ઇઝરાયેલની ડેમોક્રેટિક પાર્ટીના નેતા યાયર ગોલાને ઈરાનના સર્વોચ્ચ નેતા અયાતુલ્લા અલી ખામૈનીની હત્યા પર સવાલ ઉઠાવ્યા છે અને તેને ઇઝરાયેલ માટે એક ભૂલ ગણાવી છે. એક અહેવાલ મુજબ, ગોલાને સ્પષ્ટપણે જણાવ્યું હતું કે યુએસ-ઇઝરાયેલ યુદ્ધની શરૂઆતમાં ખામૈનીને નિશાન બનાવવાથી ઇઝરાયેલના રાષ્ટ્રીય હિતોને કોઈ નક્કર લાભ થયો નથી.
ગોલાને કહ્યું, "હું દ્રઢપણે માનું છું કે ખામૈનીનો ખાતમો કરવો એ એક ભૂલ હતી. એટલા માટે નહીં કે તેઓ આવા અંતને પાત્ર નહોતા, પરંતુ એટલા માટે કે તેનાથી ઇઝરાયેલના હિતોને કોઈ વાસ્તવિક લાભ થયો નથી." તેમણે વડાપ્રધાન બેન્જામિન નેતન્યાહુના ઈરાની સરકારને સંપૂર્ણપણે ઉથલાવી પાડવાના લક્ષ્યને પણ સંપૂર્ણપણે અવાસ્તવિક ગણાવીને ફગાવી દીધું હતું.
ઉલ્લેખનીય છે કે 86 વર્ષીય અલી ખામૈનીનું મૃત્યુ 28 ફેબ્રુઆરીએ એટલે કે યુદ્ધના પ્રથમ દિવસે જ તેહરાનમાં તેમના નેતૃત્વ સંકુલ પર કરવામાં આવેલા સંયુક્ત યુએસ-ઇઝરાયેલ હવાઈ હુમલામાં થયું હતું. આ હુમલામાં ઈરાનના અન્ય ઘણા ટોચના લશ્કરી અને વહીવટી અધિકારીઓ પણ માર્યા ગયા હતા. જેનાથી દેશ પર ખામૈનીના દાયકાઓ લાંબા શાસનનો અંત આવ્યો હતો.
પોતાના કાર્યકાળ દરમિયાન, ખામૈનીએ ઈરાનના સશસ્ત્ર દળો અને પ્રાદેશિક પ્રોક્સી નેટવર્ક્સ પર મજબૂત નેતૃત્વ જાળવી રાખ્યું હતું. તેમના મૃત્યુ બાદ તેમના પુત્ર મોજતાબા ખામૈનીએ ઈરાનની કમાન સંભાળી છે. મોજતાબાને તેમના પિતાની સરખામણીમાં જોખમ લેવાનું ઓછું પસંદ કરતા નેતા માનવામાં આવે છે. પદ સંભાળ્યા પછી તેમણે જાહેર કાર્યક્રમોમાં હાજરી આપવાને બદલે મુખ્યત્વે લેખિત નિવેદનો દ્વારા શાસન ચલાવ્યું છે.
આ પણ વાંચો: Sonam Wangchuk નું અચાનક બદલાયું વલણ... વિરોધ પ્રદર્શનથી દૂર રહ્યા, હવે આપી દીધી આવી પ્રતિક્રિયા