બ્રાઝિલના અનુભવી ડાબેરી નેતા લુઇઝ ઇનાસિયો લુલા દા સિલ્વાએ ઐતિહાસિક જીત નોંધાવીને ચોથી વખત દેશના રાષ્ટ્રપતિ બનવાની સિદ્ધિ હાંસલ કરી છે. 80 વર્ષની ઉંમરે રન-ઓફ (બીજા તબક્કાની) ચૂંટણીમાં તેમણે પોતાના હરીફ ફ્લાવિયો બોલ્સોનારોને આકરા મુકાબલામાં પરાજય આપ્યો હતો. બ્રાઝિલિયન મીડિયા અને ડેટાફોલ્હાના અંદાજ મુજબ, રન-ઓફ ચૂંટણીમાં લુલાને 51.76 ટકા માન્ય મત મળ્યા હતા, જ્યારે ફ્લાવિયો બોલ્સોનારોને 48.24 ટકા મત પ્રાપ્ત થયા હતા.
લોકશાહી ઇતિહાસમાં અભૂતપૂર્વ સફળતા
આ જીત સાથે જ ભૂતપૂર્વ ફેક્ટરી કામદાર અને વર્કર્સ પાર્ટીના સ્થાપક લુલા બ્રાઝિલના ઇતિહાસમાં ગેટુલિયો વર્ગાસ પછી બીજા સૌથી લાંબા સમય સુધી સેવા આપનારા રાષ્ટ્રપતિ બનશે. પોતાના વર્તમાન કાર્યકાળના અંત સુધીમાં સત્તામાં તેમનો કુલ સમયગાળો 16 વર્ષ સુધી પહોંચી જશે, જે દેશના લોકશાહી ઇતિહાસમાં એક અનોખો રેકોર્ડ છે. 1989 માં સીધી રાષ્ટ્રપતિ ચૂંટણી પ્રક્રિયા પુનઃશરૂ થયા બાદ, પ્રથમ રાઉન્ડમાં બીજા ક્રમે રહ્યા બાદ પણ બીજા તબક્કામાં પલટવાર કરીને આખરી જીત મેળવનાર તેઓ પ્રથમ ઉમેદવાર બન્યા છે.
મુદ્દાઓથી ભરેલો ચૂંટણી જંગ
બ્રાઝિલમાં આ વખતનો ચૂંટણી પ્રચાર મોંઘવારી, જીવનનિર્વાહનો વધતો ખર્ચ, ભ્રષ્ટાચાર અને ગુનાખોરી જેવા ગંભીર મુદ્દાઓથી ઘેરાયેલો હતો. ફ્લાવિયો બોલ્સોનારોએ ગુનાઓ પર કડક નિયંત્રણ અને ખાદ્યપદાર્થોના ભાવ ઘટાડવાનું વચન આપ્યું હતું, જ્યારે લુલાએ બ્રાઝિલની સાર્વભૌમત્વ અને સ્વતંત્ર વિદેશ નીતિ રજૂ કરી હતી. નોંધનીય છે કે લુલા 2003 થી 2010 સુધી રાષ્ટ્રપતિ રહ્યા હતા અને ભૂતકાળમાં ભ્રષ્ટાચારના આરોપો હેઠળ એક વર્ષથી વધુ સમય જેલમાં વિતાવ્યો હતો, પરંતુ બાદમાં તમામ આરોપો રદ કરવામાં આવ્યા હતા.
વૈશ્વિક સ્તરે જીતની અસર
રવિવારે મતદાનના દિવસે ભારે ગતિવિધિઓ જોવા મળી હતી અને બંને ઉમેદવારોની અરજી બાદ મતદાનનો સમય બે કલાક લંબાવવામાં આવ્યો હતો. વિશ્લેષકોના મત પ્રમાણે લુલાની આ સફળતા બ્રાઝિલ પૂરતી સીમિત ન રહેતા વૈશ્વિક રાજકારણ પર પણ ઊંડી અસર છોડશે. લુલાના નેતૃત્વ હેઠળ લેટિન અમેરિકાનો આ સૌથી મોટો દેશ વધુ સ્વતંત્ર વિદેશ નીતિ અપનાવશે, જે ગ્લોબલ સાઉથ (વિકાસશીલ દેશો) અને ચીન સાથેના સંબંધોને વધુ મજબૂત બનાવવામાં મદદરૂપ થશે.
Lula da Silva Wins 4th Term as Brazil President at 80
