અમેરિકા અને ઈરાન વચ્ચે વધતા તણાવને ડામવા માટે રાજદ્વારી પ્રયાસો તેજ થયા છે. અમેરિકી ઉપરાષ્ટ્રપતિ જેડી વેન્સ મંગળવારે પાકિસ્તાનના ઇસ્લામાબાદ પહોંચશે. આ બેઠક એટલા માટે મહત્વની છે કારણ કે 8 એપ્રિલથી શરૂ થયેલું બે અઠવાડિયાનું સીઝફાયર આગામી 22 એપ્રિલના પૂર્ણ થઈ રહ્યું છે.
પાકિસ્તાન, ઇજિપ્ત અને તુર્કીનું દબાણ
સૂત્રોના જણાવ્યા અનુસાર, ઈરાનના સુપ્રીમ લીડર મુજતબા ખામનેઈએ લાંબી ખેંચતાણ બાદ શાંતિ વાટાઘાટોમાં ડેલિગેશન મોકલવાની મંજૂરી આપી દીધી છે. નોંધનીય છે કે ઈરાનની અંદર આ મુદ્દે ભારે વિવાદ હતો. ઈસ્લામિક રિવોલ્યુશનરી ગાર્ડ્સ (IRGC) ઈચ્છતું હતું કે જ્યાં સુધી અમેરિકા પ્રતિબંધો ન હટાવે ત્યાં સુધી કોઈ વાતચીત ન થાય, પરંતુ પાકિસ્તાન, ઇજિપ્ત અને તુર્કીના દબાણ બાદ ઈરાન નમતું જોખવા તૈયાર થયું છે.
