રશિયા અને યુક્રેન એક બીજા પર ડ્રોન અને મિસાઇલ હુમલાઓ વધારી રહ્યા છે. મોસ્કો તરફ વધી રહેલા 40 યુક્રેની ડ્રોન રશિયાએ મારી નાખ્યુ, જ્યારે યુક્રેનના રશિયા હુમલામાં બે નાગરિકોની મોતની પુષ્ટિ કરી. રાષ્ટ્રપતિ ઝેલેન્સકી ન્યૂયોર્કમાં સંયુક્ત રાષ્ટ્ર મહાસભામાં સમર્થન માગી રહ્યા છે. નાટોએ એસ્ટોનિયાની ફરિયાદ પર બેઠક બોલાવી છે.
યુદ્ધે ફરી એકવાર હિંસક વળાંક લીધો
રશિયા અને યુક્રેન વચ્ચે ચાલી રહેલા યુદ્ધે ફરી એકવાર હિંસક વળાંક લીધો છે. રશિયાએ દાવો કર્યો છે કે તેણે મોસ્કોની દિશામાં આવતા 40થી વધુ યુક્રેનિયન ડ્રોનને મારી નાખ્યા છે, જ્યારે યુક્રેને કહ્યું કે રશિયાના મિસાઇલ, ડ્રોન અને બોમ્બ હુમલામાં ઓછામાં ઓછા બે નાગરિકોના મોત થયા છે. આ દરમિયાન યુક્રેનના રાષ્ટ્રપતિ ઝેલેન્સ્કી ન્યુયોર્કમાં યોજાયેલી સંયુક્ત રાષ્ટ્ર મહાસભામાં તેમના દેશ માટે સમર્થન મેળવવા પ્રયત્નશીલ છે.
ઝેલેન્સ્કી આ સપ્તાહે ન્યુયોર્કમાં વૈશ્વિક નેતાઓ સાથે મુલાકાત કરી
સતત ત્રણ વર્ષથી વધુ સમયથી રશિયાના ભારે હુમલાનો સામનો કરતા યુક્રેનિયન સૈનિકોની સ્થિતિ નાજુક બની છે. ઝેલેન્સ્કી આ સપ્તાહે ન્યુયોર્કમાં વૈશ્વિક નેતાઓ સાથે મુલાકાત કરી રહ્યા છે. ટ્રમ્પ, જે હાલમાં અમેરિકાના રાષ્ટ્રપતિ છે, તેમની મધ્યસ્થતા પ્રયત્નો નિષ્ફળ રહ્યા છે. અલાસ્કામાં પુતિન અને ટ્રમ્પની મુલાકાત અને વ્હાઈટ હાઉસમાં ઝેલેન્સ્કી સાથે ચર્ચા છતાં પણ યુદ્ધ યથાવત્ છે.
અમેરિકન સહયોગ અંગે ચર્ચા
ઝેલેન્સ્કીએ જણાવ્યું કે તેમણે ટ્રમ્પના વિશેષ દૂત કીથ કેલોગ સાથે ન્યુયોર્કમાં મુલાકાત કરી. આ બેઠકમાં અમેરિકન હથિયારોની ખરીદી અને ડ્રોન નિર્માણમાં સહયોગ અંગે ચર્ચા થઈ. ઝેલેન્સ્કીએ કહ્યું કે આ સહયોગ યુક્રેનને યુદ્ધમાં ટેકનિકલ ઉન્નતિ આપી શકે છે.
યુરોપ અને નાટોની ચિંતા
યુરોપિયન દેશોએ ઝેલેન્સ્કીની કૂટનૈતિક કોશિશોનું સમર્થન કર્યું છે. જોકે, ઇઝરાયેલ-હમાસ યુદ્ધ પણ સંયુક્ત રાષ્ટ્રમાં મુખ્ય મુદ્દો બન્યો છે. એસ્ટોનિયાએ રશિયન ફાઈટર વિમાનો તેના હવાઇ વિસ્તારમાં ઘૂસ્યા હોવાનો આરોપ મૂક્યો છે, જેના પર નાટોએ ઔપચારિક ચર્ચા બોલાવી છે. યુરોપને ભય છે કે રશિયાની ઉશ્કેરણીથી આ યુદ્ધ વધુ વિસ્તરી શકે છે.
રશિયા-યુક્રેનમાં વધી રહેલા હુમલાઓ
યુક્રેનના અધિકારીઓએ જણાવ્યું કે રશિયાએ આખી રાત દરમિયાન ત્રણ ઇસ્કંદર બૅલિસ્ટિક મિસાઇલ અને 115 ડ્રોન છોડ્યા, જેમાંથી 103ને ઊતારી લેવામાં આવ્યા. બાકી ડ્રોન અને મિસાઇલે છ અલગ અલગ સ્થળોએ હુમલા કર્યા. જાપોરિઝ્ઝિયા શહેર પર પાંચ ગ્લાઈડ બોમ્બ ફેંકવામાં આવ્યા, જેમાં એક વ્યક્તિના મોત થયા. ઓડેસા વિસ્તારમાં આવેલા ટાટારબુનારી ગામમાં મિસાઇલ હુમલાથી એક મહિલાનું મૃત્યુ થયું.
