ભારતીય-અમેરિકન ડેમોક્રેટિક ઉમેદવાર પિયા દાંડિયાએ યુએસ મધ્યસત્ર ચૂંટણીમાં ભવ્ય વિજય મેળવ્યો છે. તેમણે ફ્લોરિડાના 22મા કોંગ્રેસનલ ડિસ્ટ્રિક્ટમાં રિપબ્લિકન ઉમેદવાર કેસી અસ્કરને હરાવીને આ સફળતા હાંસલ કરી છે. આ ચૂંટણીમાં પિયા દાંડિયાને 51.9% મત મળ્યા હતા, જ્યારે તેમના પ્રતિસ્પર્ધી કેસી અસ્કરને 48.1% મત મળ્યા હતા.
કોણ છે પિયા દાંડિયા?
36 વર્ષીય પિયા દાંડિયા ભારતીય-અમેરિકન માતાપિતાની પુત્રી છે અને તેમનો ઉછેર ફ્લોરિડાના પામ બીચ કાઉન્ટીમાં થયો છે. હાર્વર્ડ યુનિવર્સિટીમાં અભ્યાસ દરમિયાન તેમણે ભારતના ઝૂંપડપટ્ટી વિસ્તારોમાં બાળકો સાથે કામ કર્યું હતું, જેનાથી પ્રેરિત થઈને તેમણે શિક્ષણ ક્ષેત્રે કારકિર્દી બનાવવાનો નિર્ણય લીધો. માત્ર 28 વર્ષની ઉંમરે તેમણે ન્યૂ યોર્કના હાર્લેમમાં એક હાઇ સ્કૂલની સ્થાપના કરી હતી અને તેના પ્રિન્સિપાલ બન્યા હતા. તેમની શાળાના 100% વિદ્યાર્થીઓને કોલેજમાં પ્રવેશ મળ્યો છે. આ ઉપરાંત, તેમણે એપલ (Apple) કંપનીમાં અને વ્હાઇટ હાઉસ ફેલો તરીકે પણ મહત્વપૂર્ણ સેવાઓ આપેલી છે.
ચૂંટણીના મુખ્ય મુદ્દાઓ:
શિક્ષણ, જાહેર ખર્ચ અને સરકારી જવાબદારીને પિયા દાંડિયાએ પોતાના મુખ્ય પ્રચાર મુદ્દા બનાવ્યા હતા:
શિક્ષણ સુધારા: AI ના આધુનિક યુગમાં બાળકોના વાંચન, ગણિત અને ડિજિટલ સાક્ષરતામાં સુધારો કરવો.
મોંઘવારી અને પોષણક્ષમતા: દૈનિક જીવનનિર્વાહના ખર્ચમાં ઘટાડો કરવો તથા આરોગ્યસંભાળ અને સામાજિક સુરક્ષાનું રક્ષણ કરવું.
ભ્રષ્ટાચાર સામે લડાઈ: વોશિંગ્ટન ડી.સી.માં રાજકીય જવાબદારી નક્કી કરવી અને ભ્રષ્ટાચાર સામે મજબૂત અવાજ ઉઠાવવો.
"હું આગામી પેઢી માટે ચૂંટણી લડી રહી છું"
એક મુલાકાતમાં દાંડિયાએ જણાવ્યું હતું કે, "હું મારા વિદ્યાર્થીઓ અને મારા 3 વર્ષના પુત્રના સારા ભવિષ્ય માટે ચૂંટણી લડી રહી છું." તેમણે ઉમેર્યું કે દેશને હવે કાયદા અને દીર્ઘકાલીન પ્રાથમિકતાઓ પર ધ્યાન આપી શકે તેવા નવા નેતાઓની જરૂર છે. તેમણે આત્મવિશ્વાસ સાથે કહ્યું કે હાઇ સ્કૂલના પ્રિન્સિપાલ તરીકે તેઓ બિનજરૂરી બાબતો અને રાજકીય બકવાસને સ્પષ્ટ 'ના' કહેવાની ક્ષમતા ધરાવે છે.
આ પણ વાંચોઃ US Midterm Election 2026 result: શું અમેરિકામાં થશે સત્તા પરિવર્તન? ટ્રમ્પે એવું કેમ કહ્યુ કે હું હારીશ તો અમેરિકા બરબાદ થઇ જશે
