માહિતી અનુસાર, પુણેના લગભગ 90 એમબીએ વિદ્યાર્થી અને ઠાણેના 23 લોકો દુબઈમાં ફસાયા છે. વિસ્તારમાં વધતા સૈન્ય અથડામણ અને અનેક દેશોના હવાઈ ક્ષેત્ર આંશિક રીતે બંધ થવાને કારણે ફ્લાઇટ સેવાઓ પ્રભાવિત થઈ છે, જેના પરિણામે સેંકડો મુસાફરોની અવરજવર અટકી ગઈ છે.
સૂત્રોના જણાવ્યા મુજબ, આ વિદ્યાર્થીઓ શૈક્ષણિક કાર્યક્રમ અને ઔદ્યોગિક મુલાકાત માટે દુબઈ ગયા હતા, જ્યારે ઠાણેના લોકો પર્યટન અને ખાનગી કામકાજ માટે ત્યાં પહોંચ્યા હતા. પરંતુ અચાનક વધેલા સુરક્ષા જોખમ અને ફ્લાઇટ રદ થવાને કારણે તેમની વતન વાપસી અટકી ગઈ છે. અનેક એરલાઈન્સે સુરક્ષા કારણોસર ફ્લાઇટ રદ કરી દીધી છે અથવા ફરીથી શેડ્યૂલ કરી છે, જેના કારણે મુસાફરોને એરપોર્ટ અને હોટેલોમાં રાહ જોવી પડી રહી છે.
પરિજનો દ્વારા ભારત સરકાર પાસે તાત્કાલિક હસ્તક્ષેપની માગ કરવામાં આવી છે. તેઓનું કહેવું છે કે બાળકો અને પરિવારજનોની સુરક્ષાને લઈને ચિંતા વધી રહી છે. વિદેશ મંત્રાલય પરિસ્થિતિ પર નજર રાખી રહ્યું છે અને દુબઈ સ્થિત ભારતીય દૂતાવાસ સાથે સંપર્કમાં છે. અધિકારીઓએ જણાવ્યું છે કે હવાઈ માર્ગ સુરક્ષિત બનતા જ ફસાયેલા ભારતીયોની વતન વાપસી સુનિશ્ચિત કરવામાં આવશે.
મિડલ ઈસ્ટમાં તણાવને કારણે આંતરરાષ્ટ્રીય ફ્લાઇટોના રૂટ પણ બદલવામાં આવ્યા છે. અનેક વિમાનો વૈકલ્પિક માર્ગથી લાંબી મુસાફરી કરી રહ્યા છે, જેના કારણે ભાડું અને મુસાફરીનો સમય બંને વધ્યા છે. ટ્રાવેલ એજન્સીઓનું કહેવું છે કે આગામી કેટલાક દિવસો સુધી પરિસ્થિતિ સામાન્ય ન થાય ત્યાં સુધી ફ્લાઇટ સેવાઓ પ્રભાવિત રહી શકે છે.
આ દરમિયાન નિષ્ણાતોનું માનવું છે કે પ્રાદેશિક અસ્થિરતાનો પ્રભાવ વૈશ્વિક મુસાફરી અને વેપાર પર પણ પડશે. હાલ તમામની નજર પરિસ્થિતિ વહેલી તકે સામાન્ય થવા પર છે.
આ પણ વાંચો: Israel Iran War: PM મોદીએ બેન્જામિન નેતન્યાહૂ સાથે ફોન પર કરી વાત, શત્રુતાની શીધ્ર સમાપ્તિ કરો