બ્રિટનના વિઝા મેળવવો મુશ્કેલ બની શકે છે. વિવિધ ક્ષેત્રોમાં વિદેશી કામદારોની ભરતીને રોકવા માટે બ્રિટિશ સરકારે મંગળવારે સંસદના નીચલા ગૃહ, હાઉસ ઓફ કોમન્સમાં કડક વિઝા ધોરણો સાથેનો બિલ રજૂ કર્યો.
સંસદની મંજૂરી પછી 22 જુલાઈથી અમલમાં આવશે આ ફેરફારો
નવા નિયમો મે મહિનામાં 'ઈમિગ્રેશન શ્વેતપત્ર'માં પ્રસ્તાવિત કરવામાં આવ્યા હતા. આ ફેરફારો સંસદની મંજૂરી પછી 22 જુલાઈથી અમલમાં આવશે. વિઝા પર રોક લગાવીને તેનો હેતુ ઓછા પગારવાળી નોકરીઓ માટે સ્નાતક સ્તર અથવા તેનાથી ઉપરની લાયકાત ધરાવતા કામદારોને આકર્ષવાનો છે.
આ કાયદાથી ભારતીયો પણ ખૂબ પ્રભાવિત થશે. બ્રિટનના ગૃહ સચિવ યવેટ કૂપરે કહ્યું હતું કે યોગ્ય નિયંત્રણ અને વ્યવસ્થા પુનઃસ્થાપિત કરવા માટે અમે અમારી ઈમિગ્રેશન સિસ્ટમમાં સંપૂર્ણપણે ફેરફાર કરી રહ્યા છીએ, કારણ કે પાછલી સરકારે ચાર વર્ષમાં ઈમિગ્રેશનમાં ચાર ગણો વધારો કર્યો હતો.
વિઝા માટે પગારની આવશ્યકતામાં કરવામાં આવી રહ્યો છે વધારો
અરજી માટે આ ફેરફારો અમલમાં આવ્યા પછી સ્નાતકની ડિગ્રી અથવા તેની સમકક્ષ લાયકાત જરૂરી છે. બ્રિટનમાં પહેલાથી જ રહેલા કુશળ કામદારોને આ નિયમમાંથી મુક્તિ આપવામાં આવશે. રાષ્ટ્રીય આંકડા કાર્યાલયના લેટેસ્ટ ડેટા મુજબ વર્ક વિઝા માટે પગારની આવશ્યકતાઓમાં વધારો કરવામાં આવી રહ્યો છે.
વિદેશમાં સામાજિક સંભાળ કાર્યકર પદો માટે ભરતી 22 જુલાઈના રોજ બંધ થશે. નવી વિદેશ અરજીઓ હવે સ્વીકારવામાં આવશે નહીં. પરંતુ યુકેમાં પહેલાથી જ રહેલા સંભાળ કાર્યકર્તાઓને આ નિયમથી જુલાઈ 2028 સુધી ત્રણ વર્ષની રાહત આપવામાં આવશે.
અંગ્રેજી ભાષાની આવશ્યકતાને વધુ કડક બનાવવાનો નિયમ સામેલ
શ્વેતપત્રમાં ભલામણો અંગેના નવા નિયમો પણ આ વર્ષના અંત સુધીમાં લાગુ કરવામાં આવશે, જેમાં વિદેશી કામદારોને રોજગારી આપતી કંપનીઓ પર ઈમિગ્રેશન સ્કિલ ફીમાં વધારો અને વિઝા અરજદારો માટે અંગ્રેજી ભાષાની આવશ્યકતાઓને કડક બનાવવાનો સમાવેશ થાય છે.
Disclaimer: અહીં આપેલી તમામ માહિતી માત્ર જાણકારી માટે છે. સંદેશ ન્યૂઝ તેની પુષ્ટિ કરતું નથી.
