હાઉસિંગ કટોકટી અને આસમાને પહોંચેલી મોંઘવારીના વિરોધમાં સ્પેનમાં 14 વર્ષ બાદ પ્રથમ વખત દેશવ્યાપી સામાન્ય હડતાળનું એલાન કરવામાં આવ્યું છે. દેશના મુખ્ય મજૂર સંગઠનો દ્વારા બોલાવવામાં આવેલી આ હડતાળમાં લાખો લોકો જોડાતા સમગ્ર દેશમાં જનજીવન ઠપ્પ થઈ ગયું છે. રાજધાની મેડ્રિડમાં આશરે 1,20,000 અને બાર્સેલોનામાં 50,000 થી વધુ લોકો રસ્તા પર ઉતરી આવ્યા હતા, જેના કારણે ટ્રાફિક અને જાહેર સેવાઓમાં ભારે વિક્ષેપ પડ્યો છે.

બાર્સેલોનામાં વિરોધ પ્રદર્શન હિંસક બન્યુ

દિવસ દરમિયાન મોટાભાગે શાંતિપૂર્ણ રહેલું આ પ્રદર્શન બુધવારે સાંજે બાર્સેલોનામાં હિંસક બન્યું હતું. મધ્ય બાર્સેલોનાના પ્લાકા ડી કેટાલુનિયા અને પાસેગ ડી ગ્રેસિયા વિસ્તારમાં માસ્ક પહેરેલા કેટલાક જૂથોએ કચરાપેટીઓમાં આગ લગાવી હતી અને દુકાનોની બારીઓમાં તોડફોડ કરી હતી. સ્થાનિક અહેવાલો અનુસાર, તોફાની તત્વોએ પોલીસ પર ફટાકડા ફેંક્યા હતા, રિયલ એસ્ટેટ ઓફિસોને નિશાન બનાવી હતી તેમજ લેગો અને એપલ સ્ટોર જેવી દુકાનોમાં લૂંટ ચલાવવાનો પ્રયાસ કર્યો હતો. પરિસ્થિતિને કાબૂમાં લેવા પોલીસે ટીયર ગેસના શેલ છોડવા પડ્યા હતા અને ડઝનેક લોકોની ધરપકડ કરી હતી.
https://x.com/volkova_ma57183/status/2120621177219449133?ref_src=twsrc%5Etfw%7Ctwcamp%5Etweetembed%7Ctwterm%5E2120621177219449133%7Ctwgr%5E%7Ctwcon%5Es1_c10&ref_url=

જનઆક્રોશ ચરમ સીમાએ પહોંચ્યો

આ વ્યાપક જનઆક્રોશ પાછળ રહેઠાણનો અસહ્ય ખર્ચ મુખ્ય કારણ છે. તાજેતરમાં મેડ્રિડના એક ફ્લેટમાં સાત દાયકાથી રહેતા 87 વર્ષીય વૃદ્ધા મેરીકાર્મેન અબાસ્કલને ઘર ખાલી કરાવવાની ઘટના અને ત્યારબાદ થયેલા તેમના મૃત્યુએ લોકોના ગુસ્સામાં ઘી હોમવાનું કામ કર્યું હતું. મીડિયા રિપોર્ટના આંકડા મુજબ, મેડ્રિડમાં 50-ચોરસ મીટરના એપાર્ટમેન્ટનું સરેરાશ માસિક ભાડું 1,170 યુરો સુધી પહોંચી ગયું છે, જ્યારે સ્પેનમાં સરેરાશ માસિક પગાર માત્ર 2,460 યુરો છે. આમ, લોકોની અડધી કમાણી માત્ર ભાડામાં જ ખર્ચાઈ રહી છે, જે નિષ્ણાતો દ્વારા સૂચવાયેલી 30 ટકાની મર્યાદા કરતાં ઘણી વધારે છે.

આગામી 29 નવેમ્બરે સ્પેનમાં સંસદીય ચૂંટણીઓ યોજાવાની છે. ગત મહિને સંસદે હાઉસિંગ રિફોર્મ યોજના નકારી કાઢતા સમાજવાદી વડા પ્રધાન પેડ્રો સાંચેઝે તાત્કાલિક ચૂંટણીઓની જાહેરાત કરી હતી. રસપ્રદ વાત એ છે કે, 2012 પછી પ્રથમ વખત યોજાયેલી આ હડતાળનો વિરોધ કરવાને બદલે ખુદ વડા પ્રધાન સાંચેઝ અને તેમના મંત્રીઓએ સસ્તા મકાનોની માંગ સાથે કામ બંધ રાખવા માટે કામદારોને પ્રોત્સાહન આપ્યું છે.

આ પણ વાંચોઃ  Delhi: ગેસ ચેમ્બરમાં ફેરવાઇ દિલ્હી, ક્લાઉડ સીડિંગથી પણ રાહત મળવી મુશ્કેલ, જાણો કેમ?