ઇરાનની એક સિંગરને 74 કોરડા મારવાની સજા સંભળાવવામાં આવી છે. 29 વર્ષની સિંગર પરસ્તૂ અહમદીની માત્ર એટલી ભૂલ હતી કે તેણે ઓનલાઇન વાયરલ થયેલા કોન્સર્ટમાં હિજાબ વગર પરફોર્મન્સ આપી હતી. આ ઘટનાને લઈને દુનિયાભરના માનવાધિકાર સંગઠનો અને કલાકારોએ નિંદા કરી છે. પરસ્તૂ અહમદીને આ સજા એક લાઇવ સ્ટ્રીમ પરફોર્મન્સ માટે આપવામાં આવી, જેને ઓનલાઇન લાખો લોકોએ જોઈ હતી. કોન્સર્ટ સાથે જોડાયેલા મ્યુઝિશિયન સહિત પ્રોડક્શન ટીમના આઠ સભ્યોને પણ દોષિત ઠેરવવામાં આવ્યા.
ઇરાનની કોર્ટનો આદેશ
ઇરાની અદાલતે 74 કોરડા મારવાની સજા, ઇરાન છોડવા પર બે વર્ષનો પ્રતિબંધ અને કલાત્મક પ્રવૃત્તિઓ પર બે વર્ષનો પ્રતિબંધ લગાવ્યો છે. આરોપોમાં ઓનલાઇન અશ્લીલ અને અનૈતિક સામગ્રીના નિર્માણ અને પ્રકાશનના માધ્યમથી જાહેર શાલીનતાનું ઉલ્લંઘન કરવું સામેલ હતું.
મામલો ક્યારનો છે?
આ મામલો ડિસેમ્બર 2024 માં યોજાયેલા એક કાર્યક્રમ સાથે જોડાયેલો છે, જેમાં અહમદીએ હિજાબ વગર દેશભક્તિ ગીત અઝ ખૂને જવાનાને વતન ગાયું હતું. આ કાર્યક્રમનું સીધું પ્રસારણ તેની યુટ્યુબ ચેનલ પર કરવામાં આવ્યું હતું અને તે વાયરલ થઈ ગયું હતું. પરફોર્મન્સ જાહેર થયા પછી અહમદી અને ઘણા સંગીતકારોને કસ્ટડીમાં લેવામાં આવ્યા હતા. બાદમાં તેમને મુક્ત કરવામાં આવ્યા. અધિકારીઓએ વીડિયોને લઈને ઔપચારિક કાનૂની મામલો નોંધ્યો.
ઇરાની કોર્ટના આદેશ પર સવાલ
અમેરિકા સ્થિત સેન્ટર ફોર હ્યુમન રાઇટ્સ ઇન ઇરાનમાં એડવોકેસી ડિરેક્ટર બહાર ગંદેહારીએ કહ્યું, માત્ર ગીત ગાવા અને હિજાબ વગર દેખાવા માટે અહમદીને 74 કોરડા મારવાની સજા - એ વાતનું ઉદાહરણ છે કે ઇરાનમાં માનવાધિકારની સ્થિતિમાં કોઈ બદલાવ આવ્યો નથી, ભલે ઇરાની અધિકારીઓએ પોતાની છબી સુધારવા માટે યુદ્ધ-કાલીન પ્રોપેગેન્ડા અભિયાન ચલાવ્યું હોય.
માનવાધિકાર વકીલ મોઈન ખઝૈલીએ પણ ફેંસલાના કાનૂની આધાર પર સવાલ ઉઠાવ્યો. તેમણે કહ્યું, ઇરાની ફોજદારી કાયદા હેઠળ મહિલાઓ દ્વારા ગાયન, સંગીત પ્રદર્શન અને સંગીત રચનાઓનું નિર્માણ કે પ્રસારણ કરવું ગુનો નથી. તેથી, આવી પ્રવૃત્તિઓને અશ્લીલ સામગ્રીનું નિર્માણ, વિતરણ કે પ્રકાશન માની શકાય નહીં.
ઇરાની કલાકારોએ પણ ઉઠાવ્યો વિરોધનો અવાજ
આ નિર્ણયની ઇરાની કલા જગતની અગ્રણી હસ્તીઓએ પણ આલોચના કરી છે. ઇરાની-બ્રિટિશ અભિનેત્રી નાઝાનિન બોનિયાદીએ કહ્યું, ગાયિકા પરસ્તૂ અહમદીને જાહેરરૂપે હિજાબ વગર ગાવા માટે કોરડા મારવાની સજા આપવી એ વાતનો સ્પષ્ટ પુરાવો છે કે વોશિંગ્ટનમાં ઇરાનના 'નવા શાસન' ની ચર્ચા હોવા છતાં, ઇસ્લામિક પ્રજાસત્તાકની દમનકારી વ્યવસ્થામાં કોઈ બદલાવ આવ્યો નથી. એક એવા શાસનને સહન કરવું જે મહિલાઓને તેમના અવાજ માટે કોરડા મારે છે અને પોતાના અધિકારોની માંગ કરનારા નાગરિકોની હત્યા કરે છે, તેને પોતાના અત્યાચારી માર્ગ પર આગળ વધવા માટે વધુ પ્રોત્સાહિત કરે છે.
આ પણ વાંચો-Tanmay Vekaria : એક સમયે ખિસ્સામાં હતા ફક્ત 700 રૂપિયા, આજે લોકપ્રિયતાના શિખરે છે TMKOCના બાઘા!
