રશિયા અને યુક્રેન વચ્ચે છેલ્લા કેટલાક વર્ષોથી ચાલી રહેલા ભીષણ યુદ્ધનો અંત લાવવા માટે હવે વૈશ્વિક સ્તરે અત્યાર સુધીના સૌથી મોટા શાંતિ પ્રયાસો શરૂ થયા હોય તેવા સંકેતો મળી રહ્યા છે. અમેરિકાના રાષ્ટ્રપતિ ડોનાલ્ડ ટ્રમ્પ અને રશિયાના રાષ્ટ્રપતિ વ્લાદિમીર પુતિન વચ્ચે ટેલિફોન પર આશરે 90 મિનિટ (85 મિનિટ) સુધી અત્યંત મહત્વપૂર્ણ અને રચનાત્મક વાતચીત થઈ છે. આ હાઈ-પ્રોફાઈલ વાતચીત માત્ર એક ઔપચારિકતા નહોતી, પરંતુ તેમાં બંને દેશો વચ્ચેના દ્વિપક્ષય સંબંધો અને યુક્રેન સંકટના કાયમી ઉકેલ અંગે ઊંડાણપૂર્વક ચર્ચા કરવામાં આવી હતી. આ વર્ષે બંને વૈશ્વિક નેતાઓ વચ્ચે આ ચોથી વાતચીત છે, જે દર્શાવે છે કે બંને દેશો હવે વણસેલી પરિસ્થિતિને સુધારવા માટે ગંભીર છે.
યુક્રેન યુદ્ધનો અંત લાવવા ટ્રમ્પનો પ્રયાસ
વાતચીત દરમિયાન અમેરિકી રાષ્ટ્રપતિ ડોનાલ્ડ ટ્રમ્પે રશિયન રાષ્ટ્રપતિ પુતિનને અમેરિકાના 250મા સ્થાપના દિવસ એટલે કે સ્વાતંત્ર્ય દિવસની ઓનલાઈન શુભેચ્છાઓ પાઠવી હતી. આ સૌહાર્દપૂર્ણ વાતાવરણ વચ્ચે ટ્રમ્પે યુક્રેન યુદ્ધનો ઝડપથી અંત લાવવા અને આ સળગતી સમસ્યાના સમાધાન માટે મધ્યસ્થ તરીકે મદદ કરવાની સત્તાવાર ઓફર કરી છે. રશિયાના રાષ્ટ્રપતિના વરિષ્ઠ સહયોગી અને ક્રેમલિનના અધિકારી યુરી ઉશાકોવે મીડિયાને આ અંગેની સત્તાવાર માહિતી આપતા જણાવ્યું હતું કે, આ વાતચીત ખૂબ જ સકારાત્મક અને કામ પર કેન્દ્રિત રહી હતી.
જો કે, આ ચર્ચા દરમિયાન રાષ્ટ્રપતિ પુતિને યુદ્ધના મેદાનની વાસ્તવિક સ્થિતિ સ્પષ્ટ કરી હતી. તેમણે ટ્રમ્પને જણાવ્યું કે રશિયન સૈનિકો લાઈન ઓફ કોન્ટેક્ટ (સંપર્ક રેખા) પર સતત આગળ વધી રહ્યા છે અને મજબૂત પકડ બનાવી રહ્યા છે. ઉશાકોવે એવો પણ દાવો કર્યો હતો કે યુક્રેન સંઘર્ષ અને જમીની હકીકતોને લઈને યુરોપિયન દેશોની સમજ ઘણી ખોટી અને ભ્રમિત છે. આ મંત્રણાને આગળ વધારવા માટે ટ્રમ્પે આવતા અઠવાડિયે તુર્કીમાં યોજાનારી નાટો (NATO) સમિટમાં પોતાની ભાગીદારીના સંદર્ભમાં પણ વાત કરી હતી. તેમણે જણાવ્યું કે અમેરિકી દૂત સ્ટીવ વિટકોફ અને જેરેડ કુશનર સમજૂતી કરાવવા માટે પોતાની કોશિશો ચાલુ રાખશે અને તેઓ ટૂંક સમયમાં ફરી એકવાર મોસ્કોની મુલાકાત લઈ શકે છે.
યુક્રેન સંઘર્ષનો વહેલી તકે ઉકેલ લાવવો પડશે.
આ સંવાદમાં બંને નેતાઓએ સૈન્ય-રાજકીય અને આર્થિક મોરચે સતત સંપર્ક જાળવી રાખવાના મહત્વ પર ભાર મૂક્યો હતો. ટ્રમ્પે સ્પષ્ટ કર્યું હતું કે બંને દેશો વચ્ચે અરસપરસના આર્થિક સહયોગની ઘણી સંભાવનાઓ છે, પરંતુ તેની મુખ્ય શરત એ છે કે યુક્રેન સંઘર્ષનો વહેલી તકે ઉકેલ લાવવો પડશે. આ બધાની વચ્ચે, રશિયાના પ્રેસ સેક્રેટરી દિમીત્રી પેસ્કોવે સંકેત આપ્યો છે કે જો યુક્રેનના રાષ્ટ્રપતિ વોલોડિમિર જેલેન્સકી રશિયા દ્વારા નિર્ધારિત મહત્વપૂર્ણ અને જવાબદાર નિર્ણયો લેવા તૈયાર હોય, તો તેઓ મોસ્કો આવીને પુતિન સાથે મુલાકાત પણ કરી શકે છે.
