રશિયાને તેના ઉત્તર પૂર્વીય વિસ્તારમાં ચાંદીના બે મોટા ભંડાર મળ્યા છે. રશિયન ફેડરલ એજન્સી ફોર સબસોઇલ યુઝ દ્વારા શનિવારે આ મોટી શોધ વિશે માહિતી આપવામાં આવી હતી. મળી આવેલી શોધે રશિયાનાં ખનિજ ભંડારને વધુ મજબૂત બનાવશે. આ બંને ભંડાર રશિયાના બે અલગ-અલગ વિસ્તારોમાં મળ્યા છે, જેમાં અંદાજિત ચાંદીની માત્રા ખૂબ વધારે છે. ઝાબાઈકાલ્સ્કી ક્રાયમાં આવેલું ઉંગુરસ્કોયે ભંડાર અંદાજે 699.6 ટન ચાંદી ધરાવે છે જ્યારે મેગાદાન ઓબ્લાસ્ટના કેટગાલી ક્ષેત્રમાં અંદાજે 70.5 ટન ચાંદીનો ભંડાર છે.
અત્યાર સુધી 200થી વધુ નવા ખનજ ભંડાર મળ્યા
રશિયન કંપની પોલીમેટલ કેટગાલી ભંડારને વિકસાવવા માટેની યોજના બનાવી રહી છે. કંપની આ પ્રોજેક્ટ 2028માં શરૂ કરવાની તૈયારીમાં છે. તેમાં લગભગ 2.5 અબ રુબલ એટલે કે આશરે 32.2 મિલિયન અમેરિકી ડોલરનું રોકાણ થવાનું અનુમાન છે. આ પહેલા રશિયામાં 2025ની શરૂઆતથી અત્યાર સુધી 200થી વધુ નવા ઘન ખનિજ ભંડાર મળી ચૂક્યા છે. દર વર્ષે સરેરાશ 200 જેટલા નવા ખનિજ ભંડાર મળતા હોય છે, અને આ વર્ષ પણ એ જ ગતિથી આગળ વધી રહ્યું છે.