મોટો હવાઈ હુમલો કર્યો છે. આ ઓપરેશનમાં 100 થી વધુ ફાઇટર જેટ્સ સામેલ હતા, જેણે તેહરાન સહિત ઈરાનના વિવિધ સૈન્ય મથકો પર 250 થી વધુ બોમ્બ ફેંક્યા હતા. અમેરિકાના સહયોગથી કરવામાં આવેલા આ હુમલાનો મુખ્ય ટાર્ગેટ પૂર્વી તેહરાનમાં આવેલું રિવોલ્યુશનરી ગાર્ડ્સ (IRGC) નું મુખ્યાલય હતું.
ઈરાનની સુરક્ષા સિસ્ટમ ધ્વસ્ત
ઇઝરાયલી સૈન્યના પ્રવક્તા બ્રિગેડિયર જનરલ એફી ડેફ્રીના જણાવ્યા અનુસાર, અત્યંત સચોટ ગુપ્ત માહિતીના આધારે આ ઓપરેશન પાર પાડવામાં આવ્યું છે. આ હુમલામાં માત્ર રિવોલ્યુશનરી ગાર્ડ્સ જ નહીં, પરંતુ ઈરાનની ગુપ્તચર એજન્સીઓ, આંતરિક સુરક્ષા દળો અને સાયબર યુદ્ધ એકમના મુખ્યાલયોનો પણ નાશ કરવામાં આવ્યો છે. ઇઝરાયલે દાવો કર્યો છે કે તેણે ઈરાનની આશરે 300 સંરક્ષણ પ્રણાલીઓ અને બેલિસ્ટિક મિસાઇલોને નષ્ટ કરી દીધી છે. એટલું જ નહીં, ઈરાનના પરમાણુ પ્લાન્ટની અંદર આવેલા કેટલાક સંવેદનશીલ સ્થળો પર પણ હુમલા કરવામાં આવ્યા હોવાના અહેવાલ છે.